ਨੌਕਰੀ ਲਈ ਅਵੇਲੇਬਿਲਿਟੀ ਬਾਰੇ ਜਾਣਕਾਰੀ: ਕੀ ਲਿਖੀਏ ਅਤੇ ਇਹ ਕਿਉਂ ਜ਼ਰੂਰੀ ਹੈ

ਘੰਟੇ ਦੇ ਹਿਸਾਬ ਵਾਲੀ ਨੌਕਰੀ ਦੀ ਲਗਭਗ ਹਰ ਅਰਜ਼ੀ ਵਿੱਚ ਇੱਕੋ ਸਵਾਲ ਪੁੱਛਿਆ ਜਾਂਦਾ ਹੈ: ਤੁਸੀਂ ਕਦੋਂ ਕੰਮ ਕਰ ਸਕਦੇ ਹੋ? ਤੁਹਾਡੇ ਜਵਾਬ ਨੂੰ ਤੁਹਾਡੀ ਅਵੇਲੇਬਿਲਿਟੀ (availability) ਕਹਿੰਦੇ ਹਨ। ਇਹ ਉਹ ਦਿਨ ਅਤੇ ਸਮੇਂ ਹਨ ਜਦੋਂ ਮਾਲਕ ਤੁਹਾਨੂੰ ਸ਼ਡਿਊਲ 'ਤੇ ਲਾ ਸਕਦਾ ਹੈ।

ਐਂਟਰੀ-ਲੈਵਲ ਨੌਕਰੀਆਂ ਲਈ, ਅਵੇਲੇਬਿਲਿਟੀ ਅਕਸਰ ਉਹਨਾਂ ਪਹਿਲੀਆਂ ਚੀਜ਼ਾਂ ਵਿੱਚੋਂ ਇੱਕ ਹੁੰਦੀ ਹੈ ਜੋ ਮੈਨੇਜਰ ਦੇਖਦਾ ਹੈ। ਇਹ ਤਜਰਬੇ ਨਾਲੋਂ ਵੀ ਵੱਧ ਮਾਇਨੇ ਰੱਖ ਸਕਦੀ ਹੈ। ਇਹ ਗਾਈਡ ਦੱਸਦੀ ਹੈ ਕਿ ਇਸਨੂੰ ਇਮਾਨਦਾਰੀ ਨਾਲ ਕਿਵੇਂ ਭਰਨਾ ਹੈ ਅਤੇ ਇਸਦਾ ਤੁਹਾਡੇ ਘੰਟਿਆਂ 'ਤੇ ਕੀ ਅਸਰ ਪੈਂਦਾ ਹੈ।

ਅਸੀਂ ਹੇਠਾਂ ਦਿੱਤੀ ਜਾਣਕਾਰੀ 12 ਅਕਤੂਬਰ 2026 ਨੂੰ ਚੈੱਕ ਕੀਤੀ ਸੀ। ਤਾਜ਼ਾ ਨਿਯਮਾਂ ਲਈ ਲਿੰਕ ਦੇਖੋ।

ਅਵੇਲੇਬਿਲਿਟੀ ਦਾ ਮਤਲਬ

ਅਵੇਲੇਬਿਲਿਟੀ ਉਹ ਘੰਟੇ ਨਹੀਂ ਹਨ ਜਿੰਨੇ ਤੁਸੀਂ ਕੰਮ ਕਰਨਾ ਚਾਹੁੰਦੇ ਹੋ। ਇਹ ਉਹ ਸਮੇਂ ਹਨ ਜਦੋਂ ਤੁਸੀਂ ਹਰ ਹਫ਼ਤੇ ਕੰਮ ਕਰ ਸਕਦੇ ਹੋ, ਜੇ ਮੈਨੇਜਰ ਤੁਹਾਨੂੰ ਸ਼ਡਿਊਲ ਕਰੇ।

ਅਰਜ਼ੀਆਂ ਵਿੱਚ ਇਹ ਆਮ ਤੌਰ 'ਤੇ ਪੂਰੇ ਹਫ਼ਤੇ ਦੇ ਖ਼ਾਨਿਆਂ ਵਾਲੇ ਚਾਰਟ (grid) ਵਿੱਚ ਮੰਗੀ ਜਾਂਦੀ ਹੈ। ਹਰ ਦਿਨ ਲਈ, ਤੁਸੀਂ ਸਭ ਤੋਂ ਪਹਿਲਾ ਸਮਾਂ ਦਿੰਦੇ ਹੋ ਜਦੋਂ ਤੁਸੀਂ ਸ਼ੁਰੂ ਕਰ ਸਕਦੇ ਹੋ ਅਤੇ ਸਭ ਤੋਂ ਦੇਰ ਵਾਲਾ ਸਮਾਂ ਜਦੋਂ ਤੱਕ ਤੁਸੀਂ ਕੰਮ ਮੁਕਾ ਸਕਦੇ ਹੋ। ਕੁਝ ਫ਼ਾਰਮ ਇਹ ਵੀ ਪੁੱਛਦੇ ਹਨ:

• ਤੁਸੀਂ ਹਫ਼ਤੇ ਵਿੱਚ ਕਿੰਨੇ ਘੰਟੇ ਚਾਹੁੰਦੇ ਹੋ
• ਤੁਸੀਂ ਪਾਰਟ-ਟਾਈਮ, ਫੁੱਲ-ਟਾਈਮ, ਜਾਂ ਸੀਜ਼ਨਲ ਕੰਮ ਚਾਹੁੰਦੇ ਹੋ
• ਤੁਸੀਂ ਕਦੋਂ ਸ਼ੁਰੂ ਕਰ ਸਕਦੇ ਹੋ

ਤੁਹਾਡੀ ਅਵੇਲੇਬਿਲਿਟੀ ਘੰਟਿਆਂ ਦਾ ਵਾਅਦਾ ਨਹੀਂ ਹੈ। ਤੁਹਾਡੀਆਂ ਸ਼ਿਫ਼ਟਾਂ ਤੁਹਾਡੇ ਦਿੱਤੇ ਸਮਿਆਂ ਦੇ ਅੰਦਰ ਹੀ ਹੋਣਗੀਆਂ, ਪਰ ਹੋ ਸਕਦਾ ਹੈ ਤੁਹਾਨੂੰ ਉਹ ਸਾਰੇ ਸਮੇਂ ਨਾ ਮਿਲਣ।

ਇਸਨੂੰ ਇਮਾਨਦਾਰੀ ਨਾਲ ਕਿਵੇਂ ਭਰੀਏ

1. ਉਹਨਾਂ ਚੀਜ਼ਾਂ ਤੋਂ ਸ਼ੁਰੂ ਕਰੋ ਜੋ ਤੁਸੀਂ ਬਦਲ ਨਹੀਂ ਸਕਦੇ। ਕਲਾਸਾਂ, ਸਕੂਲ ਆਉਣ-ਜਾਣ ਦਾ ਸਮਾਂ, ਧਾਰਮਿਕ ਰੁਝੇਵੇਂ, ਪਰਿਵਾਰ ਦੀ ਦੇਖਭਾਲ, ਜਾਂ ਕੋਈ ਹੋਰ ਨੌਕਰੀ।
2. ਆਉਣ-ਜਾਣ ਦਾ ਸਮਾਂ ਗਿਣੋ। ਰਾਤ 11 ਵਜੇ ਖ਼ਤਮ ਹੋਣ ਵਾਲੀ ਸ਼ਿਫ਼ਟ ਦਾ ਮਤਲਬ ਟ੍ਰਾਂਜ਼ਿਟ (ਬੱਸ ਜਾਂ ਟ੍ਰੇਨ) ਰਾਹੀਂ ਘਰ ਤੱਕ ਲੰਬਾ ਸਫ਼ਰ ਹੋ ਸਕਦਾ ਹੈ। ਪੱਕਾ ਕਰੋ ਕਿ ਤੁਸੀਂ ਸੁਰੱਖਿਅਤ ਢੰਗ ਨਾਲ ਉੱਥੇ ਪਹੁੰਚ ਸਕਦੇ ਹੋ ਅਤੇ ਵਾਪਸ ਆ ਸਕਦੇ ਹੋ।
3. ਉਹ ਸਮੇਂ ਮਾਰਕ ਕਰੋ ਜਦੋਂ ਤੁਸੀਂ ਹਰ ਹਫ਼ਤੇ ਕੰਮ ਕਰ ਸਕਦੇ ਹੋ, ਸਿਰਫ਼ ਕੁਝ ਹਫ਼ਤਿਆਂ ਵਿੱਚ ਨਹੀਂ।
4. ਸਾਫ਼ ਸਮੇਂ ਲਿਖੋ। ਮਿਸਾਲ ਵਜੋਂ: "Monday to Friday, 4 p.m. to 10 p.m. Saturday and Sunday, any time." (ਯਾਨੀ ਸੋਮਵਾਰ ਤੋਂ ਸ਼ੁੱਕਰਵਾਰ ਸ਼ਾਮ 4 ਵਜੇ ਤੋਂ ਰਾਤ 10 ਵਜੇ ਤੱਕ, ਅਤੇ ਸ਼ਨੀਵਾਰ ਤੇ ਐਤਵਾਰ ਕਿਸੇ ਵੀ ਸਮੇਂ।)
5. ਉਹ ਤਰੀਕਾਂ ਲਿਖੋ ਜਦੋਂ ਤੁਸੀਂ ਕੰਮ 'ਤੇ ਨਹੀਂ ਆ ਸਕੋਗੇ, ਜਿਵੇਂ ਇਮਤਿਹਾਨ ਜਾਂ ਪਹਿਲਾਂ ਤੋਂ ਤੈਅ ਕੋਈ ਸਫ਼ਰ।

ਇਮਾਨਦਾਰ ਰਹੋ। ਜੇ ਤੁਸੀਂ ਕਹਿੰਦੇ ਹੋ ਕਿ ਤੁਸੀਂ ਵਿਹਲੇ ਹੋ ਅਤੇ ਫਿਰ ਅਕਸਰ ਉਹ ਸ਼ਿਫ਼ਟਾਂ ਨਹੀਂ ਕਰ ਸਕਦੇ, ਤਾਂ ਤੁਹਾਡਾ ਮੈਨੇਜਰ ਤੁਹਾਨੂੰ ਗ਼ੈਰ-ਭਰੋਸੇਯੋਗ ਸਮਝਣ ਲੱਗੇਗਾ। ਅਜਿਹੀ ਥੋੜ੍ਹੀ ਘੱਟ ਅਵੇਲੇਬਿਲਿਟੀ ਦੇਣਾ ਕਿਤੇ ਚੰਗਾ ਹੈ ਜਿਸਨੂੰ ਤੁਸੀਂ ਹਮੇਸ਼ਾ ਨਿਭਾ ਸਕੋ।

"Open availability" ਦਾ ਕੀ ਮਤਲਬ ਹੈ

ਕੁਝ ਇਸ਼ਤਿਹਾਰ open availability (ਪੂਰੀ ਅਵੇਲੇਬਿਲਿਟੀ) ਮੰਗਦੇ ਹਨ। ਇਸਦਾ ਮਤਲਬ ਹੈ ਕਿ ਜਦੋਂ ਵੀ ਕਾਰੋਬਾਰ ਖੁੱਲ੍ਹਾ ਹੋਵੇ, ਤੁਸੀਂ ਕਿਸੇ ਵੀ ਦਿਨ ਅਤੇ ਕਿਸੇ ਵੀ ਸ਼ਿਫ਼ਟ ਵਿੱਚ ਕੰਮ ਕਰ ਸਕਦੇ ਹੋ, ਸਵੇਰੇ ਤੜਕੇ, ਦੇਰ ਸ਼ਾਮ, ਵੀਕਐਂਡ, ਅਤੇ ਛੁੱਟੀਆਂ ਵਾਲੇ ਦਿਨਾਂ ਸਮੇਤ।

Open availability ਨਾਲ ਨੌਕਰੀ ਮਿਲਣ ਵਿੱਚ ਮਦਦ ਮਿਲਦੀ ਹੈ। ਪਰ ਇਹ ਸਿਰਫ਼ ਤਾਂ ਹੀ ਕਹੋ ਜੇ ਇਹ ਸੱਚ ਹੈ। ਜੇ ਤੁਸੀਂ ਪੂਰੀ open availability ਨਹੀਂ ਦੇ ਸਕਦੇ, ਤਾਂ ਦੱਸੋ ਕਿ ਤੁਸੀਂ ਕੀ ਦੇ ਸਕਦੇ ਹੋ:

• "Open availability on weekends" (ਵੀਕਐਂਡ 'ਤੇ ਕਿਸੇ ਵੀ ਸਮੇਂ)
• "Available every evening after 5 p.m." (ਹਰ ਸ਼ਾਮ 5 ਵਜੇ ਤੋਂ ਬਾਅਦ ਵਿਹਲਾ/ਵਿਹਲੀ)
• "Available any time during summer break" (ਗਰਮੀਆਂ ਦੀਆਂ ਛੁੱਟੀਆਂ ਦੌਰਾਨ ਕਿਸੇ ਵੀ ਸਮੇਂ ਵਿਹਲਾ/ਵਿਹਲੀ)

ਸਟੋਰਾਂ ਅਤੇ ਰੈਸਟੋਰੈਂਟਾਂ ਨੂੰ ਅਕਸਰ ਸ਼ਾਮਾਂ, ਵੀਕਐਂਡ ਅਤੇ ਛੁੱਟੀਆਂ ਵਾਲੇ ਦਿਨਾਂ ਵਿੱਚ ਸਭ ਤੋਂ ਵੱਧ ਮਦਦ ਦੀ ਲੋੜ ਹੁੰਦੀ ਹੈ। ਵੀਕਐਂਡ ਦਾ ਇੱਕ ਪੂਰਾ ਦਿਨ ਵੀ ਤੁਹਾਡੀ ਅਰਜ਼ੀ ਨੂੰ ਮਜ਼ਬੂਤ ਬਣਾ ਸਕਦਾ ਹੈ।

ਅਵੇਲੇਬਿਲਿਟੀ ਦਾ ਭਰਤੀ ਅਤੇ ਘੰਟਿਆਂ 'ਤੇ ਅਸਰ

ਮੈਨੇਜਰ ਆਪਣੇ ਭੀੜ ਵਾਲੇ ਸਮਿਆਂ ਦੇ ਹਿਸਾਬ ਨਾਲ ਸ਼ਡਿਊਲ ਬਣਾਉਂਦੇ ਹਨ। ਉਹ ਅਜਿਹੇ ਲੋਕ ਲੱਭਦੇ ਹਨ ਜੋ ਖ਼ਾਲੀ ਥਾਵਾਂ ਭਰ ਸਕਣ।

• ਵੱਧ ਅਵੇਲੇਬਿਲਿਟੀ ਦਾ ਮਤਲਬ ਆਮ ਤੌਰ 'ਤੇ ਵੱਧ ਮੌਕੇ ਹੁੰਦਾ ਹੈ। ਤੁਹਾਨੂੰ ਸ਼ਡਿਊਲ ਦੀਆਂ ਵੱਧ ਖ਼ਾਲੀ ਥਾਵਾਂ 'ਤੇ ਲਾਇਆ ਜਾ ਸਕਦਾ ਹੈ, ਇਸ ਲਈ ਤੁਹਾਨੂੰ ਨੌਕਰੀ 'ਤੇ ਰੱਖਣਾ ਸੌਖਾ ਹੁੰਦਾ ਹੈ ਅਤੇ ਤੁਹਾਨੂੰ ਵੱਧ ਸ਼ਿਫ਼ਟਾਂ ਮਿਲ ਸਕਦੀਆਂ ਹਨ।
• ਘੱਟ ਅਵੇਲੇਬਿਲਿਟੀ ਦਾ ਮਤਲਬ ਆਮ ਤੌਰ 'ਤੇ ਘੱਟ ਘੰਟੇ ਹੁੰਦਾ ਹੈ। ਜੇ ਤੁਸੀਂ ਹਫ਼ਤੇ ਵਿੱਚ ਸਿਰਫ਼ ਇੱਕ ਸ਼ਾਮ ਕੰਮ ਕਰ ਸਕਦੇ ਹੋ, ਤਾਂ ਨੌਕਰੀ ਮਿਲਣੀ ਔਖੀ ਹੋ ਸਕਦੀ ਹੈ, ਜਾਂ ਤੁਹਾਨੂੰ ਬਹੁਤ ਘੱਟ ਸ਼ਿਫ਼ਟਾਂ ਮਿਲ ਸਕਦੀਆਂ ਹਨ।
• ਘੰਟੇ ਅਕਸਰ ਹਰ ਹਫ਼ਤੇ ਬਦਲਦੇ ਹਨ। ਇੰਟਰਵਿਊ ਵਿੱਚ ਪੁੱਛੋ ਕਿ ਸ਼ਡਿਊਲ ਕਿਵੇਂ ਬਣਦੇ ਹਨ ਅਤੇ ਤੁਹਾਨੂੰ ਆਪਣੀਆਂ ਸ਼ਿਫ਼ਟਾਂ ਦਾ ਕਿੰਨਾ ਪਹਿਲਾਂ ਪਤਾ ਲੱਗੇਗਾ। ਤੁਹਾਡੀ ਪਹਿਲੀ ਨੌਕਰੀ ਦੀ ਇੰਟਰਵਿਊ ਬਾਰੇ ਸਾਡੀ ਗਾਈਡ ਵਿੱਚ ਹੋਰ ਚੰਗੇ ਸਵਾਲ ਹਨ।

ਪੜ੍ਹਾਈ ਦੇ ਨਾਲ-ਨਾਲ ਕੰਮ

ਜੇ ਤੁਸੀਂ ਵਿਦਿਆਰਥੀ ਹੋ, ਤਾਂ ਆਪਣੀਆਂ ਕਲਾਸਾਂ ਖ਼ਤਮ ਹੋਣ ਤੋਂ ਬਾਅਦ ਦੇ ਘੰਟੇ ਦਿਓ, ਅਤੇ ਨਾਲ ਆਉਣ-ਜਾਣ ਦਾ ਸਮਾਂ ਵੀ ਜੋੜੋ। ਹਰ ਟਰਮ ਵਿੱਚ ਜਦੋਂ ਤੁਹਾਡਾ ਟਾਈਮਟੇਬਲ ਬਦਲਦਾ ਹੈ, ਆਪਣੀ ਅਵੇਲੇਬਿਲਿਟੀ ਅੱਪਡੇਟ ਕਰੋ। ਇਮਤਿਹਾਨਾਂ ਵਾਲੇ ਹਫ਼ਤਿਆਂ ਬਾਰੇ ਆਪਣੇ ਮੈਨੇਜਰ ਨੂੰ ਜਿੰਨੀ ਛੇਤੀ ਹੋ ਸਕੇ ਦੱਸੋ।

ਟੀਨਏਜਰਾਂ ਲਈ ਕਾਨੂੰਨੀ ਹੱਦਾਂ ਹਨ:

• ਬੀ.ਸੀ.: 15 ਸਾਲ ਤੋਂ ਘੱਟ ਉਮਰ ਦੇ ਬੱਚਿਆਂ ਨੂੰ ਸਕੂਲ ਦੇ ਸਮੇਂ ਦੌਰਾਨ ਕੰਮ ਕਰਨ ਲਈ ਨਹੀਂ ਕਿਹਾ ਜਾ ਸਕਦਾ। ਉਹ ਸਕੂਲ ਵਾਲੇ ਦਿਨ 4 ਘੰਟਿਆਂ ਤੋਂ ਵੱਧ, ਬਿਨਾਂ ਸਕੂਲ ਵਾਲੇ ਦਿਨ 7 ਘੰਟਿਆਂ ਤੋਂ ਵੱਧ, 5 ਸਕੂਲੀ ਦਿਨਾਂ ਵਾਲੇ ਹਫ਼ਤੇ ਵਿੱਚ 20 ਘੰਟਿਆਂ ਤੋਂ ਵੱਧ, ਜਾਂ ਜਦੋਂ ਸਕੂਲ ਨਾ ਚੱਲ ਰਿਹਾ ਹੋਵੇ ਤਾਂ ਹਫ਼ਤੇ ਵਿੱਚ 35 ਘੰਟਿਆਂ ਤੋਂ ਵੱਧ ਕੰਮ ਨਹੀਂ ਕਰ ਸਕਦੇ। 15 ਸਾਲ ਅਤੇ ਵੱਧ ਉਮਰ 'ਤੇ ਕੰਮ ਦੇ ਘੰਟਿਆਂ ਦੇ ਆਮ ਨਿਯਮ ਲਾਗੂ ਹੁੰਦੇ ਹਨ (ਨੌਜਵਾਨਾਂ ਨੂੰ ਨੌਕਰੀ 'ਤੇ ਰੱਖਣਾ)।
• ਓਨਟਾਰੀਓ: ਮਾਲਕ 16 ਸਾਲ ਤੋਂ ਘੱਟ ਉਮਰ ਦੇ ਬੱਚਿਆਂ ਨੂੰ ਸਕੂਲ ਦੇ ਸਮੇਂ ਦੌਰਾਨ ਨੌਕਰੀ 'ਤੇ ਨਹੀਂ ਰੱਖ ਸਕਦੇ (ਕੰਮ ਲਈ ਘੱਟੋ-ਘੱਟ ਉਮਰ)। ਓਨਟਾਰੀਓ ਵਿੱਚ ਵਿਦਿਆਰਥੀਆਂ ਲਈ ਘੱਟੋ-ਘੱਟ ਤਨਖਾਹ (student minimum wage) ਵੀ ਹੈ। ਇਹ 18 ਸਾਲ ਤੋਂ ਘੱਟ ਉਮਰ ਦੇ ਉਹਨਾਂ ਵਿਦਿਆਰਥੀਆਂ 'ਤੇ ਲਾਗੂ ਹੁੰਦੀ ਹੈ ਜੋ ਸਕੂਲ ਚੱਲਦੇ ਸਮੇਂ ਹਫ਼ਤੇ ਵਿੱਚ 28 ਘੰਟੇ ਜਾਂ ਘੱਟ ਕੰਮ ਕਰਦੇ ਹਨ, ਜਾਂ ਜੋ ਸਕੂਲ ਦੀਆਂ ਛੁੱਟੀਆਂ ਜਾਂ ਗਰਮੀਆਂ ਦੀਆਂ ਛੁੱਟੀਆਂ ਦੌਰਾਨ ਕੰਮ ਕਰਦੇ ਹਨ (ਓਨਟਾਰੀਓ ਦੀ ਘੱਟੋ-ਘੱਟ ਤਨਖਾਹ)।

ਪੂਰੇ ਨਿਯਮਾਂ ਲਈ ਬੀ.ਸੀ. ਅਤੇ ਓਨਟਾਰੀਓ ਵਿੱਚ 15, 16 ਜਾਂ 17 ਸਾਲ ਦੀ ਉਮਰ ਵਿੱਚ ਕੰਮ ਕਰਨਾ ਪੜ੍ਹੋ।

ਇੰਟਰਨੈਸ਼ਨਲ ਸਟੂਡੈਂਟ: ਪੜ੍ਹਾਈ ਦੀਆਂ ਟਰਮਾਂ ਦੌਰਾਨ, ਜੇ ਤੁਸੀਂ ਸ਼ਰਤਾਂ ਪੂਰੀਆਂ ਕਰਦੇ ਹੋ, ਤਾਂ ਤੁਸੀਂ ਕੈਂਪਸ ਤੋਂ ਬਾਹਰ ਹਫ਼ਤੇ ਵਿੱਚ 24 ਘੰਟਿਆਂ ਤੱਕ ਕੰਮ ਕਰ ਸਕਦੇ ਹੋ। ਤੈਅਸ਼ੁਦਾ ਛੁੱਟੀਆਂ ਦੌਰਾਨ, ਜਿਵੇਂ ਗਰਮੀਆਂ ਜਾਂ ਸਰਦੀਆਂ ਦੀਆਂ ਛੁੱਟੀਆਂ, ਤੁਸੀਂ ਜਿੰਨੇ ਮਰਜ਼ੀ ਘੰਟੇ ਕੰਮ ਕਰ ਸਕਦੇ ਹੋ (IRCC, ਯਾਨੀ ਕੈਨੇਡਾ ਦਾ ਇਮੀਗ੍ਰੇਸ਼ਨ ਵਿਭਾਗ)। ਜੇ ਤੁਸੀਂ open availability ਲਿਖਦੇ ਹੋ, ਤਾਂ ਮਾਲਕ ਨੂੰ ਟਰਮਾਂ ਦੌਰਾਨ ਦੀ ਹਫ਼ਤਾਵਾਰੀ ਹੱਦ ਬਾਰੇ ਦੱਸੋ। ਕਦੇ ਵੀ ਆਪਣੇ ਪਰਮਿਟ ਦੀ ਇਜਾਜ਼ਤ ਤੋਂ ਵੱਧ ਘੰਟਿਆਂ ਲਈ ਹਾਮੀ ਨਾ ਭਰੋ।

ਧਾਰਮਿਕ ਰੁਝੇਵੇਂ, ਦੇਖਭਾਲ ਦੀਆਂ ਜ਼ਿੰਮੇਵਾਰੀਆਂ, ਅਤੇ ਸਿਹਤ ਦੀਆਂ ਲੋੜਾਂ

ਕਈ ਵਾਰ ਤੁਸੀਂ ਆਪਣੇ ਧਰਮ, ਪਰਿਵਾਰ ਦੇ ਕਿਸੇ ਜੀਅ ਦੀ ਦੇਖਭਾਲ, ਜਾਂ ਕਿਸੇ ਅਪਾਹਜਤਾ (disability) ਕਰਕੇ ਕੁਝ ਖ਼ਾਸ ਸਮਿਆਂ 'ਤੇ ਕੰਮ ਨਹੀਂ ਕਰ ਸਕਦੇ। ਦੋਵਾਂ ਸੂਬਿਆਂ ਦੇ ਮਨੁੱਖੀ ਅਧਿਕਾਰ ਕਾਨੂੰਨ (human rights laws) ਤੁਹਾਡੀ ਰੱਖਿਆ ਕਰ ਸਕਦੇ ਹਨ।

• ਬੀ.ਸੀ.: ਮਾਲਕਾਂ ਦਾ ਫ਼ਰਜ਼ ਹੈ ਕਿ ਉਹ ਤੁਹਾਡੀਆਂ ਲੋੜਾਂ ਮੁਤਾਬਕ ਪ੍ਰਬੰਧ ਕਰਨ (duty to accommodate)। BC Human Rights Tribunal (ਬੀ.ਸੀ. ਮਨੁੱਖੀ ਅਧਿਕਾਰ ਟ੍ਰਿਬਿਊਨਲ) ਇੱਕ ਅਜਿਹੇ ਮੁਲਾਜ਼ਮ ਦੀ ਮਿਸਾਲ ਦਿੰਦਾ ਹੈ ਜਿਸਦਾ ਧਰਮ ਉਸਨੂੰ ਸ਼ਨੀਵਾਰ ਨੂੰ ਕੰਮ ਕਰਨ ਦੀ ਇਜਾਜ਼ਤ ਨਹੀਂ ਦਿੰਦਾ (BC Human Rights Tribunal)।
• ਓਨਟਾਰੀਓ: Ontario Human Rights Commission (OHRC, ਓਨਟਾਰੀਓ ਮਨੁੱਖੀ ਅਧਿਕਾਰ ਕਮਿਸ਼ਨ) ਕਹਿੰਦਾ ਹੈ ਕਿ ਮਾਲਕ ਸ਼ਡਿਊਲ ਬਦਲ ਕੇ ਪ੍ਰਬੰਧ ਕਰਨ ਦਾ ਆਪਣਾ ਫ਼ਰਜ਼ ਪੂਰਾ ਕਰ ਸਕਦੇ ਹਨ। ਮਾਲਕ ਸਿਰਫ਼ ਤਾਂ ਹੀ ਇਨਕਾਰ ਕਰ ਸਕਦਾ ਹੈ ਜੇ ਇਸ ਨਾਲ ਉਸਨੂੰ ਹੱਦੋਂ ਵੱਧ ਔਖਿਆਈ (undue hardship) ਹੋਵੇ, ਅਤੇ ਕਾਰੋਬਾਰ ਨੂੰ ਸਿਰਫ਼ ਅਸੁਵਿਧਾ ਹੋਣਾ ਕਾਫ਼ੀ ਨਹੀਂ (OHRC)।

ਤੁਸੀਂ ਇਸ ਬਾਰੇ ਖੁੱਲ੍ਹ ਕੇ ਗੱਲ ਕਰ ਸਕਦੇ ਹੋ। ਮਿਸਾਲ ਵਜੋਂ, ਇੰਟਰਵਿਊ ਵਿੱਚ: "ਧਾਰਮਿਕ ਕਾਰਨਾਂ ਕਰਕੇ ਮੈਂ ਸ਼ੁੱਕਰਵਾਰ ਸ਼ਾਮ ਤੋਂ ਸ਼ਨੀਵਾਰ ਸ਼ਾਮ ਤੱਕ ਕੰਮ ਨਹੀਂ ਕਰ ਸਕਦਾ/ਸਕਦੀ, ਪਰ ਮੈਂ ਹਰ ਐਤਵਾਰ ਅਤੇ ਹਫ਼ਤੇ ਦੇ ਦਿਨਾਂ ਦੀਆਂ ਸ਼ਾਮਾਂ ਨੂੰ ਵਿਹਲਾ/ਵਿਹਲੀ ਹਾਂ।"

ਬਾਅਦ ਵਿੱਚ ਆਪਣੀ ਅਵੇਲੇਬਿਲਿਟੀ ਬਦਲਣਾ

ਜ਼ਿੰਦਗੀ ਬਦਲਦੀ ਰਹਿੰਦੀ ਹੈ। ਸਕੂਲ ਦੀ ਨਵੀਂ ਟਰਮ, ਦੂਜੀ ਨੌਕਰੀ, ਜਾਂ ਪਰਿਵਾਰ ਦੀ ਕੋਈ ਲੋੜ ਇਹ ਬਦਲ ਸਕਦੀ ਹੈ ਕਿ ਤੁਸੀਂ ਕਦੋਂ ਕੰਮ ਕਰ ਸਕਦੇ ਹੋ।

• ਆਪਣੇ ਮੈਨੇਜਰ ਨੂੰ ਛੇਤੀ ਦੱਸੋ, ਚੰਗਾ ਹੋਵੇ ਜੇ ਬਦਲਾਅ ਤੋਂ ਕੁਝ ਹਫ਼ਤੇ ਪਹਿਲਾਂ।
• ਇਸਨੂੰ ਲਿਖਤੀ ਰੂਪ ਵਿੱਚ ਦਿਓ। ਸ਼ਡਿਊਲਿੰਗ ਐਪ, ਈਮੇਲ, ਜਾਂ ਤੁਹਾਡੇ ਕੰਮ ਵਾਲੀ ਥਾਂ ਦਾ ਫ਼ਾਰਮ ਵਰਤੋ। ਉਹ ਤਰੀਕ ਲਿਖੋ ਜਦੋਂ ਤੋਂ ਬਦਲਾਅ ਸ਼ੁਰੂ ਹੁੰਦਾ ਹੈ।
• ਪੁੱਛੋ ਕਿ ਉਹਨਾਂ ਨੂੰ ਕਿੰਨਾ ਪਹਿਲਾਂ ਦੱਸਣ ਦੀ ਲੋੜ ਹੈ। ਬਹੁਤ ਸਾਰੀਆਂ ਕੰਮ ਵਾਲੀਆਂ ਥਾਵਾਂ ਦਾ ਆਪਣਾ ਤਰੀਕਾ ਹੁੰਦਾ ਹੈ।
• ਨਫ਼ਾ-ਨੁਕਸਾਨ ਸਮਝੋ। ਆਪਣੀ ਅਵੇਲੇਬਿਲਿਟੀ ਬਹੁਤ ਘਟਾਉਣ ਦਾ ਮਤਲਬ ਘੱਟ ਸ਼ਿਫ਼ਟਾਂ ਹੋ ਸਕਦਾ ਹੈ। ਅਵੇਲੇਬਿਲਿਟੀ ਵਧਾਉਣ ਨਾਲ ਵੱਧ ਘੰਟੇ ਮਿਲ ਸਕਦੇ ਹਨ।
• ਇੱਕ ਦਿਨ ਦੀ ਛੁੱਟੀ ਵੱਖਰੀ ਗੱਲ ਹੈ। ਸਿਰਫ਼ ਇੱਕ ਦਿਨ ਲਈ, ਆਪਣੀ ਅਵੇਲੇਬਿਲਿਟੀ ਬਦਲਣ ਦੀ ਥਾਂ ਛੁੱਟੀ ਦੀ ਬੇਨਤੀ (time-off request) ਕਰੋ।

ਜੋ ਤੁਸੀਂ ਭੇਜਿਆ ਉਸਦੀ ਇੱਕ ਕਾਪੀ ਰੱਖੋ। ਜੇ ਕਦੇ ਕੋਈ ਗੜਬੜ ਹੋਵੇ ਤਾਂ ਇਹ ਕੰਮ ਆਉਂਦੀ ਹੈ।

ਅਗਲੇ ਕਦਮ

• ਅਰਜ਼ੀ ਦੇਣ ਲਈ ਤਿਆਰ ਹੋ? ਪੜ੍ਹੋ ਵੱਡੀਆਂ ਚੇਨ ਕੰਪਨੀਆਂ ਵਿੱਚ ਨੌਕਰੀ ਲਈ ਆਨਲਾਈਨ ਅਰਜ਼ੀ ਕਿਵੇਂ ਦੇਈਏ
• ਵਿਦਿਆਰਥੀਆਂ ਲਈ: ਵਿਦਿਆਰਥੀਆਂ ਲਈ ਪਾਰਟ-ਟਾਈਮ ਨੌਕਰੀਆਂ
• ਮੈਟਰੋ ਵੈਨਕੂਵਰ ਅਤੇ ਗ੍ਰੇਟਰ ਟੋਰਾਂਟੋ ਏਰੀਆ ਵਿੱਚ ਪਾਰਟ-ਟਾਈਮ ਅਤੇ ਐਂਟਰੀ-ਲੈਵਲ ਨੌਕਰੀਆਂ ਲੱਭੋ