16 ਤੋਂ ਘੱਟ ਉਮਰ ਵਿੱਚ ਵਾਲੰਟੀਅਰ ਕੰਮ: ਬੀ.ਸੀ. ਅਤੇ ਓਨਟਾਰੀਓ ਵਿੱਚ ਭੂਮਿਕਾਵਾਂ, ਉਮਰ ਦੀ ਹੱਦ ਅਤੇ ਮਾਪਿਆਂ ਦੀ ਸਹਿਮਤੀ

ਜੇ ਤੁਹਾਡੀ ਉਮਰ 12 ਤੋਂ 15 ਸਾਲ ਹੈ, ਤਾਂ ਜ਼ਿਆਦਾਤਰ ਤਨਖਾਹ ਵਾਲੀਆਂ ਨੌਕਰੀਆਂ ਅਜੇ ਤੁਹਾਡੇ ਲਈ ਬੰਦ ਹਨ, ਜਾਂ ਸਿਰਫ਼ ਕੁਝ ਪਾਬੰਦੀਆਂ ਨਾਲ ਖੁੱਲ੍ਹੀਆਂ ਹਨ। ਵਾਲੰਟੀਅਰ ਕੰਮ ਨਾਲ ਤੁਸੀਂ ਹੁਣੇ ਤੋਂ ਤਜਰਬਾ, ਹੁਨਰ, ਅਤੇ ਰੈਫ਼ਰੈਂਸ ਬਣਾਉਣੇ ਸ਼ੁਰੂ ਕਰ ਸਕਦੇ ਹੋ। ਇਹ ਗਾਈਡ ਮੈਟਰੋ ਵੈਨਕੂਵਰ ਅਤੇ ਗ੍ਰੇਟਰ ਟੋਰਾਂਟੋ ਏਰੀਆ ਦੇ ਟੀਨਏਜਰਾਂ ਲਈ, ਅਤੇ ਉਹਨਾਂ ਦੇ ਮਾਪਿਆਂ ਲਈ ਹੈ।

ਅਸੀਂ ਇਹ ਜਾਣਕਾਰੀ 13 ਅਕਤੂਬਰ 2026 ਨੂੰ ਚੈੱਕ ਕੀਤੀ ਸੀ। ਉਮਰ ਦੀਆਂ ਹੱਦਾਂ ਅਤੇ ਨਿਯਮ ਬਦਲਦੇ ਰਹਿੰਦੇ ਹਨ, ਇਸ ਲਈ ਤਾਜ਼ਾ ਵੇਰਵਿਆਂ ਲਈ ਲਿੰਕ ਦੇਖੋ।

ਤਨਖਾਹ ਵਾਲਾ ਕੰਮ ਅਤੇ ਵਾਲੰਟੀਅਰ ਕੰਮ ਇੱਕ ਨਜ਼ਰ ਵਿੱਚ

ਤਨਖਾਹ ਵਾਲੇ ਕੰਮ ਦੇ ਨਿਯਮ ਬੀ.ਸੀ. ਅਤੇ ਓਨਟਾਰੀਓ ਵਿੱਚ 15, 16 ਜਾਂ 17 ਸਾਲ ਦੀ ਉਮਰ ਵਿੱਚ ਕੰਮ ਕਰਨਾ ਵਿੱਚ ਦਿੱਤੇ ਗਏ ਹਨ (ਨੌਜਵਾਨਾਂ ਨੂੰ ਨੌਕਰੀ 'ਤੇ ਰੱਖਣਾ, ਕੰਮ ਲਈ ਘੱਟੋ-ਘੱਟ ਉਮਰ)।

16 ਸਾਲ ਤੋਂ ਪਹਿਲਾਂ ਵਾਲੰਟੀਅਰ ਕੰਮ ਕਿਉਂ ਕਰੀਏ

• ਤੁਸੀਂ ਹੁਣੇ ਸ਼ੁਰੂ ਕਰ ਸਕਦੇ ਹੋ। ਬਹੁਤ ਸਾਰੀਆਂ ਭੂਮਿਕਾਵਾਂ ਲਈ 13 ਜਾਂ 14 ਸਾਲ ਦੇ ਬੱਚੇ ਲਏ ਜਾਂਦੇ ਹਨ, ਅਤੇ ਕੁਝ ਵਿੱਚ ਇਸ ਤੋਂ ਛੋਟੇ ਬੱਚੇ ਵੀ ਲਏ ਜਾਂਦੇ ਹਨ ਜੇ ਉਹ ਮਾਪਿਆਂ ਨਾਲ ਆਉਣ।
• ਤੁਹਾਡੇ ਪਹਿਲੇ ਰਿਜ਼ਿਊਮੇ ਲਈ ਕੁਝ ਅਸਲੀ। ਖਾਣਾ ਛਾਂਟਣਾ, ਕਿਸੇ ਡੇਅ ਕੈਂਪ ਵਿੱਚ ਮਦਦ ਕਰਨਾ, ਜਾਂ ਲਾਇਬ੍ਰੇਰੀ ਦੇ ਕਿਸੇ ਸਮਾਗਮ ਦੀ ਤਿਆਰੀ ਕਰਨਾ, ਇਹਨਾਂ ਸਭ ਵਿੱਚ ਉਹੀ ਹੁਨਰ ਵਰਤੇ ਜਾਂਦੇ ਹਨ ਜੋ ਸਟੋਰ ਅਤੇ ਕੈਫ਼ੇ ਲੱਭਦੇ ਹਨ।
• ਪਹਿਲਾ ਰੈਫ਼ਰੈਂਸ। ਜਿਸ ਸੁਪਰਵਾਈਜ਼ਰ ਨੇ ਤੁਹਾਨੂੰ ਹਰ ਹਫ਼ਤੇ ਆਉਂਦੇ ਦੇਖਿਆ ਹੈ, ਉਹ ਤੁਹਾਡੇ ਬਾਰੇ ਭਰੋਸੇ ਨਾਲ ਦੱਸ ਸਕਦਾ ਹੈ ਜਦੋਂ ਤੁਸੀਂ ਆਪਣੀ ਪਹਿਲੀ ਨੌਕਰੀ ਲਈ ਅਰਜ਼ੀ ਦਿੰਦੇ ਹੋ।

ਕੀ ਵਾਲੰਟੀਅਰ ਕੰਮ ਲਈ ਕੋਈ ਘੱਟੋ-ਘੱਟ ਉਮਰ ਹੈ?

ਓਨਟਾਰੀਓ

ਓਨਟਾਰੀਓ ਦਾ ਵਾਲੰਟੀਅਰ ਕੰਮ ਬਾਰੇ ਪੰਨਾ ਕੋਈ ਇੱਕ ਘੱਟੋ-ਘੱਟ ਉਮਰ ਤੈਅ ਨਹੀਂ ਕਰਦਾ। ਇਹ ਕਹਿੰਦਾ ਹੈ ਕਿ ਚੈੱਕ ਕਰੋ ਕਿ ਤੁਹਾਡੀ ਗਤੀਵਿਧੀ 'ਤੇ ਉਮਰ ਦੀ ਕੋਈ ਪਾਬੰਦੀ ਹੈ ਜਾਂ ਨਹੀਂ (ਓਨਟਾਰੀਓ ਵਿੱਚ ਵਾਲੰਟੀਅਰ ਕੰਮ)।

ਪਰ ਕੰਮ ਵਾਲੀਆਂ ਥਾਵਾਂ ਦੀਆਂ ਘੱਟੋ-ਘੱਟ ਉਮਰਾਂ ਵਾਲੰਟੀਅਰਾਂ 'ਤੇ ਵੀ ਲਾਗੂ ਹੁੰਦੀਆਂ ਹਨ। ਓਨਟਾਰੀਓ ਕਹਿੰਦਾ ਹੈ ਕਿ ਤੁਸੀਂ ਇਹਨਾਂ ਹਾਲਤਾਂ ਵਿੱਚ ਵਾਲੰਟੀਅਰ ਕੰਮ ਨਹੀਂ ਕਰ ਸਕਦੇ (ਵਾਲੰਟੀਅਰਾਂ ਲਈ ਸਿਹਤ ਅਤੇ ਸੁਰੱਖਿਆ):

• 14 ਸਾਲ ਤੋਂ ਘੱਟ ਉਮਰ ਵਿੱਚ ਸਟੋਰਾਂ, ਦਫ਼ਤਰਾਂ, ਅਰੀਨਿਆਂ (arenas), ਅਤੇ ਹੋਰ ਕੰਮ ਵਾਲੀਆਂ ਥਾਵਾਂ 'ਤੇ ਜਿਨ੍ਹਾਂ ਨੂੰ ਓਨਟਾਰੀਓ "ਸਨਅਤੀ" (industrial) ਕਹਿੰਦਾ ਹੈ
• 15 ਸਾਲ ਤੋਂ ਘੱਟ ਉਮਰ ਵਿੱਚ ਕਿਸੇ ਫ਼ੈਕਟਰੀ ਜਾਂ ਰੈਸਟੋਰੈਂਟ ਦੀ ਰਸੋਈ ਵਿੱਚ। ਓਨਟਾਰੀਓ ਵੇਅਰਹਾਊਸਾਂ ਨੂੰ, ਅਤੇ ਗਰੋਸਰੀ ਸਟੋਰਾਂ ਦੇ ਸਮਾਨ ਭੇਜਣ ਅਤੇ ਲੈਣ (shipping and receiving) ਵਾਲੇ ਜਾਂ ਫਲ-ਸਬਜ਼ੀਆਂ ਅਤੇ ਮੀਟ ਤਿਆਰ ਕਰਨ ਵਾਲੇ ਹਿੱਸਿਆਂ ਨੂੰ, ਫ਼ੈਕਟਰੀਆਂ ਵਿੱਚ ਗਿਣਦਾ ਹੈ (ਕੰਮ ਲਈ ਘੱਟੋ-ਘੱਟ ਉਮਰ)।
• 16 ਸਾਲ ਤੋਂ ਘੱਟ ਉਮਰ ਵਿੱਚ ਕਿਸੇ ਉਸਾਰੀ ਪ੍ਰੋਜੈਕਟ (construction project) 'ਤੇ ਜਾਂ ਜੰਗਲ ਵਿੱਚ ਦਰਖ਼ਤ ਕੱਟਣ ਦੇ ਕੰਮ (logging operation) 'ਤੇ

ਫ਼ੈਕਟਰੀਆਂ, ਸਟੋਰਾਂ, ਦਫ਼ਤਰਾਂ, ਅਤੇ ਇਹੋ ਜਿਹੀਆਂ ਕੰਮ ਵਾਲੀਆਂ ਥਾਵਾਂ ਲਈ, ਇਹਨਾਂ ਉਮਰਾਂ ਪਿੱਛੇ ਵਾਲਾ ਨਿਯਮ (regulation) ਹਰ ਉਸ ਵਿਅਕਤੀ 'ਤੇ ਲਾਗੂ ਹੁੰਦਾ ਹੈ ਜਿਸਨੂੰ ਕੰਮ ਵਾਲੀ ਥਾਂ ਵਿੱਚ ਆਉਣ ਦੀ ਇਜਾਜ਼ਤ ਹੈ, ਸਿਰਫ਼ ਵਰਕਰਾਂ 'ਤੇ ਨਹੀਂ। ਜੋ ਲੋਕ ਵਰਕਰ ਨਹੀਂ ਹਨ, ਉਹਨਾਂ ਲਈ ਇਹ ਉਮਰਾਂ ਉਦੋਂ ਲਾਗੂ ਨਹੀਂ ਹੁੰਦੀਆਂ ਜਦੋਂ ਤੁਸੀਂ ਕਿਸੇ ਬਾਲਗ਼ ਦੇ ਨਾਲ ਹੋਵੋ, ਗਾਈਡ ਵਾਲੇ ਟੂਰ (guided tour) 'ਤੇ ਹੋਵੋ, ਜਾਂ ਵਿਕਰੀ ਵਾਲੀ ਥਾਂ (sales area) ਜਾਂ ਜਨਤਾ ਲਈ ਖੁੱਲ੍ਹੀ ਕਿਸੇ ਹੋਰ ਥਾਂ 'ਤੇ ਹੋਵੋ (Reg. 851, s. 4)। ਇਸ ਲਈ ਜੇ ਕੋਈ ਭੂਮਿਕਾ ਤੁਹਾਨੂੰ ਕਿਸੇ ਬਾਲਗ਼ ਤੋਂ ਬਿਨਾਂ ਵੇਅਰਹਾਊਸ ਜਾਂ ਰਸੋਈ ਵਿੱਚ ਪਰਦੇ ਪਿੱਛੇ (behind the scenes) ਕੰਮ 'ਤੇ ਲਾਉਂਦੀ ਹੈ, ਤਾਂ ਨਾਂ ਲਿਖਵਾਉਣ ਤੋਂ ਪਹਿਲਾਂ ਉਮਰ ਚੈੱਕ ਕਰੋ।

ਬੀ.ਸੀ.

ਬੀ.ਸੀ. ਵਿੱਚ ਬੱਚਿਆਂ ਬਾਰੇ ਨਿਯਮ ਤਨਖਾਹ ਵਾਲੇ ਕੰਮ ਲਈ ਲਿਖੇ ਗਏ ਹਨ: ਮਾਪਿਆਂ ਦੀ ਲਿਖਤੀ ਇਜਾਜ਼ਤ, ਅਤੇ ਪਰਮਿਟ, ਜੋ 14 ਸਾਲ ਤੋਂ ਘੱਟ ਉਮਰ ਦੇ ਬੱਚਿਆਂ ਲਈ ਅਤੇ 14 ਅਤੇ 15 ਸਾਲ ਦੀ ਉਮਰ ਵਿੱਚ "ਹਲਕੇ ਕੰਮ" (light work) ਤੋਂ ਵੱਧ ਕਿਸੇ ਵੀ ਕੰਮ ਲਈ ਚਾਹੀਦੇ ਹਨ। ਨੌਜਵਾਨਾਂ ਨੂੰ ਨੌਕਰੀ 'ਤੇ ਰੱਖਣ ਬਾਰੇ ਸਰਕਾਰ ਦੇ ਪੰਨੇ 'ਤੇ ਵਾਲੰਟੀਅਰਾਂ ਦਾ ਕੋਈ ਜ਼ਿਕਰ ਨਹੀਂ ਹੈ (ਨੌਜਵਾਨਾਂ ਨੂੰ ਨੌਕਰੀ 'ਤੇ ਰੱਖਣਾ)। ਸਾਨੂੰ ਬੀ.ਸੀ. ਦਾ ਕੋਈ ਅਜਿਹਾ ਕਾਨੂੰਨ ਨਹੀਂ ਮਿਲਿਆ ਜੋ ਵਾਲੰਟੀਅਰ ਕੰਮ ਲਈ ਘੱਟੋ-ਘੱਟ ਉਮਰ ਤੈਅ ਕਰਦਾ ਹੋਵੇ, ਇਸ ਲਈ ਹਰ ਸੰਸਥਾ ਆਪਣੀ ਉਮਰ ਆਪ ਤੈਅ ਕਰਦੀ ਹੈ।

ਵਾਲੰਟੀਅਰ ਕੰਮ ਚੈਰਿਟੀਆਂ ਲਈ ਹੁੰਦਾ ਹੈ, ਕਾਰੋਬਾਰਾਂ ਲਈ ਨਹੀਂ

ਅਸਲੀ ਵਾਲੰਟੀਅਰ ਕੰਮ ਕਿਸੇ ਚੈਰਿਟੀ, ਗ਼ੈਰ-ਮੁਨਾਫ਼ਾ ਸੰਸਥਾ (non-profit), ਜਾਂ ਸ਼ਹਿਰ ਜਾਂ ਲਾਇਬ੍ਰੇਰੀ ਵਰਗੀ ਜਨਤਕ ਸੰਸਥਾ ਲਈ ਹੁੰਦਾ ਹੈ। ਜੇ ਕੋਈ ਕਾਰੋਬਾਰ ਤੁਹਾਨੂੰ ਮੁਫ਼ਤ ਕੰਮ ਕਰਨ ਲਈ ਕਹਿੰਦਾ ਹੈ, ਤਾਂ ਇਹ ਵੱਖਰੀ ਗੱਲ ਹੈ। ਪੜ੍ਹੋ ਬਿਨਾਂ ਤਨਖਾਹ ਇੰਟਰਨਸ਼ਿਪਾਂ, ਟਰਾਇਲ ਸ਼ਿਫ਼ਟਾਂ, ਅਤੇ ਕਿਸੇ ਕਾਰੋਬਾਰ ਲਈ "ਵਾਲੰਟੀਅਰ" ਕੰਮ।

ਹਰ ਉਮਰ ਵਿੱਚ ਕਿਹੜੇ ਮੌਕੇ ਹਨ

ਇਹ ਕੁਝ ਮਿਸਾਲਾਂ ਹਨ। ਹਰ ਸੰਸਥਾ ਆਪਣੇ ਨਿਯਮ ਆਪ ਬਣਾਉਂਦੀ ਹੈ ਅਤੇ ਉਹਨਾਂ ਨੂੰ ਬਦਲ ਸਕਦੀ ਹੈ, ਇਸ ਲਈ ਅਰਜ਼ੀ ਦੇਣ ਤੋਂ ਪਹਿਲਾਂ ਉਸਦਾ ਪੰਨਾ ਚੈੱਕ ਕਰੋ। ਹੋਰ ਥਾਵਾਂ ਲਈ, ਮੈਟਰੋ ਵੈਨਕੂਵਰ ਅਤੇ ਗ੍ਰੇਟਰ ਟੋਰਾਂਟੋ ਏਰੀਆ ਲਈ ਸਾਡੀਆਂ ਵਾਲੰਟੀਅਰ ਲਿਸਟਾਂ ਦੇਖੋ।

14 ਸਾਲ ਤੋਂ ਘੱਟ, ਮਾਪਿਆਂ ਜਾਂ ਕਿਸੇ ਹੋਰ ਬਾਲਗ਼ ਨਾਲ

• Food Banks Mississauga (ਫ਼ੂਡ ਬੈਂਕਸ ਮਿਸੀਸਾਗਾ) ਕਹਿੰਦਾ ਹੈ ਕਿ ਇਹ ਕਿਸੇ ਬਾਲਗ਼ ਦੇ ਨਾਲ ਆਏ 9 ਸਾਲ ਜਿੰਨੀ ਛੋਟੀ ਉਮਰ ਦੇ ਵਾਲੰਟੀਅਰਾਂ ਦਾ ਵੀ ਸਵਾਗਤ ਕਰਦਾ ਹੈ, ਅਤੇ ਇਕੱਲੇ ਵਾਲੰਟੀਅਰ ਕੰਮ ਕਰਨ ਲਈ ਘੱਟੋ-ਘੱਟ ਉਮਰ 14 ਸਾਲ ਹੈ (Food Banks Mississauga)।
• Daily Bread Food Bank (ਡੇਲੀ ਬ੍ਰੈੱਡ ਫ਼ੂਡ ਬੈਂਕ), ਟੋਰਾਂਟੋ, ਕਹਿੰਦਾ ਹੈ ਕਿ ਵਾਲੰਟੀਅਰ ਕੰਮ ਲਈ ਇਸਦੀ ਘੱਟੋ-ਘੱਟ ਉਮਰ ਆਮ ਤੌਰ 'ਤੇ 18 ਸਾਲ ਹੈ। ਇਹ ਸਾਲ ਵਿੱਚ ਕੁਝ ਵਾਰ ਆਮ ਲੋਕਾਂ ਲਈ ਖਾਣਾ ਛਾਂਟਣ ਦੇ ਸਮਾਗਮ (public food sorts) ਵੀ ਕਰਦਾ ਹੈ, ਜਿੱਥੇ 11 ਤੋਂ 14 ਸਾਲ ਦੀ ਉਮਰ ਵਾਲਿਆਂ ਨੂੰ ਮਾਪਿਆਂ ਜਾਂ ਸਰਪ੍ਰਸਤ ਨਾਲ ਆਉਣਾ ਲਾਜ਼ਮੀ ਹੈ (Daily Bread)।
• Food for Life (ਫ਼ੂਡ ਫ਼ਾਰ ਲਾਈਫ਼), ਬਰਲਿੰਗਟਨ, ਕਹਿੰਦਾ ਹੈ ਕਿ 12 ਅਤੇ 13 ਸਾਲ ਦੇ ਬੱਚੇ ਇਸਦੇ ਪੈਕ ਰੂਮ (pack room) ਵਿੱਚ ਕੰਮ ਕਰ ਸਕਦੇ ਹਨ ਜੇ ਕੋਈ ਬਾਲਗ਼ ਵੀ ਉਸੇ ਸ਼ਿਫ਼ਟ ਲਈ ਨਾਂ ਲਿਖਵਾਏ। 14 ਸਾਲ ਦੀ ਉਮਰ ਵਿੱਚ, ਤੁਸੀਂ ਇਕੱਲੇ ਵਾਲੰਟੀਅਰ ਕੰਮ ਕਰ ਸਕਦੇ ਹੋ (Food for Life)।
• BC SPCA (ਬੀ.ਸੀ. ਐੱਸ.ਪੀ.ਸੀ.ਏ.) ਕਹਿੰਦਾ ਹੈ ਕਿ ਇਸ ਕੋਲ 12 ਸਾਲ ਤੋਂ ਘੱਟ ਉਮਰ ਦੇ ਬੱਚਿਆਂ ਲਈ ਕੋਈ ਵਾਲੰਟੀਅਰ ਭੂਮਿਕਾ ਨਹੀਂ ਹੈ। 12 ਤੋਂ 15 ਸਾਲ ਦੇ ਬੱਚੇ ਸਿਰਫ਼ ਅਜਿਹੇ ਮਾਪਿਆਂ ਜਾਂ ਸਰਪ੍ਰਸਤ ਨਾਲ ਹੀ ਵਾਲੰਟੀਅਰ ਕੰਮ ਕਰ ਸਕਦੇ ਹਨ ਜਿਨ੍ਹਾਂ ਦੀ ਉਮਰ 19 ਸਾਲ ਜਾਂ ਵੱਧ ਹੋਵੇ, ਅਤੇ ਕੁਝ ਲੋਕੇਸ਼ਨਾਂ ਜਾਂ ਪ੍ਰੋਗਰਾਮ 16 ਸਾਲ ਤੋਂ ਘੱਟ ਉਮਰ ਦੇ ਵਾਲੰਟੀਅਰ ਨਹੀਂ ਲੈਂਦੇ (BC SPCA)।
• Stanley Park Ecology Society (ਸਟੈਨਲੀ ਪਾਰਕ ਇਕੌਲੋਜੀ ਸੋਸਾਇਟੀ), ਵੈਨਕੂਵਰ, ਕਹਿੰਦੀ ਹੈ ਕਿ 12 ਤੋਂ 16 ਸਾਲ ਦੇ ਬੱਚੇ ਸਿਰਫ਼ ਇਸਦੇ EcoStewards (ਈਕੋਸਟੂਅਰਡਜ਼) ਵਿੱਚ ਸ਼ਾਮਲ ਹੋ ਸਕਦੇ ਹਨ, ਪੂਰਾ ਸਮਾਂ ਕਿਸੇ ਬਾਲਗ਼ ਦੀ ਨਿਗਰਾਨੀ ਹੇਠ, ਅਤੇ ਮਾਪਿਆਂ ਜਾਂ ਸਰਪ੍ਰਸਤ ਵੱਲੋਂ ਦਸਤਖ਼ਤ ਕੀਤੇ ਨੌਜਵਾਨਾਂ ਵਾਲੇ ਸਹਿਮਤੀ ਫ਼ਾਰਮ (youth consent form) ਨਾਲ (Stanley Park Ecology Society)।

12 ਅਤੇ 13 ਸਾਲ

• North Shore Community Resources (ਨੌਰਥ ਸ਼ੋਰ ਕਮਿਊਨਿਟੀ ਰਿਸੋਰਸਿਜ਼) ਕਹਿੰਦਾ ਹੈ ਕਿ ਇਸਦੀ Youth Volunteer Directory (ਨੌਜਵਾਨਾਂ ਲਈ ਵਾਲੰਟੀਅਰ ਮੌਕਿਆਂ ਦੀ ਲਿਸਟ) 12 ਤੋਂ 19 ਸਾਲ ਦੀ ਉਮਰ ਲਈ ਹੈ। ਇਹ ਮੁਫ਼ਤ ਹੈ, ਤੁਹਾਨੂੰ ਤਜਰਬੇ ਦੀ ਲੋੜ ਨਹੀਂ, ਅਤੇ ਬਹੁਤ ਸਾਰੀਆਂ ਭੂਮਿਕਾਵਾਂ ਦੇ ਘੰਟੇ ਲਚਕਦਾਰ ਹੁੰਦੇ ਹਨ ਜਾਂ ਸਮਾਗਮਾਂ ਮੁਤਾਬਕ ਹੁੰਦੇ ਹਨ (North Shore Community Resources)।
• City of Surrey (ਸਰੀ ਸ਼ਹਿਰ) ਕਹਿੰਦਾ ਹੈ ਕਿ ਇਸਦਾ Youth Stewardship Squad (ਯੂਥ ਸਟੂਅਰਡਸ਼ਿਪ ਸਕੁਐਡ) ਸਰੀ ਦੇ ਪਾਰਕਾਂ ਵਿੱਚ ਦਰਖ਼ਤ ਅਤੇ ਝਾੜੀਆਂ ਲਾਉਣ, ਬਾਹਰਲੇ ਨੁਕਸਾਨਦੇਹ ਪੌਦੇ (invasive plants) ਪੁੱਟਣ, ਅਤੇ ਕੂੜਾ ਚੁੱਕਣ ਲਈ 13 ਤੋਂ 18 ਸਾਲ ਦੇ ਨੌਜਵਾਨਾਂ ਦਾ ਸਵਾਗਤ ਕਰਦਾ ਹੈ (City of Surrey)।
• Pickering Public Library (ਪਿਕਰਿੰਗ ਪਬਲਿਕ ਲਾਇਬ੍ਰੇਰੀ) ਕਹਿੰਦੀ ਹੈ ਕਿ ਇਸਦੇ ਸਾਰੇ ਵਾਲੰਟੀਅਰਾਂ ਦੀ ਉਮਰ ਘੱਟੋ-ਘੱਟ 13 ਸਾਲ ਹੋਣੀ ਚਾਹੀਦੀ ਹੈ, ਅਤੇ ਇਸਦਾ Teen Advisory Group (ਟੀਨਏਜਰਾਂ ਦਾ ਸਲਾਹਕਾਰ ਗਰੁੱਪ) 13 ਤੋਂ 19 ਸਾਲ ਦੀ ਉਮਰ ਲਈ ਹੈ। ਇਹ ਸਿਰਫ਼ Durham Region (ਡਰਹਮ ਰੀਜਨ) ਦੇ ਵਸਨੀਕਾਂ ਤੋਂ ਹੀ ਅਰਜ਼ੀਆਂ ਲੈਂਦੀ ਹੈ (Pickering Public Library)।

14 ਸਾਲ

• City of Toronto Community Recreation (ਟੋਰਾਂਟੋ ਸ਼ਹਿਰ ਦਾ ਕਮਿਊਨਿਟੀ ਰੀਕ੍ਰੀਏਸ਼ਨ) ਕਹਿੰਦਾ ਹੈ ਕਿ ਤੁਹਾਡੀ ਉਮਰ ਘੱਟੋ-ਘੱਟ 14 ਸਾਲ ਹੋਣੀ ਚਾਹੀਦੀ ਹੈ, ਅਤੇ ਇੱਥੇ ਕੀਤੇ ਘੰਟੇ ਓਨਟਾਰੀਓ ਦੇ 40 ਘੰਟਿਆਂ ਵਿੱਚ ਗਿਣੇ ਜਾ ਸਕਦੇ ਹਨ (Community Recreation)।
• City of Burnaby (ਬਰਨਬੀ ਸ਼ਹਿਰ) ਕਹਿੰਦਾ ਹੈ ਕਿ ਇਸਦੀਆਂ Youth Services (ਯੂਥ ਸਰਵਿਸਿਜ਼) ਵਾਲੀਆਂ ਭੂਮਿਕਾਵਾਂ 14 ਤੋਂ 18 ਸਾਲ ਦੀ ਉਮਰ ਲਈ ਹਨ, ਅਤੇ ਇਸਦੀਆਂ ਕੈਂਪ ਅਤੇ ਪਲੇਗ੍ਰਾਊਂਡ (playground) ਵਾਲੀਆਂ ਭੂਮਿਕਾਵਾਂ ਬਰਨਬੀ ਦੇ 14 ਸਾਲ ਅਤੇ ਵੱਧ ਉਮਰ ਦੇ ਨੌਜਵਾਨਾਂ ਲਈ ਹਨ (City of Burnaby)।

15 ਸਾਲ

• Greater Vancouver Food Bank (ਗ੍ਰੇਟਰ ਵੈਨਕੂਵਰ ਫ਼ੂਡ ਬੈਂਕ) ਕਹਿੰਦਾ ਹੈ ਕਿ ਇਸਦੀ ਘੱਟੋ-ਘੱਟ ਉਮਰ 15 ਸਾਲ ਹੈ, ਅਤੇ ਕੁਝ ਭੂਮਿਕਾਵਾਂ ਲਈ ਉਮਰ ਦੀਆਂ ਹੱਦਾਂ ਵੱਖਰੀਆਂ ਹਨ (Greater Vancouver Food Bank)।
• Richmond Food Bank Society (ਰਿਚਮੰਡ ਫ਼ੂਡ ਬੈਂਕ ਸੋਸਾਇਟੀ) ਕਹਿੰਦੀ ਹੈ ਕਿ ਵਾਲੰਟੀਅਰਾਂ ਦੀ ਉਮਰ 15 ਸਾਲ ਜਾਂ ਵੱਧ ਹੋਣੀ ਚਾਹੀਦੀ ਹੈ। 15 ਤੋਂ 18 ਸਾਲ ਦੀ ਉਮਰ ਲਈ ਇਸਦਾ Youth Volunteer Accreditation Program (ਨੌਜਵਾਨ ਵਾਲੰਟੀਅਰਾਂ ਲਈ ਮਾਨਤਾ ਪ੍ਰੋਗਰਾਮ) 30 ਘੰਟਿਆਂ ਦੇ ਆਧਾਰ 'ਤੇ ਬਣਿਆ ਹੈ (Richmond Food Bank)।
• Ontario SPCA and Humane Society (ਓਨਟਾਰੀਓ ਐੱਸ.ਪੀ.ਸੀ.ਏ. ਐਂਡ ਹਿਊਮੇਨ ਸੋਸਾਇਟੀ) ਕਹਿੰਦੀ ਹੈ ਕਿ ਵਾਲੰਟੀਅਰ ਕੰਮ ਲਈ ਇਸਦੀ ਘੱਟੋ-ਘੱਟ ਉਮਰ 15 ਸਾਲ ਹੈ (Ontario SPCA)।

ਮਾਪਿਆਂ ਦੀ ਸਹਿਮਤੀ

ਉਮੀਦ ਰੱਖੋ ਕਿ ਮਾਪਿਆਂ ਜਾਂ ਸਰਪ੍ਰਸਤ ਨੂੰ ਕਿਸੇ ਫ਼ਾਰਮ 'ਤੇ ਦਸਤਖ਼ਤ ਕਰਨੇ ਪੈਣਗੇ। ਕੁਝ ਮਿਸਾਲਾਂ:

• MOSAIC (ਮੋਜ਼ੇਇਕ), ਮੈਟਰੋ ਵੈਨਕੂਵਰ ਦੀ ਇੱਕ ਚੈਰਿਟੀ ਜੋ ਨਵੇਂ ਆਏ ਲੋਕਾਂ (newcomers) ਦੀ ਸੇਵਾ ਕਰਦੀ ਹੈ, 14 ਸਾਲ ਅਤੇ ਵੱਧ ਉਮਰ ਦੇ ਵਾਲੰਟੀਅਰ ਲੈਂਦੀ ਹੈ। 16 ਸਾਲ ਤੋਂ ਘੱਟ ਉਮਰ ਦੇ ਵਾਲੰਟੀਅਰਾਂ ਨੂੰ ਮਾਪਿਆਂ ਜਾਂ ਸਰਪ੍ਰਸਤ ਦੀ ਸਹਿਮਤੀ ਚਾਹੀਦੀ ਹੈ (MOSAIC)।
• BC SPCA ਕਹਿੰਦਾ ਹੈ ਕਿ 12 ਤੋਂ 15 ਸਾਲ ਦੀ ਉਮਰ ਲਈ, ਅਰਜ਼ੀ ਮਾਪੇ ਜਾਂ ਸਰਪ੍ਰਸਤ ਭਰਦੇ ਹਨ। 16 ਤੋਂ 18 ਸਾਲ ਦੀ ਉਮਰ ਵਾਲੇ ਕੁਝ ਸੈਂਟਰਾਂ ਅਤੇ ਭੂਮਿਕਾਵਾਂ ਲਈ ਆਪ ਅਰਜ਼ੀ ਦੇ ਸਕਦੇ ਹਨ, ਪਰ ਜ਼ਿੰਮੇਵਾਰੀ ਤੋਂ ਛੋਟ ਵਾਲੇ ਫ਼ਾਰਮ (release) 'ਤੇ ਫਿਰ ਵੀ ਮਾਪਿਆਂ ਜਾਂ ਸਰਪ੍ਰਸਤ ਨੂੰ ਦਸਤਖ਼ਤ ਕਰਨੇ ਪੈਂਦੇ ਹਨ (BC SPCA)।
• City of Toronto ਦੇ ਲੰਬੇ ਸਮੇਂ ਦੀ ਦੇਖਭਾਲ ਵਾਲੇ ਘਰ (long-term care homes) 18 ਸਾਲ ਤੋਂ ਘੱਟ ਉਮਰ ਦੇ ਵਾਲੰਟੀਅਰਾਂ ਤੋਂ ਮਾਪਿਆਂ ਜਾਂ ਸਰਪ੍ਰਸਤ ਵੱਲੋਂ ਦਸਤਖ਼ਤ ਕੀਤਾ ਛੋਟ ਫ਼ਾਰਮ (waiver) ਮੰਗਦੇ ਹਨ (Long-Term Care Homes)।
• ਓਨਟਾਰੀਓ ਦੇ 40 ਘੰਟੇ: ਜੇ ਤੁਹਾਡੀ ਉਮਰ 18 ਸਾਲ ਤੋਂ ਘੱਟ ਹੈ, ਤਾਂ ਮਾਪਿਆਂ ਵਿੱਚੋਂ ਇੱਕ ਨੂੰ ਤੁਹਾਡੀਆਂ ਗਤੀਵਿਧੀਆਂ ਮਨਜ਼ੂਰ ਕਰਨੀਆਂ ਪੈਂਦੀਆਂ ਹਨ (PPM 124), ਅਤੇ ਤੁਹਾਡੇ ਵਾਲੰਟੀਅਰ ਘੰਟਿਆਂ ਦੇ ਰਿਕਾਰਡ 'ਤੇ ਮਾਪਿਆਂ ਜਾਂ ਸਰਪ੍ਰਸਤ ਨੂੰ ਦਸਤਖ਼ਤ ਕਰਨੇ ਪੈਂਦੇ ਹਨ (ਆਪਣੇ ਹਾਈ ਸਕੂਲ ਦੇ ਵਾਲੰਟੀਅਰ ਘੰਟੇ ਪੂਰੇ ਕਰੋ)।

ਕਿਸੇ ਵੀ ਛੋਟ ਫ਼ਾਰਮ (waiver ਜਾਂ release) 'ਤੇ ਦਸਤਖ਼ਤ ਕਰਨ ਤੋਂ ਪਹਿਲਾਂ ਉਸਨੂੰ ਪੜ੍ਹੋ, ਅਤੇ ਜੋ ਗੱਲ ਸਮਝ ਨਾ ਆਵੇ ਉਸ ਬਾਰੇ ਪੁੱਛੋ।

ਮਾਪਿਆਂ ਨੂੰ ਕੀ ਪੁੱਛਣਾ ਚਾਹੀਦਾ ਹੈ

• ਮੇਰਾ ਬੱਚਾ ਕੀ ਕੰਮ ਕਰੇਗਾ, ਅਤੇ ਕਿੱਥੇ? ਸਟੋਰ ਦੇ ਫ਼ਲੋਰ, ਵੇਅਰਹਾਊਸ, ਰਸੋਈ, ਅਤੇ ਪਾਰਕ ਦੇ ਖ਼ਤਰੇ ਵੱਖੋ-ਵੱਖਰੇ ਹੁੰਦੇ ਹਨ। ਓਨਟਾਰੀਓ ਵਿੱਚ, ਇਹਨਾਂ ਦੀਆਂ ਘੱਟੋ-ਘੱਟ ਉਮਰਾਂ ਵੀ ਵੱਖਰੀਆਂ ਹਨ।
• ਨਿਗਰਾਨੀ ਕੌਣ ਕਰਦਾ ਹੈ, ਅਤੇ ਪਹਿਲਾਂ ਕਿਹੜੀ ਟ੍ਰੇਨਿੰਗ ਮਿਲਦੀ ਹੈ? ਕੀ ਪੂਰੀ ਸ਼ਿਫ਼ਟ ਦੌਰਾਨ ਕੋਈ ਬਾਲਗ਼ ਉੱਥੇ ਹੁੰਦਾ ਹੈ, ਅਤੇ ਕੀ ਮੈਨੂੰ ਵੀ ਨਾਲ ਆਉਣਾ ਪਵੇਗਾ?
• ਕੀ ਇਸ ਭੂਮਿਕਾ ਲਈ ਪੁਲਿਸ ਚੈੱਕ ਦੀ ਲੋੜ ਹੈ, ਅਤੇ ਇਸਦੇ ਪੈਸੇ ਕੌਣ ਦਿੰਦਾ ਹੈ?
• ਜੇ ਮੇਰੇ ਬੱਚੇ ਨੂੰ ਸੱਟ ਲੱਗ ਜਾਵੇ ਤਾਂ ਕੀ ਹੁੰਦਾ ਹੈ? ਅਸੀਂ ਕਿਸਨੂੰ ਫ਼ੋਨ ਕਰੀਏ? ਓਨਟਾਰੀਓ ਵਿੱਚ, WSIB (Workplace Safety and Insurance Board, ਓਨਟਾਰੀਓ ਦਾ ਕੰਮ ਵਾਲੀ ਥਾਂ ਦੀ ਸੁਰੱਖਿਆ ਅਤੇ ਬੀਮਾ ਬੋਰਡ) ਕਹਿੰਦਾ ਹੈ ਕਿ ਵਾਲੰਟੀਅਰ ਆਮ ਤੌਰ 'ਤੇ WSIB ਦੀ ਕਵਰੇਜ ਹੇਠ ਨਹੀਂ ਆਉਂਦੇ (WSIB)। ਪੁੱਛੋ ਕਿ ਕੀ ਸੰਸਥਾ ਕੋਲ ਵਾਲੰਟੀਅਰਾਂ ਲਈ ਬੀਮਾ ਹੈ।
• ਘੰਟੇ ਕਿਵੇਂ ਦਰਜ ਕੀਤੇ ਜਾਂਦੇ ਹਨ? ਕੀ ਮੇਰੇ ਬੱਚੇ ਨੂੰ ਕੋਈ ਚਿੱਠੀ ਜਾਂ ਸਰਟੀਫ਼ਿਕੇਟ ਮਿਲ ਸਕਦਾ ਹੈ?
• ਕੀ ਇਹ ਕੋਈ ਚੈਰਿਟੀ, ਗ਼ੈਰ-ਮੁਨਾਫ਼ਾ ਸੰਸਥਾ, ਜਾਂ ਜਨਤਕ ਸੰਸਥਾ ਹੈ?

ਸਕੂਲ ਲਈ ਵਾਲੰਟੀਅਰ ਘੰਟੇ

ਓਨਟਾਰੀਓ: 40 ਘੰਟੇ

Ontario Secondary School Diploma (ਓਨਟਾਰੀਓ ਸੈਕੰਡਰੀ ਸਕੂਲ ਡਿਪਲੋਮਾ) ਲੈਣ ਲਈ, ਤੁਹਾਨੂੰ ਘੱਟੋ-ਘੱਟ 40 ਘੰਟੇ ਕਮਿਊਨਿਟੀ ਵਿੱਚ ਹਿੱਸਾ ਲੈਣ (community involvement) ਦੀ ਲੋੜ ਹੈ। ਤੁਸੀਂ ਗ੍ਰੇਡ 9 ਤੋਂ ਪਹਿਲਾਂ ਵਾਲੀਆਂ ਗਰਮੀਆਂ ਵਿੱਚ ਸ਼ੁਰੂ ਕਰ ਸਕਦੇ ਹੋ (ਆਪਣੇ ਹਾਈ ਸਕੂਲ ਦੇ ਵਾਲੰਟੀਅਰ ਘੰਟੇ ਪੂਰੇ ਕਰੋ)। ਉਹ ਗਤੀਵਿਧੀਆਂ ਨਹੀਂ ਗਿਣੀਆਂ ਜਾਂਦੀਆਂ ਜੋ ਕਿਸੇ ਕੰਮ ਵਾਲੀ ਥਾਂ 'ਤੇ ਕੰਮ ਕਰਨ ਜਾਂ ਉੱਥੇ ਜਾਣ ਲਈ ਘੱਟੋ-ਘੱਟ ਉਮਰ ਦੇ ਨਿਯਮ ਤੋੜਦੀਆਂ ਹਨ (PPM 124)।

ਕੀ ਗਿਣਿਆ ਜਾਂਦਾ ਹੈ ਅਤੇ ਆਪਣੇ ਘੰਟੇ ਕਿਵੇਂ ਦਰਜ ਕਰਨੇ ਹਨ, ਇਹ ਜਾਣਨ ਲਈ ਪੜ੍ਹੋ ਓਨਟਾਰੀਓ ਦੇ 40 ਵਾਲੰਟੀਅਰ ਘੰਟੇ।

ਬੀ.ਸੀ.: Career-Life Connections

ਬੀ.ਸੀ. ਵਿੱਚ ਓਨਟਾਰੀਓ ਵਾਂਗ ਵਾਲੰਟੀਅਰ ਘੰਟਿਆਂ ਦਾ ਕੋਈ ਵੱਖਰਾ ਨਿਯਮ ਨਹੀਂ ਹੈ। ਗ੍ਰੈਜੂਏਟ ਹੋਣ ਲਈ, ਵਿਦਿਆਰਥੀਆਂ ਨੂੰ ਦੋ ਕੋਰਸ ਪੂਰੇ ਕਰਨੇ ਪੈਂਦੇ ਹਨ, Career-Life Education (ਕਰੀਅਰ-ਲਾਈਫ਼ ਐਜੂਕੇਸ਼ਨ) ਅਤੇ Career-Life Connections (ਕਰੀਅਰ-ਲਾਈਫ਼ ਕਨੈਕਸ਼ਨਜ਼), ਜੋ ਗ੍ਰੇਡ 10 ਤੋਂ 12 ਦੀਆਂ ਸ਼ਰਤਾਂ ਦਾ ਹਿੱਸਾ ਹਨ। Career-Life Connections ਲਈ ਘੱਟੋ-ਘੱਟ 30 ਘੰਟੇ ਕਰੀਅਰਾਂ ਬਾਰੇ ਜਾਣਨ-ਪਰਖਣ (exploring careers) ਵਿੱਚ ਲਾਉਣੇ ਪੈਂਦੇ ਹਨ, ਅਤੇ ਇਸ ਵਿੱਚ ਤਨਖਾਹ ਵਾਲਾ ਕੰਮ ਜਾਂ ਸਕੂਲ ਤੋਂ ਬਾਹਰ ਵਾਲੰਟੀਅਰ ਕੰਮ ਸ਼ਾਮਲ ਹੋ ਸਕਦਾ ਹੈ (Government of BC)।

ਆਪਣੇ ਸਕੂਲ ਤੋਂ ਪੁੱਛੋ ਕਿ ਉਹ ਇਹ ਘੰਟੇ ਕਿਵੇਂ ਦਰਜ ਕਰਦਾ ਹੈ ਅਤੇ ਇਹ ਕਦੋਂ ਤੋਂ ਗਿਣੇ ਜਾਣੇ ਸ਼ੁਰੂ ਹੁੰਦੇ ਹਨ। ਉਸ ਤੋਂ ਪਹਿਲਾਂ ਕੀਤਾ ਵਾਲੰਟੀਅਰ ਕੰਮ ਵੀ ਤੁਹਾਨੂੰ ਅਜਿਹਾ ਤਜਰਬਾ ਦਿੰਦਾ ਹੈ ਜਿਸ ਬਾਰੇ ਤੁਸੀਂ ਗੱਲ ਕਰ ਸਕਦੇ ਹੋ।

ਪੁਲਿਸ ਚੈੱਕ: ਕੁਝ ਭੂਮਿਕਾਵਾਂ ਲਈ 18 ਸਾਲ ਤੱਕ ਉਡੀਕ ਕਿਉਂ ਕਰਨੀ ਪੈਂਦੀ ਹੈ

ਬੱਚਿਆਂ, ਬਜ਼ੁਰਗਾਂ, ਜਾਂ ਹੋਰ ਕਮਜ਼ੋਰ ਹਾਲਤ ਵਾਲੇ ਲੋਕਾਂ (vulnerable people) ਨਾਲ ਕੰਮ ਵਾਲੀਆਂ ਭੂਮਿਕਾਵਾਂ ਲਈ ਅਕਸਰ ਪੁਲਿਸ ਚੈੱਕ (police check) ਦੀ ਲੋੜ ਹੁੰਦੀ ਹੈ।

• ਓਨਟਾਰੀਓ: vulnerable sector check (ਵਲਨਰੇਬਲ ਸੈਕਟਰ ਚੈੱਕ) ਉਹਨਾਂ ਲੋਕਾਂ ਲਈ ਹੈ ਜੋ ਬੱਚਿਆਂ (18 ਸਾਲ ਤੋਂ ਘੱਟ ਉਮਰ ਦਾ ਕੋਈ ਵੀ ਵਿਅਕਤੀ) ਜਾਂ ਹੋਰ ਕਮਜ਼ੋਰ ਹਾਲਤ ਵਾਲੇ ਲੋਕਾਂ ਉੱਤੇ ਭਰੋਸੇ ਜਾਂ ਅਧਿਕਾਰ ਵਾਲੇ ਅਹੁਦੇ (position of trust or authority) 'ਤੇ ਹੁੰਦੇ ਹਨ। ਇਹ ਤੁਹਾਡੀ ਸਥਾਨਕ ਪੁਲਿਸ ਸਰਵਿਸ ਤੋਂ ਹੀ ਲੈਣਾ ਪੈਂਦਾ ਹੈ (ਪੁਲਿਸ ਰਿਕਾਰਡ ਚੈੱਕ)।
• ਬੀ.ਸੀ.: Criminal Records Review Program (ਅਪਰਾਧਕ ਰਿਕਾਰਡ ਸਮੀਖਿਆ ਪ੍ਰੋਗਰਾਮ) ਵਾਲਾ ਚੈੱਕ ਸਿਰਫ਼ ਰਜਿਸਟਰਡ ਸੰਸਥਾਵਾਂ ਦੇ ਉਹਨਾਂ ਮੁਲਾਜ਼ਮਾਂ ਅਤੇ ਵਾਲੰਟੀਅਰਾਂ ਲਈ ਹੈ ਜੋ ਬੱਚਿਆਂ ਜਾਂ ਕਮਜ਼ੋਰ ਹਾਲਤ ਵਾਲੇ ਬਾਲਗ਼ਾਂ ਨਾਲ ਕੰਮ ਕਰਦੇ ਹਨ (Government of BC)।

ਕਈ ਪੁਲਿਸ ਸਰਵਿਸਾਂ ਟੀਨਏਜਰਾਂ ਲਈ ਚੈੱਕਾਂ 'ਤੇ ਪਾਬੰਦੀਆਂ ਲਾਉਂਦੀਆਂ ਹਨ:

• Toronto Police (ਟੋਰਾਂਟੋ ਪੁਲਿਸ) 14 ਤੋਂ 17 ਸਾਲ ਦੇ ਨੌਜਵਾਨਾਂ ਲਈ ਚੈੱਕ ਸਿਰਫ਼ ਫ਼ੈਡਰਲ, ਸੂਬਾਈ, ਜਾਂ ਸ਼ਹਿਰੀ (municipal) ਸਰਕਾਰ ਦੀਆਂ ਭੂਮਿਕਾਵਾਂ ਲਈ ਹੀ ਕਰਦੀ ਹੈ (Toronto Police)।
• Peel Regional Police (ਪੀਲ ਰੀਜਨਲ ਪੁਲਿਸ) ਕਹਿੰਦੀ ਹੈ ਕਿ Level 3 (vulnerable sector) ਚੈੱਕ ਲਈ ਅਰਜ਼ੀ ਦੇਣ ਵਾਲਿਆਂ ਦੀ ਉਮਰ 18 ਸਾਲ ਤੋਂ ਵੱਧ ਹੋਣੀ ਚਾਹੀਦੀ ਹੈ। ਪੀਲ ਸਿਰਫ਼ ਮਿਸੀਸਾਗਾ ਜਾਂ ਬਰੈਂਪਟਨ ਵਿੱਚ ਰਹਿਣ ਵਾਲੇ ਲੋਕਾਂ ਦੇ ਹੀ ਚੈੱਕ ਕਰਦੀ ਹੈ (Peel Regional Police)।
• Halton Regional Police (ਹਾਲਟਨ ਰੀਜਨਲ ਪੁਲਿਸ) 18 ਸਾਲ ਤੋਂ ਘੱਟ ਉਮਰ ਦੇ ਅਰਜ਼ੀ ਦੇਣ ਵਾਲਿਆਂ ਦੇ ਰਿਕਾਰਡ ਚੈੱਕ ਸਿਰਫ਼ ਤਾਂ ਹੀ ਕਰਦੀ ਹੈ ਜੇ ਭੂਮਿਕਾ, ਭਾਵੇਂ ਤਨਖਾਹ ਵਾਲੀ ਹੋਵੇ ਜਾਂ ਵਾਲੰਟੀਅਰ, ਕਿਸੇ ਸਰਕਾਰੀ ਏਜੰਸੀ ਨਾਲ ਹੋਵੇ (Halton Regional Police)।
• Surrey Police (ਸਰੀ ਪੁਲਿਸ) 18 ਸਾਲ ਤੋਂ ਘੱਟ ਉਮਰ ਦੇ ਕਿਸੇ ਵੀ ਵਿਅਕਤੀ ਦਾ vulnerable sector check ਨਹੀਂ ਕਰਦੀ, ਅਤੇ ਇਹ ਸਿਰਫ਼ ਸਰੀ ਦੇ ਵਸਨੀਕਾਂ ਦੇ ਹੀ ਚੈੱਕ ਕਰਦੀ ਹੈ (Surrey Police)।

ਇਸ ਲਈ ਜੇ ਕਿਸੇ ਚੈਰਿਟੀ ਦੀ ਭੂਮਿਕਾ ਲਈ vulnerable sector check ਦੀ ਲੋੜ ਹੈ, ਤਾਂ ਹੋ ਸਕਦਾ ਹੈ ਕਿ ਇਹਨਾਂ ਵਿੱਚੋਂ ਕਿਸੇ ਇਲਾਕੇ ਵਿੱਚ ਰਹਿਣ ਵਾਲਾ ਟੀਨਏਜਰ ਇਹ ਚੈੱਕ ਨਾ ਲੈ ਸਕੇ। ਸਰਕਾਰੀ ਪ੍ਰੋਗਰਾਮਾਂ ਵਿੱਚ ਗੱਲ ਵੱਖਰੀ ਹੋ ਸਕਦੀ ਹੈ। City of Toronto ਦੇ ਲੰਬੇ ਸਮੇਂ ਦੀ ਦੇਖਭਾਲ ਵਾਲੇ ਘਰਾਂ ਨੂੰ vulnerable sector screen ਚਾਹੀਦੀ ਹੈ, ਅਤੇ ਉਹਨਾਂ ਦੇ ਸਰਗਰਮ ਵਾਲੰਟੀਅਰਾਂ ਵਿੱਚੋਂ ਲਗਭਗ ਪੰਜਾਂ ਵਿੱਚੋਂ ਇੱਕ ਦੀ ਉਮਰ 18 ਸਾਲ ਤੋਂ ਘੱਟ ਹੈ (Long-Term Care Homes)।

ਕੁਝ ਸੰਸਥਾਵਾਂ ਟੀਨਏਜਰਾਂ ਤੋਂ ਇਸਦੀ ਥਾਂ ਮੁੱਢਲਾ ਚੈੱਕ ਮੰਗਦੀਆਂ ਹਨ। Pickering Public Library 18 ਸਾਲ ਤੋਂ ਘੱਟ ਉਮਰ ਦੇ ਵਾਲੰਟੀਅਰਾਂ ਤੋਂ criminal record check (ਕ੍ਰਿਮੀਨਲ ਰਿਕਾਰਡ ਚੈੱਕ) ਅਤੇ 18 ਸਾਲ ਤੋਂ ਵੱਧ ਉਮਰ ਵਾਲਿਆਂ ਤੋਂ vulnerable sector check ਮੰਗਦੀ ਹੈ (Pickering Public Library)। Surrey Libraries (ਸਰੀ ਲਾਇਬ੍ਰੇਰੀਜ਼) ਦੀ Teen Library Council (ਟੀਨਏਜਰਾਂ ਦੀ ਲਾਇਬ੍ਰੇਰੀ ਕੌਂਸਲ), ਜੋ 13 ਤੋਂ 18 ਸਾਲ ਦੀ ਉਮਰ ਲਈ ਹੈ, ਲਈ police information check (ਪੁਲਿਸ ਜਾਣਕਾਰੀ ਚੈੱਕ) ਦੀ ਲੋੜ ਹੈ (Surrey Libraries)।

ਅਰਜ਼ੀ ਕਿਵੇਂ ਦੇਣੀ ਹੈ ਅਤੇ ਵਾਲੰਟੀਅਰਾਂ ਲਈ ਕਿਹੜੇ ਚੈੱਕ ਮੁਫ਼ਤ ਹਨ, ਇਹ ਜਾਣਨ ਲਈ ਪੜ੍ਹੋ ਬੀ.ਸੀ. ਅਤੇ ਓਨਟਾਰੀਓ ਵਿੱਚ ਵਾਲੰਟੀਅਰਾਂ ਲਈ ਪੁਲਿਸ ਚੈੱਕ।

ਸੁਰੱਖਿਅਤ ਰਹਿਣਾ

• ਪਹਿਲਾਂ ਟ੍ਰੇਨਿੰਗ ਲਓ। ਤੁਹਾਡੀ ਪਹਿਲੀ ਸ਼ਿਫ਼ਟ ਤੋਂ ਪਹਿਲਾਂ ਤੁਹਾਨੂੰ ਤੁਹਾਡੇ ਕੰਮ ਅਤੇ ਉਹਨਾਂ ਦੇ ਖ਼ਤਰੇ ਸਮਝਾਏ ਜਾਣੇ ਚਾਹੀਦੇ ਹਨ। ਜੇ ਕੋਈ ਨਹੀਂ ਸਮਝਾਉਂਦਾ, ਤਾਂ ਪੁੱਛੋ।
• ਜਾਣੋ ਕਿ ਕਿਹੜੇ ਕੰਮ ਮਨ੍ਹਾ ਹਨ। ਓਨਟਾਰੀਓ ਕਹਿੰਦਾ ਹੈ ਕਿ 40 ਘੰਟਿਆਂ ਵਾਲੀਆਂ ਵਾਲੰਟੀਅਰ ਭੂਮਿਕਾਵਾਂ ਵਿੱਚ ਇਹ ਕੰਮ ਨਹੀਂ ਹੋਣੇ ਚਾਹੀਦੇ: ਗੱਡੀਆਂ, ਬਿਜਲੀ ਵਾਲੇ ਔਜ਼ਾਰ (power tools), ਜਾਂ ਸਕੈਫ਼ੋਲਡਿੰਗ (scaffolding) ਚਲਾਉਣਾ, ਦਵਾਈ ਦੇਣਾ ਜਾਂ ਡਾਕਟਰੀ ਪ੍ਰਕਿਰਿਆਵਾਂ (medical procedures) ਕਰਨਾ, "ਨਿਰਧਾਰਤ ਪਦਾਰਥ" (designated substances) ਸੰਭਾਲਣਾ, ਬੈਂਕਿੰਗ ਦਾ ਕੰਮ ਜਾਂ ਕੀਮਤੀ ਚੀਜ਼ਾਂ ਸੰਭਾਲਣਾ, ਜਾਂ ਅਜਿਹਾ ਕੰਮ ਜਿਸ ਲਈ ਕਿਸੇ ਰੈਗੂਲੇਟਿਡ ਕਿੱਤੇ ਦੇ ਕਾਰੀਗਰ (regulated tradesperson) ਦੀ ਲੋੜ ਹੋਵੇ (ਆਪਣੇ ਹਾਈ ਸਕੂਲ ਦੇ ਵਾਲੰਟੀਅਰ ਘੰਟੇ ਪੂਰੇ ਕਰੋ)। ਬੀ.ਸੀ. ਵਿੱਚ ਵੀ ਇਹ ਇੱਕ ਚੰਗੀ ਚੈੱਕਲਿਸਟ ਹੈ।
• ਹਰ ਸੱਟ ਦੀ ਰਿਪੋਰਟ ਕਰੋ। ਓਨਟਾਰੀਓ ਕਹਿੰਦਾ ਹੈ ਕਿ 25 ਸਾਲ ਤੋਂ ਘੱਟ ਉਮਰ ਦੇ ਨੌਜਵਾਨਾਂ ਨੂੰ ਕੰਮ 'ਤੇ ਸੱਟ ਲੱਗਣ ਦਾ ਖ਼ਤਰਾ ਕਿਸੇ ਵੀ ਹੋਰ ਉਮਰ ਦੇ ਗਰੁੱਪ ਨਾਲੋਂ ਕਿਤੇ ਵੱਧ ਹੁੰਦਾ ਹੈ। ਕੋਈ ਵੀ ਸੱਟ ਲੱਗੇ ਤਾਂ ਆਪਣੇ ਸੁਪਰਵਾਈਜ਼ਰ ਨੂੰ ਦੱਸੋ, ਭਾਵੇਂ ਤੁਸੀਂ ਆਪਣੇ ਮਾਪਿਆਂ ਜਾਂ ਪਰਿਵਾਰ ਦੇ ਕਿਸੇ ਦੋਸਤ ਨਾਲ ਵਾਲੰਟੀਅਰ ਕੰਮ ਕਰ ਰਹੇ ਹੋਵੋ (ਵਾਲੰਟੀਅਰਾਂ ਲਈ ਸਿਹਤ ਅਤੇ ਸੁਰੱਖਿਆ)।
• ਜੋ ਵੀ ਅਸੁਰੱਖਿਅਤ ਲੱਗੇ, ਉਸ ਤੋਂ ਨਾਂਹ ਕਰੋ। ਰੁਕੋ, ਉੱਥੋਂ ਪਰੇ ਹਟੋ, ਅਤੇ ਸੁਪਰਵਾਈਜ਼ਰ ਅਤੇ ਮਾਪਿਆਂ ਨੂੰ ਦੱਸੋ। ਸਾਡੀ ਗਾਈਡ ਬੀ.ਸੀ. ਅਤੇ ਓਨਟਾਰੀਓ ਵਿੱਚ ਅਸੁਰੱਖਿਅਤ ਕੰਮ ਤੋਂ ਇਨਕਾਰ ਕਿਵੇਂ ਕਰੀਏ ਤਨਖਾਹ ਲੈਣ ਵਾਲੇ ਵਰਕਰਾਂ ਲਈ ਨਿਯਮ ਸਮਝਾਉਂਦੀ ਹੈ।
• ਕਿਸੇ ਨੂੰ ਦੱਸੋ ਕਿ ਤੁਸੀਂ ਕਿੱਥੇ ਹੋਵੋਗੇ। ਪਤਾ, ਆਪਣੀ ਸ਼ਿਫ਼ਟ ਦਾ ਸਮਾਂ, ਅਤੇ ਤੁਸੀਂ ਘਰ ਕਿਵੇਂ ਵਾਪਸ ਆਓਗੇ, ਇਹ ਦੱਸ ਕੇ ਜਾਓ।
• ਠੱਗੀਆਂ ਤੋਂ ਬਚੋ। ਸਾਵਧਾਨ ਰਹੋ ਜੇ ਕੋਈ ਵਾਲੰਟੀਅਰ ਕੰਮ ਕਰਨ ਲਈ ਤੁਹਾਡੇ ਤੋਂ ਪੈਸੇ ਮੰਗੇ ਜਾਂ ਬੈਂਕ ਦੇ ਵੇਰਵੇ ਮੰਗੇ (ਪਹਿਲੀ ਨੌਕਰੀ ਲੱਭਣ ਵਾਲਿਆਂ ਨੂੰ ਨਿਸ਼ਾਨਾ ਬਣਾਉਣ ਵਾਲੀਆਂ ਨੌਕਰੀ ਦੀਆਂ ਠੱਗੀਆਂ)।
• ਆਨਲਾਈਨ ਭੂਮਿਕਾਵਾਂ। ਸਿਰਫ਼ ਅਜਿਹੀ ਸੰਸਥਾ ਨਾਲ ਕੰਮ ਕਰੋ ਜਿਸ ਬਾਰੇ ਤੁਸੀਂ ਪਤਾ ਕਰ ਸਕੋ, ਗੱਲਬਾਤ ਉਸਦੇ ਆਪਣੇ ਪਲੇਟਫ਼ਾਰਮਾਂ 'ਤੇ ਹੀ ਰੱਖੋ, ਆਪਣਾ ਪਤਾ ਜਾਂ ਫ਼ੋਟੋਆਂ ਸਾਂਝੀਆਂ ਨਾ ਕਰੋ, ਅਤੇ ਮਾਪਿਆਂ ਨੂੰ ਦੱਸੋ ਕਿ ਤੁਸੀਂ ਕਿਸ ਨਾਲ ਕੰਮ ਕਰ ਰਹੇ ਹੋ।

ਤੁਹਾਡਾ ਪਹਿਲਾ ਰੈਫ਼ਰੈਂਸ

ਵਾਲੰਟੀਅਰ ਕੋਆਰਡੀਨੇਟਰ (volunteer coordinator) ਤੁਹਾਡਾ ਪਹਿਲਾ ਰੈਫ਼ਰੈਂਸ ਬਣ ਸਕਦਾ ਹੈ।

• ਰਿਕਾਰਡ ਰੱਖੋ। ਆਪਣੀਆਂ ਤਰੀਕਾਂ, ਘੰਟੇ, ਕੰਮ, ਅਤੇ ਤੁਹਾਡੀ ਨਿਗਰਾਨੀ ਕਿਸਨੇ ਕੀਤੀ, ਇਹ ਲਿਖ ਕੇ ਰੱਖੋ।
• ਆਪਣਾ ਵਾਲੰਟੀਅਰ ਕੰਮ ਪੂਰਾ ਕਰਨ ਤੋਂ ਪਹਿਲਾਂ ਪੁੱਛੋ। ਪੁੱਛੋ ਕਿ ਕੀ ਤੁਹਾਡਾ ਸੁਪਰਵਾਈਜ਼ਰ ਤੁਹਾਡਾ ਰੈਫ਼ਰੈਂਸ ਬਣੇਗਾ, ਜਾਂ ਤੁਹਾਡੇ ਘੰਟਿਆਂ ਅਤੇ ਤੁਹਾਡੇ ਰਵੱਈਏ ਬਾਰੇ ਇੱਕ ਛੋਟੀ ਜਿਹੀ ਚਿੱਠੀ ਲਿਖੇਗਾ।
• ਨਿਯਮ ਜਾਣੋ। ਕੁਝ ਸੰਸਥਾਵਾਂ ਆਪਣੇ ਨਿਯਮ ਆਪ ਬਣਾਉਂਦੀਆਂ ਹਨ। Stanley Park Ecology Society ਕਹਿੰਦੀ ਹੈ ਕਿ 25 ਵਾਲੰਟੀਅਰ ਘੰਟਿਆਂ ਤੋਂ ਬਾਅਦ ਤੁਸੀਂ ਰੈਫ਼ਰੈਂਸ ਲੈਟਰ ਲੈ ਸਕਦੇ ਹੋ (Stanley Park Ecology Society)। Greater Vancouver Food Bank ਇੱਕ ਸ਼ਿਫ਼ਟ ਤੋਂ ਬਾਅਦ ਪੁਸ਼ਟੀ ਦੀ ਚਿੱਠੀ (confirmation letter) ਅਤੇ 80 ਘੰਟਿਆਂ ਤੋਂ ਬਾਅਦ ਰੈਫ਼ਰੈਂਸ ਲੈਟਰ ਦਿੰਦਾ ਹੈ, ਪਰ ਜੇ ਤੁਸੀਂ ਪਿਛਲੇ 12 ਮਹੀਨਿਆਂ ਵਿੱਚ ਉੱਥੇ ਵਾਲੰਟੀਅਰ ਕੰਮ ਨਹੀਂ ਕੀਤਾ, ਤਾਂ ਰੈਫ਼ਰੈਂਸ ਲੈਟਰ ਨਹੀਂ ਦਿੰਦਾ (Greater Vancouver Food Bank)। Richmond Food Bank Society ਆਪਣਾ ਨੌਜਵਾਨਾਂ ਵਾਲਾ ਪ੍ਰੋਗਰਾਮ ਪੂਰਾ ਕਰਨ ਵਾਲੇ ਵਿਦਿਆਰਥੀਆਂ ਨੂੰ ਇੱਕ ਸਰਟੀਫ਼ਿਕੇਟ ਅਤੇ ਸਿਫ਼ਾਰਸ਼ੀ ਚਿੱਠੀ (letter of recommendation) ਦਿੰਦੀ ਹੈ (Richmond Food Bank)।

ਪੜ੍ਹੋ ਜਦੋਂ ਕੰਮ ਦਾ ਤਜਰਬਾ ਨਾ ਹੋਵੇ ਤਾਂ ਰੈਫ਼ਰੈਂਸ ਅਤੇ ਤਨਖਾਹ ਵਾਲੀ ਨੌਕਰੀ ਲੈਣ ਲਈ ਵਾਲੰਟੀਅਰ ਤਜਰਬਾ ਕਿਵੇਂ ਵਰਤੀਏ।

ਅਗਲੇ ਕਦਮ

• ਆਪਣੇ ਨੇੜੇ ਥਾਵਾਂ ਲੱਭੋ: ਮੈਟਰੋ ਵੈਨਕੂਵਰ ਜਾਂ ਗ੍ਰੇਟਰ ਟੋਰਾਂਟੋ ਏਰੀਆ ਦੀ ਵਾਲੰਟੀਅਰ ਲਿਸਟ ਦੇਖੋ
• ਓਨਟਾਰੀਓ ਦੇ ਵਿਦਿਆਰਥੀ: ਓਨਟਾਰੀਓ ਦੇ 40 ਵਾਲੰਟੀਅਰ ਘੰਟੇ
• ਸਮਾਂ ਘੱਟ ਹੈ: ਇੱਕ-ਦਿਨਾ ਅਤੇ ਸਮਾਗਮਾਂ ਵਿੱਚ ਵਾਲੰਟੀਅਰ ਕੰਮ
• 14, 15, ਜਾਂ 16 ਸਾਲ ਦੇ ਹੋਣ ਵਾਲੇ ਹੋ: ਬੀ.ਸੀ. ਅਤੇ ਓਨਟਾਰੀਓ ਵਿੱਚ 15, 16 ਜਾਂ 17 ਸਾਲ ਦੀ ਉਮਰ ਵਿੱਚ ਕੰਮ ਕਰਨਾ ਅਤੇ ਵਿਦਿਆਰਥੀਆਂ ਲਈ ਪਾਰਟ-ਟਾਈਮ ਨੌਕਰੀਆਂ
• ਵਾਲੰਟੀਅਰ ਕੰਮ ਕਿਉਂ ਮਦਦ ਕਰਦਾ ਹੈ: ਤਜਰਬਾ ਅਤੇ ਰੈਫ਼ਰੈਂਸ ਬਣਾਉਣ ਲਈ ਵਾਲੰਟੀਅਰ ਕੰਮ