ਕੈਨੇਡਾ ਵਿੱਚ ਕੰਮ ਵਾਲੀ ਥਾਂ ਦੀਆਂ ਮੁੱਢਲੀਆਂ ਗੱਲਾਂ: ਜ਼ਿਆਦਾਤਰ ਮਾਲਕ ਕੀ ਉਮੀਦ ਰੱਖਦੇ ਹਨ

ਹਰ ਕੰਮ ਵਾਲੀ ਥਾਂ ਦੇ ਆਪਣੇ ਨਿਯਮ ਹੁੰਦੇ ਹਨ, ਅਤੇ ਹਰ ਮੈਨੇਜਰ ਵੱਖਰਾ ਹੁੰਦਾ ਹੈ। ਫਿਰ ਵੀ, ਕੈਨੇਡਾ ਵਿੱਚ ਲਗਭਗ ਹਰ ਐਂਟਰੀ-ਲੈਵਲ ਨੌਕਰੀ 'ਤੇ ਕੁਝ ਉਮੀਦਾਂ ਇੱਕੋ ਜਿਹੀਆਂ ਹੁੰਦੀਆਂ ਹਨ। ਇਹਨਾਂ ਨੂੰ ਜਾਣਨ ਨਾਲ ਤੁਸੀਂ ਚੰਗਾ ਪ੍ਰਭਾਵ ਪਾ ਸਕਦੇ ਹੋ ਅਤੇ ਕੰਮ 'ਤੇ ਜ਼ਿਆਦਾ ਸਹਿਜ ਮਹਿਸੂਸ ਕਰ ਸਕਦੇ ਹੋ।

ਇਹ ਗਾਈਡ ਹਰ ਉਸ ਵਿਅਕਤੀ ਲਈ ਹੈ ਜੋ ਕੰਮ ਸ਼ੁਰੂ ਕਰ ਰਿਹਾ ਹੈ, ਭਾਵੇਂ ਤੁਸੀਂ ਇੱਥੇ ਹੀ ਵੱਡੇ ਹੋਏ ਹੋ ਜਾਂ ਪਿਛਲੇ ਮਹੀਨੇ ਆਏ ਹੋ। ਜੇ ਤੁਹਾਡੀ ਕੰਮ ਵਾਲੀ ਥਾਂ 'ਤੇ ਕੋਈ ਗੱਲ ਵੱਖਰੇ ਢੰਗ ਨਾਲ ਹੁੰਦੀ ਹੈ, ਤਾਂ ਆਪਣੀ ਕੰਮ ਵਾਲੀ ਥਾਂ ਦੇ ਨਿਯਮ ਮੰਨੋ, ਅਤੇ ਜਦੋਂ ਪੱਕਾ ਪਤਾ ਨਾ ਹੋਵੇ ਤਾਂ ਆਪਣੇ ਮੈਨੇਜਰ ਤੋਂ ਪੁੱਛੋ।

ਹੇਠਾਂ ਦਿੱਤੀ ਕਾਨੂੰਨੀ ਜਾਣਕਾਰੀ ਅਸੀਂ 12 ਅਕਤੂਬਰ 2026 ਨੂੰ ਚੈੱਕ ਕੀਤੀ ਸੀ। ਤਾਜ਼ਾ ਨਿਯਮਾਂ ਲਈ ਲਿੰਕ ਦੇਖੋ।

ਸਮੇਂ ਸਿਰ ਪਹੁੰਚਣਾ

ਸਮੇਂ ਸਿਰ ਪਹੁੰਚਣ ਦਾ ਮਤਲਬ ਆਮ ਤੌਰ 'ਤੇ ਇਹ ਹੁੰਦਾ ਹੈ ਕਿ ਸ਼ਿਫ਼ਟ ਸ਼ੁਰੂ ਹੋਣ ਵੇਲੇ ਤੁਸੀਂ ਕੰਮ ਲਈ ਤਿਆਰ ਹੋਵੋ। ਕੁਝ ਮਿੰਟ ਪਹਿਲਾਂ ਪਹੁੰਚੋ, ਤਾਂ ਜੋ ਕੰਮ ਸ਼ੁਰੂ ਕਰਨ ਤੋਂ ਪਹਿਲਾਂ ਤੁਸੀਂ ਆਪਣਾ ਸਮਾਨ ਰੱਖ ਸਕੋ, ਹੱਥ ਧੋ ਸਕੋ, ਅਤੇ ਆਪਣਾ ਏਪਰਨ ਪਾ ਸਕੋ ਜਾਂ ਨਾਮ ਵਾਲਾ ਟੈਗ ਲਾ ਸਕੋ।

ਜੇ ਤੁਹਾਨੂੰ ਦੇਰ ਹੋਣ ਵਾਲੀ ਹੈ:

ਆਪਣੀ ਸ਼ਿਫ਼ਟ ਸ਼ੁਰੂ ਹੋਣ ਤੋਂ ਪਹਿਲਾਂ ਆਪਣੇ ਮੈਨੇਜਰ ਨੂੰ ਦੱਸੋ, ਬਾਅਦ ਵਿੱਚ ਨਹੀਂ।
ਉਹ ਤਰੀਕਾ ਵਰਤੋ ਜੋ ਤੁਹਾਡੀ ਕੰਮ ਵਾਲੀ ਥਾਂ ਕਹਿੰਦੀ ਹੈ: ਫ਼ੋਨ ਕਾਲ, ਟੈਕਸਟ, ਜਾਂ ਸ਼ਡਿਊਲਿੰਗ ਐਪ।
ਦੱਸੋ ਕਿ ਤੁਸੀਂ ਕਦੋਂ ਤੱਕ ਪਹੁੰਚਣ ਦੀ ਉਮੀਦ ਕਰਦੇ ਹੋ। ਫਿਰ ਪਹੁੰਚਦੇ ਸਾਰ ਸਿੱਧੇ ਕੰਮ 'ਤੇ ਲੱਗ ਜਾਓ।

ਕਦੇ ਵੀ ਕਿਸੇ ਨੂੰ ਦੱਸੇ ਬਿਨਾਂ ਘਰ ਨਾ ਬੈਠੇ ਰਹੋ। ਤੁਹਾਡੇ ਮੈਨੇਜਰ ਨੂੰ ਪਤਾ ਹੋਣਾ ਚਾਹੀਦਾ ਹੈ, ਤਾਂ ਜੋ ਉਹ ਤੁਹਾਡੀ ਸ਼ਿਫ਼ਟ ਕਵਰ ਕਰਨ ਲਈ ਕਿਸੇ ਨੂੰ ਲੱਭ ਸਕੇ। ਬਿਨਾਂ ਕੁਝ ਦੱਸੇ ਸ਼ਿਫ਼ਟ 'ਤੇ ਨਾ ਆਉਣਾ ਮੈਨੇਜਰ ਦਾ ਭਰੋਸਾ ਗੁਆਉਣ ਦੇ ਸਭ ਤੋਂ ਤੇਜ਼ ਤਰੀਕਿਆਂ ਵਿੱਚੋਂ ਇੱਕ ਹੈ।

ਬਿਮਾਰ ਹੋਣ 'ਤੇ ਦੱਸਣਾ (calling in sick)

ਹਰ ਕੋਈ ਬਿਮਾਰ ਹੁੰਦਾ ਹੈ। ਅਹਿਮ ਗੱਲ ਇਹ ਹੈ ਕਿ ਤੁਸੀਂ ਆਪਣੇ ਮਾਲਕ ਨੂੰ ਕਿਵੇਂ ਦੱਸਦੇ ਹੋ।

ਨੌਕਰੀ ਦੇ ਸ਼ੁਰੂ ਵਿੱਚ ਹੀ ਪੁੱਛ ਲਓ ਕਿ ਤੁਹਾਡੀ ਕੰਮ ਵਾਲੀ ਥਾਂ 'ਤੇ ਬਿਮਾਰ ਹੋਣ ਦੀ ਖ਼ਬਰ ਕਿਵੇਂ ਦੇਣੀ ਹੁੰਦੀ ਹੈ, ਅਤੇ ਕਿਸਨੂੰ ਦੱਸਣਾ ਹੈ।
ਜਿੰਨੀ ਛੇਤੀ ਹੋ ਸਕੇ ਦੱਸੋ, ਬਿਹਤਰ ਹੈ ਕਿ ਸ਼ਿਫ਼ਟ ਸ਼ੁਰੂ ਹੋਣ ਤੋਂ ਪਹਿਲਾਂ। ਅਕਸਰ ਟੈਕਸਟ ਨਾਲੋਂ ਫ਼ੋਨ ਕਾਲ ਬਿਹਤਰ ਹੁੰਦੀ ਹੈ, ਪਰ ਆਪਣੀ ਕੰਮ ਵਾਲੀ ਥਾਂ ਦਾ ਨਿਯਮ ਮੰਨੋ।
ਗੱਲ ਛੋਟੀ ਰੱਖੋ। "I have a fever and can't come in today" (ਮੈਨੂੰ ਬੁਖ਼ਾਰ ਹੈ ਅਤੇ ਮੈਂ ਅੱਜ ਨਹੀਂ ਆ ਸਕਦਾ/ਸਕਦੀ) ਕਹਿਣਾ ਕਾਫ਼ੀ ਹੈ। ਤੁਹਾਨੂੰ ਆਪਣੀ ਸਿਹਤ ਦੇ ਨਿੱਜੀ ਵੇਰਵੇ ਦੱਸਣ ਦੀ ਲੋੜ ਨਹੀਂ।

ਬੀ.ਸੀ. ਵਿੱਚ ਤੁਹਾਡੇ ਹੱਕ। ਆਪਣੇ ਮਾਲਕ ਕੋਲ ਨੌਕਰੀ ਦੇ 90 ਦਿਨ ਪੂਰੇ ਹੋਣ ਤੋਂ ਬਾਅਦ, ਤੁਹਾਨੂੰ ਹਰ ਕੈਲੰਡਰ ਸਾਲ ਵਿੱਚ 5 ਦਿਨਾਂ ਤੱਕ ਤਨਖਾਹ ਵਾਲੀ ਬਿਮਾਰੀ ਦੀ ਛੁੱਟੀ, ਅਤੇ ਨਾਲ 3 ਦਿਨ ਬਿਨਾਂ ਤਨਖਾਹ ਵਾਲੀ ਬਿਮਾਰੀ ਦੀ ਛੁੱਟੀ ਮਿਲਦੀ ਹੈ। ਪਾਰਟ-ਟਾਈਮ ਅਤੇ ਕੈਜ਼ੂਅਲ ਵਰਕਰ ਵੀ ਇਸ ਵਿੱਚ ਸ਼ਾਮਲ ਹਨ। ਜੇ ਤੁਸੀਂ ਬਿਮਾਰ ਹੋਣ ਕਰਕੇ ਕੰਮ ਨਹੀਂ ਕਰ ਸਕਦੇ, ਤਾਂ ਜਿੰਨੀ ਛੇਤੀ ਹੋ ਸਕੇ ਆਪਣੇ ਮਾਲਕ ਨੂੰ ਦੱਸੋ। ਤੁਹਾਡਾ ਮਾਲਕ ਇਸ ਗੱਲ ਦਾ ਵਾਜਬ ਸਬੂਤ ਮੰਗ ਸਕਦਾ ਹੈ ਕਿ ਤੁਸੀਂ ਬਿਮਾਰ ਸੀ (ਬੀ.ਸੀ. ਵਿੱਚ ਤਨਖਾਹ ਵਾਲੀ ਬਿਮਾਰੀ ਦੀ ਛੁੱਟੀ, ਬੀ.ਸੀ. ਵਿੱਚ ਛੁੱਟੀਆਂ (leaves of absence))।

ਓਨਟਾਰੀਓ ਵਿੱਚ ਤੁਹਾਡੇ ਹੱਕ। ਆਪਣੇ ਮਾਲਕ ਕੋਲ ਲਗਾਤਾਰ 2 ਹਫ਼ਤੇ ਕੰਮ ਕਰਨ ਤੋਂ ਬਾਅਦ, ਤੁਹਾਨੂੰ ਹਰ ਕੈਲੰਡਰ ਸਾਲ ਵਿੱਚ 3 ਦਿਨਾਂ ਤੱਕ ਬਿਨਾਂ ਤਨਖਾਹ ਵਾਲੀ ਬਿਮਾਰੀ ਦੀ ਛੁੱਟੀ ਮਿਲਦੀ ਹੈ, ਜਿਸ ਦੌਰਾਨ ਤੁਹਾਡੀ ਨੌਕਰੀ ਸੁਰੱਖਿਅਤ ਰਹਿੰਦੀ ਹੈ (job-protected)। ਤੁਹਾਡਾ ਮਾਲਕ ਇਹਨਾਂ ਦਿਨਾਂ ਲਈ ਤੁਹਾਨੂੰ ਡਾਕਟਰ ਦਾ ਨੋਟ ਲਿਆਉਣ ਲਈ ਮਜਬੂਰ ਨਹੀਂ ਕਰ ਸਕਦਾ, ਪਰ ਉਹ ਕੋਈ ਹੋਰ ਵਾਜਬ ਸਬੂਤ ਮੰਗ ਸਕਦਾ ਹੈ। ਛੁੱਟੀ ਸ਼ੁਰੂ ਕਰਨ ਤੋਂ ਪਹਿਲਾਂ ਆਪਣੇ ਮਾਲਕ ਨੂੰ ਦੱਸੋ, ਜਾਂ ਜੇ ਇਹ ਨਾ ਹੋ ਸਕੇ, ਤਾਂ ਛੁੱਟੀ ਸ਼ੁਰੂ ਹੋਣ ਤੋਂ ਬਾਅਦ ਜਿੰਨੀ ਛੇਤੀ ਹੋ ਸਕੇ (ਓਨਟਾਰੀਓ ਵਿੱਚ ਬਿਮਾਰੀ ਦੀ ਛੁੱਟੀ)।

ਤੁਹਾਡਾ ਮਾਲਕ ਇਸ ਤੋਂ ਵੱਧ ਦੇ ਸਕਦਾ ਹੈ। ਆਪਣਾ ਕੰਟਰੈਕਟ ਚੈੱਕ ਕਰੋ ਜਾਂ ਪੁੱਛੋ।

ਸਵਾਲ ਪੁੱਛਣਾ ਅਤੇ ਆਪਣੀਆਂ ਗ਼ਲਤੀਆਂ ਮੰਨਣਾ

ਸਵਾਲ ਪੁੱਛਣਾ ਆਮ ਗੱਲ ਹੈ। ਜ਼ਿਆਦਾਤਰ ਮੈਨੇਜਰ ਬਾਅਦ ਵਿੱਚ ਗ਼ਲਤੀ ਠੀਕ ਕਰਨ ਨਾਲੋਂ ਸਵਾਲ ਦਾ ਜਵਾਬ ਦੇਣਾ ਪਸੰਦ ਕਰਦੇ ਹਨ।

ਜਦੋਂ ਕੋਈ ਤੁਹਾਨੂੰ ਕੋਈ ਕੰਮ ਸਿਖਾਉਂਦਾ ਹੈ, ਤਾਂ ਕਦਮ ਦੁਹਰਾ ਕੇ ਸੁਣਾਓ, ਤਾਂ ਜੋ ਪੱਕਾ ਹੋ ਜਾਵੇ ਕਿ ਤੁਸੀਂ ਸਮਝ ਗਏ ਹੋ।
ਜੇ ਸਮਝ ਨਹੀਂ ਆਈ, ਤਾਂ ਦੱਸ ਦਿਓ। "Sorry, could you show me that again?" (ਮਾਫ਼ ਕਰਨਾ, ਕੀ ਤੁਸੀਂ ਮੈਨੂੰ ਇਹ ਦੁਬਾਰਾ ਦਿਖਾ ਸਕਦੇ ਹੋ?) ਕਹਿਣਾ ਠੀਕ ਹੈ।
ਗੱਲਾਂ ਲਿਖ ਲਓ, ਤਾਂ ਜੋ ਤੁਹਾਨੂੰ ਇੱਕੋ ਸਵਾਲ ਵਾਰ-ਵਾਰ ਨਾ ਪੁੱਛਣਾ ਪਵੇ।

ਨਵੀਂ ਨੌਕਰੀ 'ਤੇ ਹਰ ਕੋਈ ਗ਼ਲਤੀਆਂ ਕਰਦਾ ਹੈ। ਜਦੋਂ ਤੁਹਾਡੇ ਤੋਂ ਕੋਈ ਗ਼ਲਤੀ ਹੋ ਜਾਵੇ, ਤਾਂ ਉਸੇ ਵੇਲੇ ਆਪਣੇ ਸੁਪਰਵਾਈਜ਼ਰ ਨੂੰ ਦੱਸੋ। ਇਹ ਸਭ ਤੋਂ ਜ਼ਿਆਦਾ ਜ਼ਰੂਰੀ ਉਦੋਂ ਹੈ ਜਦੋਂ ਗੱਲ ਪੈਸਿਆਂ, ਖਾਣੇ ਦੀ ਸੁਰੱਖਿਆ (food safety), ਜਾਂ ਕਿਸੇ ਅਜਿਹੀ ਚੀਜ਼ ਦੀ ਹੋਵੇ ਜਿਸ ਨਾਲ ਕਿਸੇ ਨੂੰ ਸੱਟ ਲੱਗ ਸਕਦੀ ਹੈ। ਗ਼ਲਤੀ ਛੇਤੀ ਮੰਨਣ ਨਾਲ ਭਰੋਸਾ ਬਣਦਾ ਹੈ। ਗ਼ਲਤੀ ਲੁਕਾਉਣ ਨਾਲ ਆਮ ਤੌਰ 'ਤੇ ਗੱਲ ਹੋਰ ਵਿਗੜ ਜਾਂਦੀ ਹੈ।

ਬ੍ਰੇਕ

ਕਾਨੂੰਨ ਖਾਣੇ ਦੀ ਬ੍ਰੇਕ ਲਈ ਘੱਟੋ-ਘੱਟ ਨਿਯਮ ਤੈਅ ਕਰਦਾ ਹੈ। ਤੁਹਾਡੀ ਕੰਮ ਵਾਲੀ ਥਾਂ ਇਸ ਤੋਂ ਵੱਧ ਦੇ ਸਕਦੀ ਹੈ।

ਬੀ.ਸੀ. ਜੇ ਤੁਸੀਂ ਲਗਾਤਾਰ 5 ਘੰਟਿਆਂ ਤੋਂ ਵੱਧ ਕੰਮ ਕਰਦੇ ਹੋ, ਤਾਂ ਤੁਹਾਨੂੰ 30 ਮਿੰਟ ਦੀ ਖਾਣੇ ਦੀ ਬ੍ਰੇਕ ਮਿਲਣੀ ਲਾਜ਼ਮੀ ਹੈ। ਇਸਦੀ ਤਨਖਾਹ ਨਹੀਂ ਮਿਲਦੀ, ਸਿਵਾਏ ਉਦੋਂ ਜਦੋਂ ਤੁਹਾਡਾ ਮਾਲਕ ਕਹਿੰਦਾ ਹੈ ਕਿ ਬ੍ਰੇਕ ਦੌਰਾਨ ਤੁਸੀਂ ਕੰਮ ਕਰੋ ਜਾਂ ਕੰਮ ਲਈ ਹਾਜ਼ਰ ਰਹੋ। ਮਾਲਕਾਂ ਲਈ ਕੌਫ਼ੀ ਬ੍ਰੇਕ ਦੇਣਾ ਜ਼ਰੂਰੀ ਨਹੀਂ ਹੈ (ਬੀ.ਸੀ. ਵਿੱਚ ਕੰਮ ਦੇ ਘੰਟੇ)।

ਓਨਟਾਰੀਓ। ਤੁਸੀਂ 30 ਮਿੰਟ ਦੇ ਖਾਣੇ ਦੇ ਸਮੇਂ (eating period) ਤੋਂ ਬਿਨਾਂ ਲਗਾਤਾਰ 5 ਘੰਟਿਆਂ ਤੋਂ ਵੱਧ ਕੰਮ ਨਹੀਂ ਕਰ ਸਕਦੇ। ਇਸਦੀ ਤਨਖਾਹ ਨਹੀਂ ਮਿਲਦੀ, ਜਦੋਂ ਤੱਕ ਤੁਹਾਡੇ ਕੰਟਰੈਕਟ ਵਿੱਚ ਕੁਝ ਹੋਰ ਨਾ ਲਿਖਿਆ ਹੋਵੇ। ਮਾਲਕਾਂ ਲਈ ਕੌਫ਼ੀ ਬ੍ਰੇਕ ਦੇਣਾ ਜ਼ਰੂਰੀ ਨਹੀਂ ਹੈ। ਜੇ ਤੁਹਾਡਾ ਮਾਲਕ ਤੁਹਾਨੂੰ ਕੌਫ਼ੀ ਬ੍ਰੇਕ ਜਾਂ ਕੋਈ ਹੋਰ ਛੋਟੀ ਬ੍ਰੇਕ ਦਿੰਦਾ ਹੈ, ਪਰ ਉਸ ਦੌਰਾਨ ਤੁਹਾਡਾ ਕੰਮ ਵਾਲੀ ਥਾਂ 'ਤੇ ਹੀ ਰਹਿਣਾ ਜ਼ਰੂਰੀ ਕਰਦਾ ਹੈ, ਤਾਂ ਉਸ ਸਮੇਂ ਲਈ ਤੁਹਾਨੂੰ ਘੱਟੋ-ਘੱਟ ਤਨਖਾਹ (minimum wage) ਜਿੰਨੇ ਪੈਸੇ ਤਾਂ ਮਿਲਣੇ ਹੀ ਚਾਹੀਦੇ ਹਨ (ਓਨਟਾਰੀਓ ਵਿੱਚ ਕੰਮ ਦੇ ਘੰਟੇ)।

ਬ੍ਰੇਕ ਦੇ ਕੁਝ ਚੰਗੇ ਤੌਰ-ਤਰੀਕੇ:

ਪੁੱਛੋ ਕਿ ਤੁਸੀਂ ਆਪਣੀ ਬ੍ਰੇਕ ਕਦੋਂ ਲੈ ਸਕਦੇ ਹੋ। ਬਿਜ਼ੀ ਨੌਕਰੀਆਂ ਵਿੱਚ ਬ੍ਰੇਕਾਂ ਅਕਸਰ ਭੀੜ ਵਾਲੇ ਸਮੇਂ (rush times) ਨੂੰ ਧਿਆਨ ਵਿੱਚ ਰੱਖ ਕੇ ਤੈਅ ਕੀਤੀਆਂ ਜਾਂਦੀਆਂ ਹਨ।
ਜਾਣ ਤੋਂ ਪਹਿਲਾਂ ਕਿਸੇ ਸਾਥੀ ਮੁਲਾਜ਼ਮ ਜਾਂ ਆਪਣੇ ਸੁਪਰਵਾਈਜ਼ਰ ਨੂੰ ਦੱਸੋ।
ਸਮੇਂ ਸਿਰ ਵਾਪਸ ਆਓ।
ਬ੍ਰੇਕ ਵਾਲੀ ਥਾਂ 'ਤੇ ਖਾਓ ਅਤੇ ਫ਼ੋਨ ਵਰਤੋ, ਗਾਹਕਾਂ ਦੇ ਸਾਹਮਣੇ ਨਹੀਂ, ਜਦੋਂ ਤੱਕ ਤੁਹਾਡਾ ਮੈਨੇਜਰ ਕੁਝ ਹੋਰ ਨਾ ਕਹੇ।

ਕੰਮ 'ਤੇ ਫ਼ੋਨ

ਬਹੁਤ ਸਾਰੀਆਂ ਕੰਮ ਵਾਲੀਆਂ ਥਾਵਾਂ 'ਤੇ ਸ਼ਿਫ਼ਟ ਦੌਰਾਨ ਨਿੱਜੀ ਫ਼ੋਨਾਂ ਬਾਰੇ ਨਿਯਮ ਹੁੰਦੇ ਹਨ। ਪੁੱਛੋ ਕਿ ਤੁਹਾਡੀ ਕੰਮ ਵਾਲੀ ਥਾਂ ਕੀ ਉਮੀਦ ਰੱਖਦੀ ਹੈ। ਇੱਕ ਸੁਰੱਖਿਅਤ ਆਦਤ ਇਹ ਹੈ ਕਿ ਕੰਮ ਕਰਦੇ ਵੇਲੇ ਫ਼ੋਨ ਦੂਰ ਰੱਖੋ ਅਤੇ ਬ੍ਰੇਕ ਵੇਲੇ ਚੈੱਕ ਕਰੋ। ਜੇ ਤੁਸੀਂ ਕਿਸੇ ਜ਼ਰੂਰੀ ਕਾਲ ਦੀ ਉਡੀਕ ਕਰ ਰਹੇ ਹੋ, ਤਾਂ ਸ਼ਿਫ਼ਟ ਦੇ ਸ਼ੁਰੂ ਵਿੱਚ ਹੀ ਆਪਣੇ ਮੈਨੇਜਰ ਨੂੰ ਦੱਸ ਦਿਓ।

ਟੀਮ ਵਜੋਂ ਕੰਮ ਕਰਨਾ

ਐਂਟਰੀ-ਲੈਵਲ ਨੌਕਰੀਆਂ ਵਿੱਚ, ਟੀਮਵਰਕ ਅਕਸਰ ਤੇਜ਼ੀ ਨਾਲੋਂ ਜ਼ਿਆਦਾ ਮਾਇਨੇ ਰੱਖਦਾ ਹੈ।

ਬਿਨਾਂ ਕਹੇ ਮਦਦ ਕਰੋ। ਜਦੋਂ ਕੰਮ ਘੱਟ ਹੋਵੇ, ਤਾਂ ਕੰਮ ਲੱਭੋ: ਸਮਾਨ ਦੁਬਾਰਾ ਭਰੋ (restock), ਸਫ਼ਾਈ ਕਰੋ, ਜਾਂ ਕਿਸੇ ਸਾਥੀ ਤੋਂ ਪੁੱਛੋ ਕਿ ਕੀ ਉਸਨੂੰ ਮਦਦ ਚਾਹੀਦੀ ਹੈ।
ਜੋ ਕੰਮ ਸ਼ੁਰੂ ਕਰੋ, ਉਸਨੂੰ ਪੂਰਾ ਕਰੋ, ਜਾਂ ਅਗਲੇ ਵਿਅਕਤੀ ਨੂੰ ਦੱਸੋ ਕਿ ਅਜੇ ਕੀ ਕਰਨਾ ਬਾਕੀ ਹੈ।
ਸ਼ਿਫ਼ਟਾਂ ਬਦਲਣ ਲਈ ਅਧਿਕਾਰਤ ਤਰੀਕਾ ਵਰਤੋ। ਆਪਣੇ ਮੈਨੇਜਰ ਨੂੰ ਦੱਸੇ ਬਿਨਾਂ ਸਿਰਫ਼ ਕਿਸੇ ਦੋਸਤ ਨੂੰ ਆਪਣੀ ਸ਼ਿਫ਼ਟ ਕਵਰ ਕਰਨ ਲਈ ਨਾ ਕਹੋ।
ਹਰ ਕਿਸੇ ਦੀ ਇੱਜ਼ਤ ਕਰੋ, ਵੱਖ-ਵੱਖ ਪਿਛੋਕੜਾਂ, ਉਮਰਾਂ, ਅਤੇ ਅਹੁਦਿਆਂ ਵਾਲੇ ਸਾਥੀਆਂ ਸਮੇਤ।

ਬਹੁਤ ਸਾਰੀਆਂ ਕੰਮ ਵਾਲੀਆਂ ਥਾਵਾਂ 'ਤੇ ਲੋਕ ਇੱਕ-ਦੂਜੇ ਨੂੰ ਪਹਿਲੇ ਨਾਮ ਨਾਲ ਬੁਲਾਉਂਦੇ ਹਨ, ਮੈਨੇਜਰਾਂ ਨੂੰ ਵੀ। ਜੇ ਤੁਹਾਨੂੰ ਪੱਕਾ ਨਹੀਂ ਪਤਾ, ਤਾਂ ਪੁੱਛ ਲਓ: "What should I call you?" (ਮੈਂ ਤੁਹਾਨੂੰ ਕੀ ਕਹਿ ਕੇ ਬੁਲਾਵਾਂ?)

ਫ਼ੀਡਬੈਕ

ਤੁਹਾਡਾ ਮੈਨੇਜਰ ਤੁਹਾਨੂੰ ਦੱਸੇਗਾ ਕਿ ਤੁਸੀਂ ਕੀ ਚੰਗਾ ਕਰ ਰਹੇ ਹੋ ਅਤੇ ਕੀ ਬਦਲਣਾ ਹੈ। ਇਹ ਨੌਕਰੀ ਸਿੱਖਣ ਦਾ ਆਮ ਹਿੱਸਾ ਹੈ। ਇਸਦਾ ਮਤਲਬ ਇਹ ਨਹੀਂ ਕਿ ਤੁਸੀਂ ਕਿਸੇ ਮੁਸ਼ਕਲ ਵਿੱਚ ਫਸ ਗਏ ਹੋ।

ਕੁਝ ਮੈਨੇਜਰ ਹਦਾਇਤਾਂ ਨਿਮਰਤਾ ਨਾਲ, ਸੁਝਾਅ ਵਾਂਗ ਦਿੰਦੇ ਹਨ। "Could you try..." (ਕੀ ਤੁਸੀਂ ਇਹ ਕਰਕੇ ਦੇਖ ਸਕਦੇ ਹੋ...) ਜਾਂ "It might be better to..." (ਸ਼ਾਇਦ ਇਹ ਕਰਨਾ ਬਿਹਤਰ ਹੋਵੇ...) ਦਾ ਮਤਲਬ ਅਕਸਰ ਇਹ ਹੁੰਦਾ ਹੈ: "ਕਿਰਪਾ ਕਰਕੇ ਇਸ ਤਰ੍ਹਾਂ ਕਰੋ।" ਜੇ ਤੁਹਾਨੂੰ ਪੱਕਾ ਨਹੀਂ ਪਤਾ, ਤਾਂ ਪੁੱਛੋ: "Should I do it this way from now on?" (ਕੀ ਮੈਂ ਹੁਣ ਤੋਂ ਇਹ ਇਸੇ ਤਰ੍ਹਾਂ ਕਰਾਂ?)

ਜਦੋਂ ਤੁਹਾਨੂੰ ਫ਼ੀਡਬੈਕ ਮਿਲੇ:

ਪਹਿਲਾਂ ਸੁਣੋ, ਅਤੇ ਵਿੱਚੋਂ ਨਾ ਟੋਕੋ।
ਧੰਨਵਾਦ ਕਹੋ, ਅਤੇ ਜੇ ਕੋਈ ਗੱਲ ਸਾਫ਼ ਨਹੀਂ ਤਾਂ ਸਵਾਲ ਪੁੱਛੋ।
ਜੇ ਤੁਸੀਂ ਸਹਿਮਤ ਨਹੀਂ ਹੋ, ਤਾਂ ਆਪਣੇ ਮੈਨੇਜਰ ਨਾਲ ਇਕੱਲਿਆਂ ਵਿੱਚ ਅਤੇ ਠਰ੍ਹੰਮੇ ਨਾਲ ਗੱਲ ਕਰੋ, ਗਾਹਕਾਂ ਦੇ ਸਾਹਮਣੇ ਨਹੀਂ।

ਤੁਸੀਂ ਆਪ ਵੀ ਫ਼ੀਡਬੈਕ ਮੰਗ ਸਕਦੇ ਹੋ। ਕੁਝ ਹਫ਼ਤਿਆਂ ਬਾਅਦ ਪੁੱਛ ਕੇ ਦੇਖੋ: "Is there anything I should do differently?" (ਕੀ ਕੋਈ ਅਜਿਹੀ ਗੱਲ ਹੈ ਜੋ ਮੈਨੂੰ ਵੱਖਰੇ ਢੰਗ ਨਾਲ ਕਰਨੀ ਚਾਹੀਦੀ ਹੈ?)

ਹਲਕੀ-ਫੁਲਕੀ ਗੱਲਬਾਤ (small talk)

ਸਾਥੀ ਮੁਲਾਜ਼ਮ ਅਕਸਰ ਸ਼ਿਫ਼ਟ ਦੇ ਸ਼ੁਰੂ ਵਿੱਚ ਜਾਂ ਬ੍ਰੇਕ ਵੇਲੇ ਇੱਕ-ਦੋ ਮਿੰਟ ਗੱਲਾਂ ਕਰਦੇ ਹਨ। ਹਲਕੀ-ਫੁਲਕੀ ਗੱਲਬਾਤ ਨਾਲ ਲੋਕ ਇੱਕ-ਦੂਜੇ ਨਾਲ ਸਹਿਜ ਮਹਿਸੂਸ ਕਰਦੇ ਹਨ। ਇਸ ਨਾਲ ਤੁਹਾਨੂੰ ਅੰਗਰੇਜ਼ੀ ਦੀ ਪ੍ਰੈਕਟਿਸ ਕਰਨ ਵਿੱਚ ਵੀ ਮਦਦ ਮਿਲਦੀ ਹੈ।

ਸੌਖੇ ਵਿਸ਼ਿਆਂ ਵਿੱਚ ਸ਼ਾਮਲ ਹਨ: ਵੀਕਐਂਡ ਦੇ ਪਲਾਨ, ਮੌਸਮ, ਖਾਣਾ, ਫ਼ਿਲਮਾਂ ਅਤੇ ਸ਼ੋਅ, ਖੇਡਾਂ, ਅਤੇ ਸਥਾਨਕ ਸਮਾਗਮ। ਬਹੁਤ ਸਾਰੇ ਲੋਕ ਤਨਖਾਹ, ਧਰਮ, ਅਤੇ ਰਾਜਨੀਤੀ ਵਰਗੇ ਵਿਸ਼ਿਆਂ ਬਾਰੇ ਸਿਰਫ਼ ਉਹਨਾਂ ਲੋਕਾਂ ਨਾਲ ਗੱਲ ਕਰਦੇ ਹਨ ਜਿਨ੍ਹਾਂ ਨੂੰ ਉਹ ਚੰਗੀ ਤਰ੍ਹਾਂ ਜਾਣਦੇ ਹਨ। ਕੰਮ 'ਤੇ ਕਿਸੇ ਦੀ ਉਮਰ, ਰਿਸ਼ਤੇ, ਜਾਂ ਸਰੀਰ ਬਾਰੇ ਸਵਾਲ ਬਹੁਤ ਨਿੱਜੀ ਲੱਗ ਸਕਦੇ ਹਨ।

ਜੇ ਤੁਹਾਨੂੰ ਕਿਸੇ ਦੀ ਗੱਲ ਸਮਝ ਨਹੀਂ ਆਈ, ਤਾਂ ਉਸਨੂੰ ਦੁਬਾਰਾ ਕਹਿਣ ਲਈ ਕਹਿਣਾ ਠੀਕ ਹੈ: "Sorry, I'm still learning English. Could you say that again?" (ਮਾਫ਼ ਕਰਨਾ, ਮੈਂ ਅਜੇ ਅੰਗਰੇਜ਼ੀ ਸਿੱਖ ਰਿਹਾ/ਰਹੀ ਹਾਂ। ਕੀ ਤੁਸੀਂ ਇਹ ਦੁਬਾਰਾ ਕਹਿ ਸਕਦੇ ਹੋ?) ਜ਼ਿਆਦਾਤਰ ਲੋਕ ਖ਼ੁਸ਼ੀ ਨਾਲ ਮਦਦ ਕਰਦੇ ਹਨ।

ਤੁਹਾਨੂੰ ਹਰ ਗੱਲਬਾਤ ਵਿੱਚ ਸ਼ਾਮਲ ਹੋਣ ਦੀ ਲੋੜ ਨਹੀਂ। ਇੱਕ ਮੁਸਕਰਾਹਟ, "Good morning" (ਗੁੱਡ ਮੌਰਨਿੰਗ), ਅਤੇ ਲੋਕਾਂ ਦੇ ਨਾਮ ਯਾਦ ਰੱਖਣਾ ਬਹੁਤ ਕੰਮ ਆਉਂਦੇ ਹਨ।

ਜਦੋਂ ਕੁਝ ਠੀਕ ਨਾ ਹੋਵੇ

ਘੁਲਣ-ਮਿਲਣ ਦਾ ਮਤਲਬ ਇਹ ਨਹੀਂ ਕਿ ਤੁਸੀਂ ਨਾਜਾਇਜ਼ ਸਲੂਕ ਬਰਦਾਸ਼ਤ ਕਰੋ। ਕੰਮ 'ਤੇ ਤੁਹਾਡੇ ਹੱਕ ਹਨ, ਆਪਣੇ ਪਹਿਲੇ ਹਫ਼ਤੇ ਵਿੱਚ ਵੀ:

ਅਸੁਰੱਖਿਅਤ ਕੰਮ: ਬੀ.ਸੀ. ਅਤੇ ਓਨਟਾਰੀਓ ਵਿੱਚ ਅਸੁਰੱਖਿਅਤ ਕੰਮ ਤੋਂ ਇਨਕਾਰ ਕਿਵੇਂ ਕਰੀਏ
ਧੱਕੇਸ਼ਾਹੀ ਜਾਂ ਤੰਗ-ਪਰੇਸ਼ਾਨੀ: ਕੰਮ 'ਤੇ ਧੱਕੇਸ਼ਾਹੀ, ਤੰਗ-ਪਰੇਸ਼ਾਨੀ ਅਤੇ ਵਿਤਕਰਾ
ਤਨਖਾਹ, ਬ੍ਰੇਕ, ਅਤੇ ਘੰਟੇ: ਬੀ.ਸੀ. ਵਿੱਚ ਕੰਮ ਦੌਰਾਨ ਤੁਹਾਡੇ ਹੱਕ ਅਤੇ ਓਨਟਾਰੀਓ ਵਿੱਚ ਕੰਮ ਦੌਰਾਨ ਤੁਹਾਡੇ ਹੱਕ

ਅਗਲੇ ਕਦਮ

ਜਲਦੀ ਨੌਕਰੀ ਸ਼ੁਰੂ ਕਰ ਰਹੇ ਹੋ? ਪੜ੍ਹੋ ਨਵੀਂ ਨੌਕਰੀ 'ਤੇ ਤੁਹਾਡਾ ਪਹਿਲਾ ਹਫ਼ਤਾ
ਕੈਨੇਡਾ ਵਿੱਚ ਨਵੇਂ ਹੋ? ਪੜ੍ਹੋ ਨਵੇਂ ਆਏ ਲੋਕਾਂ ਲਈ ਕੈਨੇਡਾ ਵਿੱਚ ਪਹਿਲੀ ਨੌਕਰੀ
ਮੈਟਰੋ ਵੈਨਕੂਵਰ ਅਤੇ ਗ੍ਰੇਟਰ ਟੋਰਾਂਟੋ ਏਰੀਆ ਵਿੱਚ ਐਂਟਰੀ-ਲੈਵਲ ਨੌਕਰੀਆਂ ਲੱਭੋ