ਗਰੋਸਰੀ ਸਟੋਰ ਜਾਂ ਫ਼ਾਰਮੇਸੀ ਵਿੱਚ ਨੌਕਰੀ ਕਿਵੇਂ ਲਈਏ

ਗਰੋਸਰੀ ਸਟੋਰ ਅਤੇ ਫ਼ਾਰਮੇਸੀਆਂ ਬਹੁਤ ਸਾਰੇ ਅਜਿਹੇ ਲੋਕਾਂ ਨੂੰ ਨੌਕਰੀ ਦਿੰਦੀਆਂ ਹਨ ਜਿਨ੍ਹਾਂ ਕੋਲ ਕੰਮ ਦਾ ਕੋਈ ਤਜਰਬਾ ਨਹੀਂ ਹੁੰਦਾ। ਇਹ ਲੰਬੇ ਸਮੇਂ ਤੱਕ ਖੁੱਲ੍ਹੇ ਰਹਿੰਦੇ ਹਨ, ਅਕਸਰ ਹਫ਼ਤੇ ਦੇ ਸੱਤੇ ਦਿਨ, ਇਸ ਲਈ ਇਹਨਾਂ ਨੂੰ ਸਵੇਰ, ਸ਼ਾਮ, ਵੀਕਐਂਡ, ਅਤੇ ਕਈ ਵਾਰ ਰਾਤ ਭਰ ਲਈ ਸਟਾਫ਼ ਚਾਹੀਦਾ ਹੈ। ਜ਼ਿਆਦਾਤਰ ਟ੍ਰੇਨਿੰਗ ਕੰਮ 'ਤੇ ਹੀ ਹੁੰਦੀ ਹੈ।

ਇਹ ਨੌਕਰੀਆਂ ਅਜਿਹੇ ਹੁਨਰ ਸਿਖਾਉਂਦੀਆਂ ਹਨ ਜੋ ਤੁਸੀਂ ਕਿਤੇ ਵੀ ਵਰਤ ਸਕਦੇ ਹੋ: ਕਸਟਮਰ ਸਰਵਿਸ, ਪੈਸੇ ਸੰਭਾਲਣਾ, ਟੀਮਵਰਕ, ਅਤੇ ਰਸ਼ ਵੇਲੇ ਕੰਮ ਨੂੰ ਤਰਤੀਬ ਨਾਲ ਰੱਖਣਾ।

ਐਂਟਰੀ-ਲੈਵਲ ਦੀਆਂ ਆਮ ਨੌਕਰੀਆਂ

ਕੈਸ਼ੀਅਰ। ਤੁਸੀਂ ਚੀਜ਼ਾਂ ਸਕੈਨ ਕਰਦੇ ਹੋ, ਪੇਮੈਂਟ ਲੈਂਦੇ ਹੋ, ਗਰੋਸਰੀ ਥੈਲਿਆਂ ਵਿੱਚ ਪਾਉਂਦੇ ਹੋ, ਅਤੇ ਗਾਹਕਾਂ ਦੀ ਮਦਦ ਕਰਦੇ ਹੋ। ਤੁਸੀਂ ਸੈਲਫ਼-ਚੈੱਕਆਊਟ ਵਾਲੀ ਥਾਂ ਦਾ ਧਿਆਨ ਵੀ ਰੱਖ ਸਕਦੇ ਹੋ, ਵਾਪਸ ਕੀਤਾ ਸਮਾਨ (returns) ਲੈ ਸਕਦੇ ਹੋ, ਜਾਂ ਫ਼ੋਨ ਸੁਣ ਸਕਦੇ ਹੋ।

ਗਰੋਸਰੀ ਕਲਰਕ ਜਾਂ ਸਟੌਕਰ (stocker)। ਤੁਸੀਂ ਡਿਲੀਵਰੀਆਂ ਉਤਾਰਦੇ ਹੋ, ਸ਼ੈਲਫ਼ਾਂ ਭਰਦੇ ਹੋ, ਪੁਰਾਣਾ ਸਮਾਨ ਅੱਗੇ ਅਤੇ ਨਵਾਂ ਪਿੱਛੇ ਰੱਖਦੇ ਹੋ ਤਾਂ ਜੋ ਪੁਰਾਣਾ ਸਮਾਨ ਪਹਿਲਾਂ ਵਿਕੇ, ਅਤੇ ਆਈਲਾਂ (aisles) ਨੂੰ ਸਾਫ਼-ਸੁਥਰਾ ਰੱਖਦੇ ਹੋ। ਬਹੁਤ ਸਾਰੇ ਸਟੋਰ ਕਾਫ਼ੀ ਸਟਾਕਿੰਗ ਰਾਤ ਨੂੰ ਕਰਦੇ ਹਨ। ਸਾਡੀ ਵੇਅਰਹਾਊਸ ਅਤੇ ਸਟਾਕਿੰਗ ਗਾਈਡ ਦੱਸਦੀ ਹੈ ਕਿ ਰਾਤ ਦੀਆਂ ਸ਼ਿਫ਼ਟਾਂ ਕਿਹੋ ਜਿਹੀਆਂ ਹੁੰਦੀਆਂ ਹਨ।

ਡਿਪਾਰਟਮੈਂਟ ਕਲਰਕ। ਫਲ-ਸਬਜ਼ੀਆਂ (produce), ਡੈਲੀ, ਬੇਕਰੀ, ਮੀਟ, ਅਤੇ ਸੀਫ਼ੂਡ ਵਿਭਾਗ ਖਾਣਾ ਤਿਆਰ ਕਰਨ, ਪੈਕ ਕਰਨ, ਅਤੇ ਸਜਾ ਕੇ ਰੱਖਣ ਲਈ ਕਲਰਕ ਰੱਖਦੇ ਹਨ। ਇਹਨਾਂ ਨੌਕਰੀਆਂ ਵਿੱਚ ਫ਼ੂਡ ਸੇਫ਼ਟੀ ਦੇ ਨਿਯਮ ਮੰਨਣੇ ਪੈਂਦੇ ਹਨ, ਅਤੇ ਕੁਝ ਵਿੱਚ ਚਾਕੂ ਜਾਂ ਸਲਾਈਸਰ ਵਰਤਣੇ ਪੈਂਦੇ ਹਨ।

ਆਨਲਾਈਨ ਆਰਡਰ ਪਿੱਕਰ। ਬਹੁਤ ਸਾਰੇ ਗਰੋਸਰੀ ਸਟੋਰ ਆਨਲਾਈਨ ਆਰਡਰ ਪੂਰੇ ਕਰਦੇ ਹਨ। ਤੁਸੀਂ ਲਿਸਟ ਜਾਂ ਹੱਥ ਵਾਲੇ ਸਕੈਨਰ ਨਾਲ ਸਟੋਰ ਵਿੱਚ ਘੁੰਮਦੇ ਹੋ, ਚੀਜ਼ਾਂ ਚੁੱਕਦੇ ਹੋ, ਅਤੇ ਪਿੱਕਅੱਪ ਜਾਂ ਡਿਲੀਵਰੀ ਲਈ ਆਰਡਰ ਪੈਕ ਕਰਦੇ ਹੋ।

ਫ਼ਰੰਟ ਸਟੋਰ ਐਸੋਸੀਏਟ। ਡਰੱਗਸਟੋਰ ਵਿੱਚ, "ਫ਼ਰੰਟ ਸਟੋਰ" ਫ਼ਾਰਮੇਸੀ ਕਾਊਂਟਰ ਤੋਂ ਬਾਹਰ ਦਾ ਸਭ ਕੁਝ ਹੈ: ਸਨੈਕਸ, ਘਰੇਲੂ ਸਮਾਨ, ਨਿੱਜੀ ਦੇਖਭਾਲ ਦੀਆਂ ਚੀਜ਼ਾਂ, ਅਤੇ ਕੈਸ਼ ਰਜਿਸਟਰ। ਤੁਸੀਂ ਸ਼ੈਲਫ਼ਾਂ ਭਰਦੇ ਹੋ, ਗਾਹਕਾਂ ਨੂੰ ਚੀਜ਼ਾਂ ਲੱਭਣ ਵਿੱਚ ਮਦਦ ਕਰਦੇ ਹੋ, ਅਤੇ ਕੈਸ਼ (till) 'ਤੇ ਕੰਮ ਕਰਦੇ ਹੋ।

ਬਿਊਟੀ ਜਾਂ ਕੌਸਮੈਟਿਕਸ ਐਡਵਾਈਜ਼ਰ। ਤੁਸੀਂ ਗਾਹਕਾਂ ਨੂੰ ਸਕਿਨ ਕੇਅਰ, ਮੇਕਅੱਪ, ਅਤੇ ਖ਼ੁਸ਼ਬੂਆਂ (fragrance) ਚੁਣਨ ਵਿੱਚ ਮਦਦ ਕਰਦੇ ਹੋ। ਮਾਲਕ ਅਜਿਹੇ ਮਿਲਣਸਾਰ ਲੋਕ ਲੱਭਦੇ ਹਨ ਜਿਨ੍ਹਾਂ ਨੂੰ ਦੂਜਿਆਂ ਦੀ ਮਦਦ ਕਰਨਾ ਚੰਗਾ ਲੱਗਦਾ ਹੈ। ਪ੍ਰੋਡਕਟਾਂ ਦੀ ਟ੍ਰੇਨਿੰਗ ਆਮ ਤੌਰ 'ਤੇ ਨੌਕਰੀ ਦਾ ਹਿੱਸਾ ਹੁੰਦੀ ਹੈ।

ਫ਼ਾਰਮੇਸੀ ਅਸਿਸਟੈਂਟ। ਤੁਸੀਂ ਕੰਮਾਂ ਵਿੱਚ ਫ਼ਾਰਮੇਸੀ ਟੀਮ ਦੀ ਮਦਦ ਕਰਦੇ ਹੋ, ਜਿਵੇਂ ਕਾਊਂਟਰ 'ਤੇ ਗਾਹਕਾਂ ਨੂੰ ਸੰਭਾਲਣਾ, ਪੇਮੈਂਟ ਲੈਣਾ, ਅਤੇ ਥਾਂ ਨੂੰ ਤਰਤੀਬ ਵਿੱਚ ਰੱਖਣਾ। ਕੰਮ ਫ਼ਾਰਮੇਸੀ ਅਤੇ ਸੂਬੇ 'ਤੇ ਨਿਰਭਰ ਕਰਦੇ ਹਨ।

ਫ਼ਾਰਮੇਸੀ ਅਸਿਸਟੈਂਟ ਅਤੇ ਫ਼ਾਰਮੇਸੀ ਟੈਕਨੀਸ਼ੀਅਨ ਇੱਕੋ ਚੀਜ਼ ਨਹੀਂ ਹਨ। ਫ਼ਾਰਮੇਸੀ ਟੈਕਨੀਸ਼ੀਅਨ ਰੈਗੂਲੇਟਿਡ ਸਿਹਤ ਪੇਸ਼ੇਵਰ (regulated health professionals) ਹੁੰਦੇ ਹਨ, ਯਾਨੀ ਇਹ ਕੰਮ ਕਰਨ ਲਈ ਉਹਨਾਂ ਨੂੰ ਰਜਿਸਟ੍ਰੇਸ਼ਨ ਜਾਂ ਲਾਇਸੈਂਸ ਚਾਹੀਦਾ ਹੈ:

ਓਨਟਾਰੀਓ ਵਿੱਚ, ਫ਼ਾਰਮਾਸਿਸਟਾਂ ਅਤੇ ਫ਼ਾਰਮੇਸੀ ਟੈਕਨੀਸ਼ੀਅਨਾਂ ਨੂੰ Ontario College of Pharmacists (ਓਨਟਾਰੀਓ ਵਿੱਚ ਫ਼ਾਰਮਾਸਿਸਟਾਂ ਅਤੇ ਫ਼ਾਰਮੇਸੀ ਟੈਕਨੀਸ਼ੀਅਨਾਂ ਨੂੰ ਰਜਿਸਟਰ ਕਰਨ ਵਾਲੀ ਸਰਕਾਰੀ ਸੰਸਥਾ, ਪੜ੍ਹਾਈ ਵਾਲਾ ਕਾਲਜ ਨਹੀਂ) ਨਾਲ ਰਜਿਸਟਰ ਹੋਣਾ ਪੈਂਦਾ ਹੈ। ਇਸ ਸੰਸਥਾ ਮੁਤਾਬਕ ਬਾਕੀ ਸਟਾਫ਼, ਜਿਵੇਂ ਫ਼ਾਰਮੇਸੀ ਅਸਿਸਟੈਂਟ, ਕੈਸ਼ੀਅਰ, ਅਤੇ ਸਟਾਕ ਵਾਲੇ ਲੋਕ, ਉਹਨਾਂ ਦੀ ਨਿਗਰਾਨੀ ਹੇਠ ਕੰਮ ਕਰਦੇ ਹਨ ਅਤੇ ਉਹਨਾਂ ਨੂੰ ਮਰੀਜ਼ਾਂ ਦੀ ਜਾਣਕਾਰੀ ਗੁਪਤ ਰੱਖਣੀ ਪੈਂਦੀ ਹੈ।
ਬੀ.ਸੀ. ਵਿੱਚ, ਫ਼ਾਰਮੇਸੀ ਟੈਕਨੀਸ਼ੀਅਨ ਵਜੋਂ ਕੰਮ ਕਰਨ ਲਈ ਤੁਹਾਡੇ ਕੋਲ College of Pharmacists of BC (ਬੀ.ਸੀ. ਵਿੱਚ ਫ਼ਾਰਮਾਸਿਸਟਾਂ ਅਤੇ ਫ਼ਾਰਮੇਸੀ ਟੈਕਨੀਸ਼ੀਅਨਾਂ ਨੂੰ ਲਾਇਸੈਂਸ ਦੇਣ ਵਾਲੀ ਸਰਕਾਰੀ ਸੰਸਥਾ) ਦਾ ਲਾਇਸੈਂਸ ਹੋਣਾ ਚਾਹੀਦਾ ਹੈ।

ਇਸ ਲਈ ਤੁਸੀਂ ਬਿਨਾਂ ਤਜਰਬੇ ਦੇ ਅਸਿਸਟੈਂਟ ਵਜੋਂ ਸ਼ੁਰੂ ਕਰ ਸਕਦੇ ਹੋ। ਬਾਅਦ ਵਿੱਚ ਟੈਕਨੀਸ਼ੀਅਨ ਬਣਨ ਲਈ ਮਾਨਤਾ ਪ੍ਰਾਪਤ (accredited) ਟ੍ਰੇਨਿੰਗ ਅਤੇ ਰਜਿਸਟ੍ਰੇਸ਼ਨ ਚਾਹੀਦੀ ਹੈ।

ਗਰੋਸਰੀ ਅਤੇ ਫ਼ਾਰਮੇਸੀ ਚੇਨਾਂ ਭਰਤੀ ਕਿਵੇਂ ਕਰਦੀਆਂ ਹਨ

ਹਰ ਕੰਪਨੀ ਵੱਖਰੀ ਹੁੰਦੀ ਹੈ, ਪਰ ਆਮ ਤੌਰ 'ਤੇ ਤੁਸੀਂ ਇਹ ਦੇਖੋਗੇ:

ਆਨਲਾਈਨ ਅਰਜ਼ੀਆਂ। ਵੱਡੀਆਂ ਚੇਨਾਂ ਆਪਣੀਆਂ ਕਰੀਅਰ ਵੈੱਬਸਾਈਟਾਂ 'ਤੇ ਨੌਕਰੀਆਂ ਪਾਉਂਦੀਆਂ ਹਨ। ਤੁਸੀਂ ਸਟੋਰ ਚੁਣਦੇ ਹੋ, ਆਪਣਾ ਰਿਜ਼ਿਊਮੇ ਅੱਪਲੋਡ ਕਰਦੇ ਹੋ, ਅਤੇ ਆਪਣੀ ਅਵੇਲੇਬਿਲਿਟੀ ਬਾਰੇ ਸਵਾਲਾਂ ਦੇ ਜਵਾਬ ਦਿੰਦੇ ਹੋ। ਕੁਝ ਅਰਜ਼ੀਆਂ ਵਿੱਚ ਸਵਾਲਾਂ ਦੀ ਛੋਟੀ ਜਿਹੀ ਲਿਸਟ (questionnaire) ਵੀ ਹੁੰਦੀ ਹੈ।
ਸਟੋਰ ਪੱਧਰ 'ਤੇ ਭਰਤੀ। ਭਾਵੇਂ ਤੁਸੀਂ ਆਨਲਾਈਨ ਅਰਜ਼ੀ ਦਿਓ, ਅਕਸਰ ਸਟੋਰ ਜਾਂ ਡਿਪਾਰਟਮੈਂਟ ਮੈਨੇਜਰ ਹੀ ਇੰਟਰਵਿਊ ਲੈਂਦਾ ਹੈ ਅਤੇ ਫ਼ੈਸਲਾ ਕਰਦਾ ਹੈ। ਸ਼ਾਂਤ ਸਮੇਂ ਸਟੋਰ ਜਾ ਕੇ, ਆਪਣੀ ਜਾਣ-ਪਛਾਣ ਕਰਾ ਕੇ, ਅਤੇ ਇਹ ਪੁੱਛ ਕੇ ਕਿ ਕੀ ਉਹ ਭਰਤੀ ਕਰ ਰਹੇ ਹਨ, ਮਦਦ ਮਿਲ ਸਕਦੀ ਹੈ।
ਰਸ਼ ਵਾਲੇ ਸੀਜ਼ਨ। ਸਟੋਰ ਦਸੰਬਰ ਦੀਆਂ ਛੁੱਟੀਆਂ ਵਰਗੇ ਰਸ਼ ਵਾਲੇ ਸਮਿਆਂ ਤੋਂ ਪਹਿਲਾਂ ਵਾਧੂ ਲੋਕ ਰੱਖ ਸਕਦੇ ਹਨ।
ਯੂਨੀਅਨ ਵਾਲੀਆਂ ਨੌਕਰੀਆਂ। ਕੁਝ ਗਰੋਸਰੀ ਸਟੋਰਾਂ ਵਿੱਚ ਵਰਕਰ ਯੂਨੀਅਨ ਦੇ ਮੈਂਬਰ ਹੁੰਦੇ ਹਨ। ਯੂਨੀਅਨ ਵਾਲੀ ਨੌਕਰੀ ਵਿੱਚ, collective agreement (ਸਮੂਹਿਕ ਸਮਝੌਤਾ) ਨਾਮ ਦਾ ਇੱਕ ਕੰਟਰੈਕਟ ਤਨਖਾਹ ਰੇਟ, ਤਨਖਾਹ ਵਾਧੇ, ਅਤੇ ਸ਼ਿਫ਼ਟਾਂ ਵੰਡਣ ਦੇ ਤਰੀਕੇ ਵਰਗੀਆਂ ਗੱਲਾਂ ਤੈਅ ਕਰਦਾ ਹੈ। ਯੂਨੀਅਨ ਦੀ ਫ਼ੀਸ (union dues) ਆਮ ਤੌਰ 'ਤੇ ਤੁਹਾਡੀ ਤਨਖਾਹ ਵਿੱਚੋਂ ਕੱਟੀ ਜਾਂਦੀ ਹੈ। ਤੁਸੀਂ ਇੰਟਰਵਿਊ ਵਿੱਚ ਪੁੱਛ ਸਕਦੇ ਹੋ ਕਿ ਕੀ ਇਹ ਯੂਨੀਅਨ ਵਾਲੀ ਨੌਕਰੀ ਹੈ, ਤਾਂ ਜੋ ਤੁਸੀਂ ਸਮਝ ਸਕੋ ਕਿ ਘੰਟੇ ਅਤੇ ਤਨਖਾਹ ਵਾਧੇ ਕਿਵੇਂ ਚੱਲਦੇ ਹਨ।

ਨੌਕਰੀ ਮਿਲਣ ਵਿੱਚ ਕੀ ਮਦਦ ਕਰਦਾ ਹੈ

ਖੁੱਲ੍ਹੀ ਅਵੇਲੇਬਿਲਿਟੀ। ਸ਼ਾਮਾਂ, ਵੀਕਐਂਡ, ਅਤੇ ਛੁੱਟੀਆਂ ਵਾਲੇ ਦਿਨ ਸਟੋਰਾਂ ਨੂੰ ਸਭ ਤੋਂ ਵੱਧ ਮਦਦ ਚਾਹੀਦੀ ਹੁੰਦੀ ਹੈ। ਜਿੰਨੀਆਂ ਜ਼ਿਆਦਾ ਅਜਿਹੀਆਂ ਸ਼ਿਫ਼ਟਾਂ ਤੁਸੀਂ ਕਰ ਸਕੋ, ਤੁਹਾਡੇ ਮੌਕੇ ਓਨੇ ਹੀ ਵਧੀਆ ਹਨ।
ਮਿਲਣਸਾਰ ਸੁਭਾਅ। ਮੁਸਕਰਾਓ, ਅੱਖਾਂ ਮਿਲਾ ਕੇ ਗੱਲ ਕਰੋ, ਅਤੇ ਸਬਰ ਰੱਖੋ। ਮੈਨੇਜਰ ਤੁਹਾਨੂੰ ਕੈਸ਼ ਰਜਿਸਟਰ ਚਲਾਉਣਾ ਸਿਖਾ ਸਕਦਾ ਹੈ। ਚੰਗਾ ਸੁਭਾਅ ਸਿਖਾਉਣਾ ਔਖਾ ਹੈ।
ਭਰੋਸੇਯੋਗਤਾ। ਹਰ ਸ਼ਿਫ਼ਟ 'ਤੇ ਸਮੇਂ ਸਿਰ ਆਓ। ਜੇ ਤੁਸੀਂ ਬਿਮਾਰ ਹੋ, ਤਾਂ ਜਿੰਨੀ ਛੇਤੀ ਹੋ ਸਕੇ ਆਪਣੇ ਮੈਨੇਜਰ ਨੂੰ ਦੱਸੋ।
ਭਾਸ਼ਾਵਾਂ। ਮੈਟਰੋ ਵੈਨਕੂਵਰ ਅਤੇ ਗ੍ਰੇਟਰ ਟੋਰਾਂਟੋ ਏਰੀਆ ਵਿੱਚ ਬਹੁਤ ਸਾਰੇ ਗਾਹਕ ਅੰਗਰੇਜ਼ੀ ਤੋਂ ਇਲਾਵਾ ਹੋਰ ਭਾਸ਼ਾਵਾਂ ਬੋਲਦੇ ਹਨ। ਆਪਣੇ ਰਿਜ਼ਿਊਮੇ 'ਤੇ ਹਰ ਉਹ ਭਾਸ਼ਾ ਲਿਖੋ ਜੋ ਤੁਸੀਂ ਬੋਲਦੇ ਹੋ।
ਸਰੀਰਕ ਕੰਮ ਦੀ ਆਦਤ। ਇਹਨਾਂ ਵਿੱਚੋਂ ਬਹੁਤ ਸਾਰੀਆਂ ਨੌਕਰੀਆਂ ਵਿੱਚ ਘੰਟਿਆਂ ਬੱਧੀ ਖੜ੍ਹੇ ਰਹਿਣਾ ਅਤੇ ਡੱਬੇ ਚੁੱਕਣੇ ਪੈਂਦੇ ਹਨ। ਇਮਾਨਦਾਰੀ ਨਾਲ ਦੱਸੋ ਕਿ ਤੁਸੀਂ ਕੀ ਕਰ ਸਕਦੇ ਹੋ।
ਬਾਰੀਕੀ ਵੱਲ ਧਿਆਨ। ਭਾਨ ਗਿਣਨਾ, ਕੀਮਤਾਂ ਚੈੱਕ ਕਰਨਾ, ਅਤੇ best-before ਤਰੀਕਾਂ (ਪੈਕਟ 'ਤੇ ਲਿਖੀ ਤਰੀਕ, ਜਦੋਂ ਤੱਕ ਬੰਦ ਪੈਕਟ ਵਾਲਾ ਸਮਾਨ ਸਭ ਤੋਂ ਤਾਜ਼ਾ ਰਹਿੰਦਾ ਹੈ) ਪੜ੍ਹਨਾ, ਸਭ ਜ਼ਰੂਰੀ ਹਨ।

ਉਮਰ ਦੇ ਨਿਯਮ ਜੋ ਜਾਣਨੇ ਜ਼ਰੂਰੀ ਹਨ

ਬੀ.ਸੀ. ਕੰਮ ਕਰਨ ਦੀ ਆਮ ਉਮਰ 16 ਸਾਲ ਹੈ। ਜੇ ਤੁਸੀਂ 14 ਜਾਂ 15 ਸਾਲ ਦੇ ਹੋ, ਤਾਂ ਮਾਪਿਆਂ ਜਾਂ ਸਰਪ੍ਰਸਤ ਦੀ ਲਿਖਤੀ ਇਜਾਜ਼ਤ ਨਾਲ ਤੁਸੀਂ "ਹਲਕਾ ਕੰਮ" (light work) ਕਰ ਸਕਦੇ ਹੋ (ਨੌਜਵਾਨਾਂ ਨੂੰ ਨੌਕਰੀ 'ਤੇ ਰੱਖਣਾ)। ਬੀ.ਸੀ. ਦੀ ਹਲਕੇ ਕੰਮ ਦੀ ਲਿਸਟ ਵਿੱਚ ਕੈਸ਼ੀਅਰ, ਸ਼ੈਲਫ਼ਾਂ ਭਰਨਾ, ਗਾਹਕਾਂ ਦਾ ਸਮਾਨ ਥੈਲਿਆਂ ਵਿੱਚ ਪਾਉਣਾ, ਅਤੇ ਕੀਮਤਾਂ ਲਾਉਣਾ ਸ਼ਾਮਲ ਹਨ। ਇਸ ਵਿੱਚ ਅਜਿਹੀ ਮਸ਼ੀਨਰੀ ਚਲਾਉਣਾ ਸ਼ਾਮਲ ਨਹੀਂ ਜਿਸ ਨਾਲ ਤੁਹਾਨੂੰ ਨੁਕਸਾਨ ਹੋ ਸਕਦਾ ਹੈ, ਜਾਂ ਅਜਿਹਾ ਭਾਰ ਚੁੱਕਣਾ ਜਿਸ ਨਾਲ ਸੱਟ ਲੱਗਣ ਦਾ ਖ਼ਤਰਾ ਹੋਵੇ।

ਓਨਟਾਰੀਓ। ਸਟੋਰਾਂ ਵਿੱਚ ਕੰਮ ਲਈ ਘੱਟੋ-ਘੱਟ ਉਮਰ 14 ਸਾਲ ਹੈ। ਗਰੋਸਰੀ ਸਟੋਰਾਂ ਵਿੱਚ ਫਲ-ਸਬਜ਼ੀਆਂ ਅਤੇ ਮੀਟ ਦੀ ਤਿਆਰੀ ਲਈ ਇਹ 15 ਸਾਲ ਹੈ।

ਜੇ ਸਟੋਰ ਸ਼ਰਾਬ ਵੇਚਦਾ ਹੈ

ਕੁਝ ਗਰੋਸਰੀ ਸਟੋਰ ਵਾਈਨ, ਬੀਅਰ, ਜਾਂ ਹੋਰ ਸ਼ਰਾਬ ਵੇਚਦੇ ਹਨ। ਇਹ ਵੇਚਣ ਵਾਲੇ ਸਟਾਫ਼ 'ਤੇ ਵਾਧੂ ਨਿਯਮ ਲਾਗੂ ਹੁੰਦੇ ਹਨ।

ਬੀ.ਸੀ.: ਸ਼ੈਲਫ਼ਾਂ 'ਤੇ ਵਾਈਨ ਵੇਚਣ ਵਾਲੇ ਗਰੋਸਰੀ ਸਟੋਰਾਂ ਵਿੱਚ, ਵਿਕਰੀ ਕਰਨ ਵਾਲੇ ਵਿਅਕਤੀ ਕੋਲ Serving It Right (ਬੀ.ਸੀ. ਦਾ ਸ਼ਰਾਬ ਪਰੋਸਣ ਦਾ ਕੋਰਸ) ਸਰਟੀਫ਼ਿਕੇਟ ਹੋਣਾ ਚਾਹੀਦਾ ਹੈ ਅਤੇ ਉਸਦੀ ਉਮਰ ਘੱਟੋ-ਘੱਟ 19 ਸਾਲ ਹੋਣੀ ਚਾਹੀਦੀ ਹੈ (Serving It Right ਕਿਸਨੂੰ ਚਾਹੀਦਾ ਹੈ?)। ਹੋਰ ਜਾਣਕਾਰੀ ਸਾਡੀ ਬੀ.ਸੀ. ਵਿੱਚ FOODSAFE ਅਤੇ Serving It Right ਗਾਈਡ ਵਿੱਚ ਹੈ।
ਓਨਟਾਰੀਓ: ਗਰੋਸਰੀ ਅਤੇ ਕਨਵੀਨੀਅੰਸ ਸਟੋਰਾਂ ਵਿੱਚ ਸ਼ਰਾਬ ਵੇਚਣ ਵਾਲੇ ਸਟਾਫ਼ ਦੀ ਉਮਰ 18 ਸਾਲ ਜਾਂ ਵੱਧ ਹੋਣੀ ਚਾਹੀਦੀ ਹੈ, ਅਤੇ ਕੋਈ ਵੀ ਸ਼ਰਾਬ ਵੇਚਣ ਤੋਂ ਪਹਿਲਾਂ ਉਹਨਾਂ ਨੂੰ ਕੋਈ ਮਨਜ਼ੂਰਸ਼ੁਦਾ ਟ੍ਰੇਨਿੰਗ ਪ੍ਰੋਗਰਾਮ ਪੂਰਾ ਕਰਨਾ ਪੈਂਦਾ ਹੈ (AGCO)। ਸਾਡੀ ਓਨਟਾਰੀਓ ਸਰਟੀਫ਼ਿਕੇਟਾਂ ਵਾਲੀ ਗਾਈਡ ਵਿਕਲਪਾਂ ਬਾਰੇ ਦੱਸਦੀ ਹੈ।

ਤੁਹਾਡੇ ਪਹਿਲੇ ਹਫ਼ਤੇ

ਨਵੀਂ ਨੌਕਰੀ ਸ਼ੁਰੂ ਕਰਨਾ ਭਾਰੀ ਲੱਗ ਸਕਦਾ ਹੈ। ਇਹ ਆਮ ਗੱਲ ਹੈ। ਕੁਝ ਸੁਝਾਅ:

ਸਵਾਲ ਪੁੱਛੋ। ਕੋਈ ਵੀ ਤੁਹਾਡੇ ਤੋਂ ਪਹਿਲੇ ਹਫ਼ਤੇ ਹੀ ਸਭ ਕੁਝ ਜਾਣਨ ਦੀ ਉਮੀਦ ਨਹੀਂ ਰੱਖਦਾ।
ਕੋਡ, ਕੰਮ ਦੇ ਤਰੀਕੇ, ਅਤੇ ਨਾਮ ਇੱਕ ਛੋਟੀ ਨੋਟਬੁੱਕ ਵਿੱਚ ਲਿਖ ਲਓ।
ਆਪਣਾ ਕੈਸ਼ ਡਰਾਅਰ ਧਿਆਨ ਨਾਲ ਗਿਣੋ, ਅਤੇ ਰਿਫ਼ੰਡ ਅਤੇ ਵੌਇਡ (voids) ਲਈ ਸਟੋਰ ਦੇ ਦੱਸੇ ਕਦਮਾਂ ਦੀ ਪਾਲਣਾ ਕਰੋ।
ਜੇ ਕੋਈ ਗਾਹਕ ਅਜਿਹੀ ਗੱਲ ਪੁੱਛੇ ਜੋ ਤੁਹਾਨੂੰ ਨਹੀਂ ਪਤਾ, ਤਾਂ ਕਹੋ, "ਮੈਂ ਤੁਹਾਡੇ ਲਈ ਪਤਾ ਕਰਦਾ/ਕਰਦੀ ਹਾਂ," ਅਤੇ ਕਿਸੇ ਸਾਥੀ ਤੋਂ ਪੁੱਛੋ।

ਅਗਲੇ ਕਦਮ

ਮੈਟਰੋ ਵੈਨਕੂਵਰ ਅਤੇ GTA ਵਿੱਚ ਗਰੋਸਰੀ ਦੀਆਂ ਨੌਕਰੀਆਂ
ਮੈਟਰੋ ਵੈਨਕੂਵਰ ਅਤੇ GTA ਵਿੱਚ ਕੈਸ਼ੀਅਰ ਦੀਆਂ ਨੌਕਰੀਆਂ
ਮੈਟਰੋ ਵੈਨਕੂਵਰ ਅਤੇ GTA ਵਿੱਚ ਫ਼ਾਰਮੇਸੀ ਅਤੇ ਬਿਊਟੀ ਦੀਆਂ ਨੌਕਰੀਆਂ
ਤੁਹਾਡੀ ਪਹਿਲੀ ਨੌਕਰੀ ਦੀ ਇੰਟਰਵਿਊ ਨਾਲ ਤਿਆਰੀ ਕਰੋ