ਰਿਟੇਲ ਸਟੋਰ ਐਸੋਸੀਏਟ ਦੀਆਂ ਨੌਕਰੀਆਂ

ਕੱਪੜਿਆਂ ਦੇ ਸਟੋਰ, ਜੁੱਤੀਆਂ ਦੇ ਸਟੋਰ, ਇਲੈਕਟ੍ਰਾਨਿਕਸ ਸਟੋਰ, ਘਰੇਲੂ ਸਮਾਨ ਦੇ ਸਟੋਰ, ਅਤੇ ਵੱਡੇ (big-box) ਸਟੋਰ, ਸਭ ਸਟੋਰ ਐਸੋਸੀਏਟ ਰੱਖਦੇ ਹਨ। ਇਹਨਾਂ ਵਿੱਚੋਂ ਬਹੁਤ ਸਾਰੀਆਂ ਨੌਕਰੀਆਂ ਉਹਨਾਂ ਲੋਕਾਂ ਲਈ ਵੀ ਖੁੱਲ੍ਹੀਆਂ ਹਨ ਜਿਨ੍ਹਾਂ ਕੋਲ ਕੰਮ ਦਾ ਕੋਈ ਤਜਰਬਾ ਨਹੀਂ। ਜੇ ਤੁਹਾਨੂੰ ਲੋਕਾਂ ਦੀ ਮਦਦ ਕਰਨਾ ਅਤੇ ਚੀਜ਼ਾਂ ਨੂੰ ਤਰਤੀਬ ਵਿੱਚ ਰੱਖਣਾ ਚੰਗਾ ਲੱਗਦਾ ਹੈ, ਤਾਂ ਰਿਟੇਲ ਸ਼ੁਰੂਆਤ ਲਈ ਵਧੀਆ ਥਾਂ ਹੋ ਸਕਦੀ ਹੈ।

ਅਸੀਂ ਇਸ ਗਾਈਡ ਦੀ ਜਾਣਕਾਰੀ 12 ਅਕਤੂਬਰ 2026 ਨੂੰ ਚੈੱਕ ਕੀਤੀ ਸੀ। ਨਿਯਮ ਅਤੇ ਰੇਟ ਬਦਲਦੇ ਰਹਿੰਦੇ ਹਨ, ਇਸ ਲਈ ਤਾਜ਼ਾ ਜਾਣਕਾਰੀ ਲਈ ਲਿੰਕਾਂ ਰਾਹੀਂ ਸਰਕਾਰੀ ਪੰਨੇ ਦੇਖੋ।

ਨੌਕਰੀਆਂ ਦੇ ਆਮ ਨਾਮ

ਸਟੋਰ ਮਿਲਦੀਆਂ-ਜੁਲਦੀਆਂ ਨੌਕਰੀਆਂ ਲਈ ਵੱਖ-ਵੱਖ ਨਾਮ ਵਰਤਦੇ ਹਨ। ਇਹ ਉਹ ਨਾਮ ਹਨ ਜੋ ਤੁਸੀਂ ਸਭ ਤੋਂ ਵੱਧ ਦੇਖੋਗੇ:

ਸੇਲਜ਼ ਐਸੋਸੀਏਟ ਜਾਂ ਸਟੋਰ ਐਸੋਸੀਏਟ (sales associate, store associate)। ਤੁਸੀਂ ਗਾਹਕਾਂ ਦਾ ਸਵਾਗਤ ਕਰਦੇ ਹੋ, ਉਹਨਾਂ ਨੂੰ ਪ੍ਰੋਡਕਟ ਅਤੇ ਸਾਈਜ਼ ਲੱਭਣ ਵਿੱਚ ਮਦਦ ਕਰਦੇ ਹੋ, ਸਵਾਲਾਂ ਦੇ ਜਵਾਬ ਦਿੰਦੇ ਹੋ, ਅਤੇ ਸੇਲਜ਼ ਫ਼ਲੋਰ (ਸਟੋਰ ਦਾ ਉਹ ਹਿੱਸਾ ਜਿੱਥੇ ਗਾਹਕ ਖ਼ਰੀਦਦਾਰੀ ਕਰਦੇ ਹਨ) ਸਾਫ਼-ਸੁਥਰਾ ਰੱਖਦੇ ਹੋ।
ਸਟਾਕ ਐਸੋਸੀਏਟ ਜਾਂ ਮਰਚੈਂਡਾਈਜ਼ਰ (stock associate, merchandiser)। ਤੁਸੀਂ ਡਿਲੀਵਰੀਆਂ ਉਤਾਰਦੇ ਹੋ, ਪ੍ਰੋਡਕਟ ਗਿਣਦੇ ਹੋ ਅਤੇ ਉਹਨਾਂ 'ਤੇ ਕੀਮਤਾਂ ਲਾਉਂਦੇ ਹੋ, ਸ਼ੈਲਫ਼ਾਂ ਭਰਦੇ ਹੋ, ਅਤੇ ਡਿਸਪਲੇ ਤਿਆਰ ਕਰਦੇ ਹੋ। ਸਾਡੀ ਵੇਅਰਹਾਊਸ ਅਤੇ ਸਟਾਕਿੰਗ ਗਾਈਡ ਇਸ ਕੰਮ ਬਾਰੇ ਹੋਰ ਵਿਸਥਾਰ ਨਾਲ ਦੱਸਦੀ ਹੈ।
ਕੈਸ਼ੀਅਰ। ਤੁਸੀਂ ਪੇਮੈਂਟ ਲੈਂਦੇ ਹੋ, ਵਾਪਸ ਕੀਤਾ ਸਮਾਨ (returns) ਲੈਂਦੇ ਹੋ, ਅਤੇ ਚੈੱਕਆਊਟ 'ਤੇ ਮਦਦ ਕਰਦੇ ਹੋ। ਦੇਖੋ ਕੈਸ਼ੀਅਰ ਦੀਆਂ ਨੌਕਰੀਆਂ।
ਫ਼ਿਟਿੰਗ ਰੂਮ ਅਟੈਂਡੈਂਟ (fitting room attendant)। ਤੁਸੀਂ ਕੱਪੜੇ ਪਾ ਕੇ ਦੇਖਣ ਵਾਲੇ ਕਮਰਿਆਂ (fitting rooms) ਵਿੱਚ ਜਾਣ ਅਤੇ ਉੱਥੋਂ ਬਾਹਰ ਆਉਣ ਵਾਲੀਆਂ ਚੀਜ਼ਾਂ ਗਿਣਦੇ ਹੋ, ਕੱਪੜੇ ਵਾਪਸ ਸਟੋਰ ਵਿੱਚ ਉਹਨਾਂ ਦੀ ਥਾਂ 'ਤੇ ਰੱਖਦੇ ਹੋ, ਅਤੇ ਸਾਈਜ਼ ਲੱਭਣ ਵਿੱਚ ਮਦਦ ਕਰਦੇ ਹੋ।
ਆਨਲਾਈਨ ਆਰਡਰ ਐਸੋਸੀਏਟ। ਤੁਸੀਂ ਆਨਲਾਈਨ ਆਰਡਰਾਂ ਲਈ ਚੀਜ਼ਾਂ ਇਕੱਠੀਆਂ ਕਰਦੇ (pick) ਹੋ ਅਤੇ ਪਿੱਕਅੱਪ ਵੇਲੇ ਗਾਹਕਾਂ ਨੂੰ ਫੜਾਉਂਦੇ ਹੋ।

ਛੋਟੇ ਸਟੋਰਾਂ ਵਿੱਚ, ਅਕਸਰ ਇੱਕੋ ਵਿਅਕਤੀ ਇੱਕੋ ਸ਼ਿਫ਼ਟ ਵਿੱਚ ਇਹ ਸਾਰੇ ਕੰਮ ਕਰਦਾ ਹੈ।

ਸ਼ਿਫ਼ਟ ਕਿਹੋ ਜਿਹੀ ਹੁੰਦੀ ਹੈ

ਓਪਨਿੰਗ ਸ਼ਿਫ਼ਟ (opening shift) ਸਟੋਰ ਦੇ ਦਰਵਾਜ਼ੇ ਖੁੱਲ੍ਹਣ ਤੋਂ ਪਹਿਲਾਂ ਸ਼ੁਰੂ ਹੋ ਸਕਦੀ ਹੈ। ਤੁਸੀਂ ਸ਼ੈਲਫ਼ਾਂ ਭਰ ਸਕਦੇ ਹੋ, ਡਿਸਪਲੇ ਤਿਆਰ ਕਰ ਸਕਦੇ ਹੋ, ਅਤੇ ਕੈਸ਼ ਕਾਊਂਟਰ (tills) ਤਿਆਰ ਕਰ ਸਕਦੇ ਹੋ। ਦਿਨ ਦੌਰਾਨ, ਤੁਸੀਂ ਗਾਹਕਾਂ ਦੀ ਮਦਦ ਕਰਦੇ ਹੋ, ਪ੍ਰੋਡਕਟਾਂ ਨੂੰ ਤਹਿ ਕਰਕੇ ਸਾਫ਼-ਸੁਥਰਾ ਰੱਖਦੇ ਹੋ, ਅਤੇ ਕੈਸ਼ ਰਜਿਸਟਰ 'ਤੇ ਕੰਮ ਕਰਦੇ ਹੋ। ਕਲੋਜ਼ਿੰਗ ਸ਼ਿਫ਼ਟ (closing shift) ਸਟੋਰ ਬੰਦ ਹੋਣ ਤੋਂ ਬਾਅਦ ਖ਼ਤਮ ਹੁੰਦੀ ਹੈ, ਜਿਸ ਵਿੱਚ ਸਫ਼ਾਈ, ਗਿਣਤੀ, ਅਤੇ ਅਗਲੇ ਦਿਨ ਲਈ ਸਟੋਰ ਤਿਆਰ ਕਰਨਾ ਸ਼ਾਮਲ ਹੈ।

ਤੁਸੀਂ ਜ਼ਿਆਦਾਤਰ ਸਮਾਂ ਖੜ੍ਹੇ ਰਹੋਗੇ। ਕੁਝ ਭਾਰ ਚੁੱਕਣ, ਉੱਚੀਆਂ ਥਾਵਾਂ ਤੱਕ ਹੱਥ ਵਧਾਉਣ, ਅਤੇ ਛੋਟੀਆਂ ਪੌੜੀਆਂ (step ladders) 'ਤੇ ਚੜ੍ਹਨ ਦੀ ਉਮੀਦ ਰੱਖੋ।

ਕੰਮ ਆਉਣ ਵਾਲੇ ਹੁਨਰ

ਮਿਲਣਸਾਰਤਾ। ਹੈਲੋ ਕਹੋ, ਮੁਸਕਰਾਓ, ਅਤੇ ਪਿੱਛੇ ਪਏ ਬਿਨਾਂ ਮਦਦ ਦੀ ਪੇਸ਼ਕਸ਼ ਕਰੋ।
ਪ੍ਰੋਡਕਟਾਂ ਦੀ ਜਾਣਕਾਰੀ। ਸਿੱਖੋ ਕਿ ਤੁਹਾਡਾ ਸਟੋਰ ਕੀ ਵੇਚਦਾ ਹੈ। ਗਾਹਕ ਉਸ ਸਟਾਫ਼ 'ਤੇ ਭਰੋਸਾ ਕਰਦੇ ਹਨ ਜਿਸਨੂੰ ਜਵਾਬ ਪਤਾ ਹੋਣ। ਜੇ ਤੁਹਾਨੂੰ ਨਹੀਂ ਪਤਾ, ਤਾਂ ਕਹੋ, "ਮੈਂ ਤੁਹਾਡੇ ਲਈ ਪਤਾ ਕਰਦਾ/ਕਰਦੀ ਹਾਂ।"
ਟੀਮਵਰਕ। ਰਿਟੇਲ ਦਾ ਕੰਮ ਟੀਮਵਰਕ ਨਾਲ ਹੀ ਚੱਲਦਾ ਹੈ, ਖ਼ਾਸ ਕਰਕੇ ਰਸ਼ ਵਾਲੇ ਦਿਨਾਂ ਵਿੱਚ।
ਤਰਤੀਬ। ਚੀਜ਼ਾਂ ਨੂੰ ਵਾਪਸ ਸਹੀ ਥਾਂ 'ਤੇ ਰੱਖਣ ਨਾਲ ਸਾਰਿਆਂ ਦਾ ਕੰਮ ਸੌਖਾ ਹੋ ਜਾਂਦਾ ਹੈ।
ਲਚਕਤਾ। ਸ਼ਡਿਊਲ ਹਫ਼ਤੇ-ਦਰ-ਹਫ਼ਤੇ ਬਦਲਦੇ ਰਹਿੰਦੇ ਹਨ, ਅਤੇ ਤੁਹਾਨੂੰ ਅਕਸਰ ਇੱਕ ਕੰਮ ਤੋਂ ਦੂਜੇ ਕੰਮ 'ਤੇ ਜਾਣਾ ਪੈ ਸਕਦਾ ਹੈ।
ਭਾਸ਼ਾਵਾਂ। ਹਰ ਉਹ ਭਾਸ਼ਾ ਲਿਖੋ ਜੋ ਤੁਸੀਂ ਬੋਲਦੇ ਹੋ। ਇਸ ਨਾਲ ਤੁਸੀਂ ਜ਼ਿਆਦਾ ਗਾਹਕਾਂ ਦੀ ਮਦਦ ਕਰ ਸਕਦੇ ਹੋ।

ਤਨਖਾਹ, ਕਮਿਸ਼ਨ, ਅਤੇ ਵਰਦੀਆਂ

ਤੁਹਾਨੂੰ ਘੱਟੋ-ਘੱਟ ਤਨਖਾਹ (minimum wage) ਜਾਂ ਉਸ ਤੋਂ ਵੱਧ ਮਿਲਣੀ ਚਾਹੀਦੀ ਹੈ: ਬੀ.ਸੀ. ਵਿੱਚ $18.25 ਪ੍ਰਤੀ ਘੰਟਾ (1 ਜੂਨ 2026 ਤੋਂ) ਅਤੇ ਓਨਟਾਰੀਓ ਵਿੱਚ $17.95 ਪ੍ਰਤੀ ਘੰਟਾ (1 ਅਕਤੂਬਰ 2026 ਤੋਂ)। ਓਨਟਾਰੀਓ ਵਿੱਚ $16.90 ਪ੍ਰਤੀ ਘੰਟਾ ਦਾ ਵਿਦਿਆਰਥੀ ਰੇਟ ਵੀ ਹੈ, 18 ਸਾਲ ਤੋਂ ਘੱਟ ਉਮਰ ਦੇ ਉਹਨਾਂ ਵਿਦਿਆਰਥੀਆਂ ਲਈ ਜੋ ਸਕੂਲ ਚੱਲਦੇ ਸਮੇਂ ਹਫ਼ਤੇ ਵਿੱਚ 28 ਘੰਟੇ ਜਾਂ ਘੱਟ ਕੰਮ ਕਰਦੇ ਹਨ, ਜਾਂ ਸਕੂਲ ਦੀ ਬ੍ਰੇਕ ਜਾਂ ਗਰਮੀਆਂ ਦੀਆਂ ਛੁੱਟੀਆਂ ਦੌਰਾਨ ਕੰਮ ਕਰਦੇ ਹਨ।

ਕਮਿਸ਼ਨ। ਕੁਝ ਰਿਟੇਲ ਨੌਕਰੀਆਂ ਵਿੱਚ ਤੁਹਾਡੀ ਤਨਖਾਹ ਦਾ ਕੁਝ ਹਿੱਸਾ ਤੁਹਾਡੀ ਵਿਕਰੀ 'ਤੇ ਕਮਿਸ਼ਨ ਵਜੋਂ ਮਿਲਦਾ ਹੈ। ਦੋਵਾਂ ਸੂਬਿਆਂ ਵਿੱਚ, ਕਮਿਸ਼ਨ ਮਿਲਣ ਨਾਲ ਘੱਟੋ-ਘੱਟ ਤਨਖਾਹ ਦਾ ਨਿਯਮ ਨਹੀਂ ਬਦਲਦਾ:

ਬੀ.ਸੀ. ਵਿੱਚ, ਘੱਟੋ-ਘੱਟ ਤਨਖਾਹ ਲਾਗੂ ਹੁੰਦੀ ਹੈ, ਭਾਵੇਂ ਤੁਹਾਨੂੰ ਘੰਟੇ ਦੇ ਹਿਸਾਬ ਨਾਲ, ਪੱਕੀ ਤਨਖਾਹ (salary) ਵਜੋਂ, ਕਮਿਸ਼ਨ ਵਜੋਂ, ਜਾਂ ਇਨਸੈਂਟਿਵ (incentive) ਦੇ ਆਧਾਰ 'ਤੇ ਪੈਸੇ ਮਿਲਦੇ ਹੋਣ (ਬੀ.ਸੀ. ਦੀ ਘੱਟੋ-ਘੱਟ ਤਨਖਾਹ)।
ਓਨਟਾਰੀਓ ਵਿੱਚ, ਜੇ ਤੁਹਾਨੂੰ ਪੂਰੀ ਜਾਂ ਕੁਝ ਤਨਖਾਹ ਕਮਿਸ਼ਨ ਵਜੋਂ ਮਿਲਦੀ ਹੈ, ਤਾਂ ਵੀ ਤੁਹਾਡੀ ਤਨਖਾਹ ਕੰਮ ਕੀਤੇ ਹਰ ਘੰਟੇ ਲਈ ਘੱਟੋ-ਘੱਟ ਤਨਖਾਹ ਜਿੰਨੀ ਬਣਨੀ ਚਾਹੀਦੀ ਹੈ (ਓਨਟਾਰੀਓ ਦੀ ਘੱਟੋ-ਘੱਟ ਤਨਖਾਹ)।

ਵਰਦੀਆਂ। ਬੀ.ਸੀ. ਵਿੱਚ, ਜੇ ਤੁਹਾਡਾ ਮਾਲਕ ਵਰਦੀ (uniform) ਪਾਉਣੀ ਜ਼ਰੂਰੀ ਕਰਦਾ ਹੈ, ਤਾਂ ਉਸਨੂੰ ਇਹ ਤੁਹਾਨੂੰ ਮੁਫ਼ਤ ਦੇਣੀ ਪਵੇਗੀ। ਡਰੈੱਸ ਕੋਡ (dress code), ਜਿਵੇਂ "ਕਾਲੀ ਪੈਂਟ ਪਾਓ", ਵਰਦੀ ਤੋਂ ਵੱਖਰੀ ਚੀਜ਼ ਹੈ (ਕੰਮ ਦੀ ਤਨਖਾਹ ਮਿਲਣਾ)। ਜੇ ਤੁਹਾਨੂੰ ਪੱਕਾ ਨਹੀਂ ਪਤਾ ਕਿ ਤੁਹਾਡੇ ਸਟੋਰ ਦੇ ਕੱਪੜਿਆਂ ਦੇ ਨਿਯਮ ਵਰਦੀ ਹਨ ਜਾਂ ਡਰੈੱਸ ਕੋਡ, ਤਾਂ ਬੀ.ਸੀ. ਦੀ Employment Standards Branch (ਰੁਜ਼ਗਾਰ ਮਿਆਰ ਸ਼ਾਖਾ) ਨਾਲ ਸੰਪਰਕ ਕਰੋ।

ਰਸ਼ ਵਾਲੇ ਸੀਜ਼ਨ

ਸਾਲ ਦੇ ਕੁਝ ਸਮਿਆਂ ਵਿੱਚ ਰਿਟੇਲ ਵਿੱਚ ਜ਼ਿਆਦਾ ਰਸ਼ ਹੁੰਦਾ ਹੈ:

ਸਕੂਲ ਮੁੜ ਖੁੱਲ੍ਹਣ ਵੇਲੇ (back to school), ਗਰਮੀਆਂ ਦੇ ਅਖ਼ੀਰ ਵਿੱਚ
ਦਸੰਬਰ ਦੀਆਂ ਛੁੱਟੀਆਂ, ਜਦੋਂ ਸਟੋਰ ਵਾਧੂ ਸਟਾਫ਼ ਰੱਖ ਸਕਦੇ ਹਨ
ਬੌਕਸਿੰਗ ਡੇਅ (Boxing Day, ਕ੍ਰਿਸਮਸ ਤੋਂ ਅਗਲਾ ਦਿਨ) ਅਤੇ ਜਨਵਰੀ, ਜਦੋਂ ਸੇਲਾਂ ਅਤੇ ਵਾਪਸ ਕੀਤੇ ਸਮਾਨ ਕਰਕੇ ਸਟੋਰਾਂ ਵਿੱਚ ਰਸ਼ ਰਹਿੰਦਾ ਹੈ

ਸਟੋਰ ਸਮੇਂ-ਸਮੇਂ 'ਤੇ ਆਪਣਾ ਸਾਰਾ ਸਟਾਕ ਵੀ ਗਿਣਦੇ ਹਨ। ਇਹ ਗਿਣਤੀ (inventory count) ਸਵੇਰੇ ਜਲਦੀ ਜਾਂ ਰਾਤ ਭਰ ਹੋ ਸਕਦੀ ਹੈ। ਹੋਰ ਜਾਣਨ ਲਈ ਸੀਜ਼ਨਲ ਅਤੇ ਛੁੱਟੀਆਂ ਦੇ ਸੀਜ਼ਨ ਦੀਆਂ ਨੌਕਰੀਆਂ ਅਤੇ ਰਾਤ ਭਰ ਅਤੇ ਰਾਤ ਦੀ ਸ਼ਿਫ਼ਟ ਵਾਲੀਆਂ ਨੌਕਰੀਆਂ ਪੜ੍ਹੋ।

ਓਨਟਾਰੀਓ ਵਿੱਚ ਐਤਵਾਰ ਅਤੇ ਪਬਲਿਕ ਹੌਲੀਡੇ

ਓਨਟਾਰੀਓ ਦੇ Employment Standards Act (ਰੁਜ਼ਗਾਰ ਮਿਆਰ ਕਾਨੂੰਨ) ਵਿੱਚ ਰਿਟੇਲ ਕਾਰੋਬਾਰਾਂ ਦੇ ਜ਼ਿਆਦਾਤਰ ਮੁਲਾਜ਼ਮਾਂ ਲਈ ਖ਼ਾਸ ਨਿਯਮ ਹਨ (ਰਿਟੇਲ ਵਰਕਰ):

ਪਬਲਿਕ ਹੌਲੀਡੇ (public holidays, ਸਰਕਾਰੀ ਛੁੱਟੀਆਂ)। ਜ਼ਿਆਦਾਤਰ ਰਿਟੇਲ ਮੁਲਾਜ਼ਮਾਂ ਨੂੰ ਪਬਲਿਕ ਹੌਲੀਡੇ 'ਤੇ ਕੰਮ ਕਰਨ ਤੋਂ ਇਨਕਾਰ ਕਰਨ ਦਾ ਹੱਕ ਹੈ। ਜੇ ਤੁਸੀਂ ਉਸ ਦਿਨ ਕੰਮ ਕਰਨ ਲਈ ਹਾਂ ਕਹਿ ਦਿੱਤੀ ਸੀ, ਤਾਂ ਵੀ ਤੁਸੀਂ ਸ਼ਿਫ਼ਟ ਤੋਂ ਘੱਟੋ-ਘੱਟ 48 ਘੰਟੇ ਪਹਿਲਾਂ ਨੋਟਿਸ ਦੇ ਕੇ ਮਨ੍ਹਾ ਕਰ ਸਕਦੇ ਹੋ।
ਐਤਵਾਰ। ਜੇ ਤੁਹਾਨੂੰ 4 ਸਤੰਬਰ 2001 ਨੂੰ ਜਾਂ ਉਸ ਤੋਂ ਬਾਅਦ ਨੌਕਰੀ 'ਤੇ ਰੱਖਿਆ ਗਿਆ ਸੀ, ਅਤੇ ਤੁਸੀਂ ਨੌਕਰੀ ਮਿਲਣ ਵੇਲੇ ਲਿਖਤੀ ਜਾਂ ਇਲੈਕਟ੍ਰਾਨਿਕ ਤੌਰ 'ਤੇ ਐਤਵਾਰ ਨੂੰ ਕੰਮ ਕਰਨ ਲਈ ਸਹਿਮਤੀ ਦਿੱਤੀ ਸੀ, ਤਾਂ ਆਮ ਤੌਰ 'ਤੇ ਤੁਸੀਂ ਬਾਅਦ ਵਿੱਚ ਐਤਵਾਰ ਦੇ ਕੰਮ ਤੋਂ ਇਨਕਾਰ ਨਹੀਂ ਕਰ ਸਕਦੇ। ਧਾਰਮਿਕ ਵਿਸ਼ਵਾਸ ਜਾਂ ਧਾਰਮਿਕ ਰੀਤਾਂ ਦੀ ਪਾਲਣਾ ਦੇ ਕਾਰਨਾਂ ਕਰਕੇ ਤੁਸੀਂ ਫਿਰ ਵੀ ਇਨਕਾਰ ਕਰ ਸਕਦੇ ਹੋ, ਘੱਟੋ-ਘੱਟ 48 ਘੰਟੇ ਪਹਿਲਾਂ ਨੋਟਿਸ ਦੇ ਕੇ। ਜੇ ਤੁਸੀਂ ਨੌਕਰੀ ਮਿਲਣ ਵੇਲੇ ਸਹਿਮਤੀ ਨਹੀਂ ਦਿੱਤੀ ਸੀ, ਤਾਂ ਤੁਸੀਂ ਐਤਵਾਰ ਦੇ ਕੰਮ ਤੋਂ ਇਨਕਾਰ ਕਰ ਸਕਦੇ ਹੋ। ਜੇ ਤੁਸੀਂ ਬਾਅਦ ਵਿੱਚ ਕਿਸੇ ਐਤਵਾਰ ਕੰਮ ਕਰਨ ਲਈ ਹਾਂ ਕਹਿੰਦੇ ਹੋ, ਤਾਂ ਵੀ ਤੁਸੀਂ ਘੱਟੋ-ਘੱਟ 48 ਘੰਟੇ ਪਹਿਲਾਂ ਨੋਟਿਸ ਦੇ ਕੇ ਮਨ੍ਹਾ ਕਰ ਸਕਦੇ ਹੋ।

ਜੇ ਇਸ ਨਾਲ Human Rights Code (ਮਨੁੱਖੀ ਅਧਿਕਾਰ ਕੋਡ) ਦੀ ਉਲੰਘਣਾ ਹੁੰਦੀ ਹੋਵੇ, ਤਾਂ ਮਾਲਕ ਐਤਵਾਰ ਦੇ ਕੰਮ ਲਈ ਸਹਿਮਤੀ ਨੂੰ ਨੌਕਰੀ ਦੇਣ ਦੀ ਸ਼ਰਤ ਨਹੀਂ ਬਣਾ ਸਕਦਾ। ਆਪਣੀ ਜੌਬ ਆਫ਼ਰ (job offer) 'ਤੇ ਦਸਤਖ਼ਤ ਕਰਨ ਤੋਂ ਪਹਿਲਾਂ ਇਸਨੂੰ ਧਿਆਨ ਨਾਲ ਪੜ੍ਹੋ।

ਸਰਕਾਰੀ ਛੁੱਟੀਆਂ ਦੀ ਤਨਖਾਹ (holiday pay) ਬਾਰੇ ਹੋਰ ਜਾਣਕਾਰੀ ਸਾਡੀ ਬੀ.ਸੀ. ਅਤੇ ਓਨਟਾਰੀਓ ਵਿੱਚ ਸਟੈਟ ਹੌਲੀਡੇ ਵਾਲੀ ਗਾਈਡ ਵਿੱਚ ਹੈ।

ਸੁਰੱਖਿਅਤ ਰਹਿਣਾ

ਸਟੋਰਾਂ ਵਿੱਚ ਅਸਲੀ ਖ਼ਤਰੇ ਹੁੰਦੇ ਹਨ: ਭਾਰੀ ਡੱਬੇ, ਪੌੜੀਆਂ, ਬਾਕਸ ਕਟਰ, ਅਤੇ ਗਿੱਲੇ ਫ਼ਰਸ਼। WorkSafeBC (ਬੀ.ਸੀ. ਦੀ ਕੰਮ-ਸੁਰੱਖਿਆ ਏਜੰਸੀ) ਦੇ ਰਿਟੇਲ ਬਾਰੇ ਸਰੋਤਾਂ ਵਿੱਚ ਹਿੰਸਾ ਰੋਕਣ ਬਾਰੇ ਇੱਕ ਗਾਈਡ ਵੀ ਹੈ, ਜੋ ਦੁਕਾਨ ਵਿੱਚੋਂ ਚੋਰੀ (shoplifting), ਡਕੈਤੀ, ਅਤੇ ਬਦਸਲੂਕੀ ਕਰਨ ਵਾਲੇ ਗਾਹਕਾਂ ਬਾਰੇ ਦੱਸਦੀ ਹੈ।

ਆਪਣੇ ਸੁਪਰਵਾਈਜ਼ਰ ਨੂੰ ਕਹੋ ਕਿ ਤੁਹਾਨੂੰ ਸੁਰੱਖਿਅਤ ਢੰਗ ਨਾਲ ਭਾਰ ਚੁੱਕਣਾ, ਅਤੇ ਪੌੜੀਆਂ ਅਤੇ ਬਾਕਸ ਕਟਰ ਵਰਤਣਾ ਦਿਖਾਏ।
ਪੁੱਛੋ ਕਿ ਜੇ ਤੁਸੀਂ ਕਿਸੇ ਨੂੰ ਦੁਕਾਨ ਵਿੱਚੋਂ ਚੋਰੀ ਕਰਦੇ ਦੇਖੋ ਤਾਂ ਸਟੋਰ ਤੁਹਾਡੇ ਤੋਂ ਕੀ ਕਰਵਾਉਣਾ ਚਾਹੁੰਦਾ ਹੈ। ਤੁਹਾਡੀ ਸੁਰੱਖਿਆ ਸਭ ਤੋਂ ਪਹਿਲਾਂ ਹੈ। ਸਮਾਨ ਬਚਾਉਣ ਲਈ ਕਦੇ ਵੀ ਆਪਣੇ ਆਪ ਨੂੰ ਖ਼ਤਰੇ ਵਿੱਚ ਨਾ ਪਾਓ।
ਕੋਈ ਵੀ ਸੱਟ ਲੱਗੇ, ਭਾਵੇਂ ਛੋਟੀ ਹੀ ਹੋਵੇ, ਤਾਂ ਉਸੇ ਵੇਲੇ ਆਪਣੇ ਸੁਪਰਵਾਈਜ਼ਰ ਨੂੰ ਦੱਸੋ।

ਦੋਵਾਂ ਸੂਬਿਆਂ ਵਿੱਚ, ਤੁਹਾਨੂੰ ਖ਼ਤਰਿਆਂ ਬਾਰੇ ਜਾਣਨ ਦਾ ਹੱਕ, ਸਿਹਤ ਅਤੇ ਸੁਰੱਖਿਆ ਵਿੱਚ ਹਿੱਸਾ ਲੈਣ ਦਾ ਹੱਕ, ਅਤੇ ਅਸੁਰੱਖਿਅਤ ਕੰਮ ਤੋਂ ਇਨਕਾਰ ਕਰਨ ਦਾ ਹੱਕ ਹੈ (WorkSafeBC, ਓਨਟਾਰੀਓ)।

ਤੁਹਾਡੀ ਉਮਰ ਕਿੰਨੀ ਹੋਣੀ ਚਾਹੀਦੀ ਹੈ?

ਓਨਟਾਰੀਓ: ਸਟੋਰ ਵਿੱਚ ਕੰਮ ਕਰਨ ਲਈ ਘੱਟੋ-ਘੱਟ ਉਮਰ 14 ਸਾਲ ਹੈ।
ਬੀ.ਸੀ.: 16 ਸਾਲ ਦੀ ਉਮਰ ਤੋਂ ਆਮ ਨਿਯਮ ਲਾਗੂ ਹੁੰਦੇ ਹਨ। 14 ਜਾਂ 15 ਸਾਲ ਦੀ ਉਮਰ ਵਿੱਚ, ਮਾਪਿਆਂ ਜਾਂ ਸਰਪ੍ਰਸਤ ਦੀ ਲਿਖਤੀ ਇਜਾਜ਼ਤ ਨਾਲ ਤੁਸੀਂ "ਹਲਕਾ ਕੰਮ" (light work) ਕਰ ਸਕਦੇ ਹੋ (ਨੌਜਵਾਨਾਂ ਨੂੰ ਨੌਕਰੀ 'ਤੇ ਰੱਖਣਾ)। ਬੀ.ਸੀ. ਦੀ ਹਲਕੇ ਕੰਮ ਦੀ ਲਿਸਟ ਵਿੱਚ ਸਟੋਰਾਂ ਵਿੱਚ ਡਿਸਪਲੇ ਤਿਆਰ ਕਰਨਾ, ਕੀਮਤਾਂ ਦੇ ਟੈਗ ਲਾਉਣਾ, ਸ਼ੈਲਫ਼ਾਂ ਦੁਬਾਰਾ ਭਰਨਾ, ਅਤੇ ਆਰਡਰ ਥੈਲਿਆਂ ਵਿੱਚ ਪਾਉਣਾ ਸ਼ਾਮਲ ਹੈ।

ਨੌਕਰੀ ਕਿਵੇਂ ਮਿਲੇ

ਕੰਪਨੀ ਦੇ ਕਰੀਅਰ ਪੰਨੇ 'ਤੇ ਅਰਜ਼ੀ ਦਿਓ। ਆਪਣੇ ਸਭ ਤੋਂ ਨੇੜੇ ਵਾਲਾ ਸਟੋਰ ਚੁਣੋ, ਜਾਂ ਅਜਿਹਾ ਸਟੋਰ ਜਿੱਥੇ ਬੱਸ ਜਾਂ ਟ੍ਰੇਨ (transit) ਰਾਹੀਂ ਆਸਾਨੀ ਨਾਲ ਪਹੁੰਚਿਆ ਜਾ ਸਕੇ।
ਸਟੋਰ ਜਾਓ। ਸ਼ਾਂਤ ਸਮੇਂ ਜਾਓ, ਆਲੇ-ਦੁਆਲੇ ਦੇਖੋ, ਅਤੇ ਪੁੱਛੋ ਕਿ ਕੀ ਉਹ ਭਰਤੀ ਕਰ ਰਹੇ ਹਨ। ਸਾਫ਼-ਸੁਥਰੇ ਕੱਪੜੇ ਪਾਓ, ਸਟੋਰ ਦੇ ਸਟਾਈਲ ਨਾਲ ਮਿਲਦੇ-ਜੁਲਦੇ।
ਸਟੋਰ ਬਾਰੇ ਜਾਣੋ। ਇੰਟਰਵਿਊ ਤੋਂ ਪਹਿਲਾਂ ਦੇਖੋ ਕਿ ਸਟੋਰ ਕੀ ਵੇਚਦਾ ਹੈ ਅਤੇ ਉੱਥੇ ਕੌਣ ਖ਼ਰੀਦਦਾਰੀ ਕਰਦਾ ਹੈ। ਇਹ ਦੱਸਣ ਲਈ ਤਿਆਰ ਰਹੋ ਕਿ ਤੁਸੀਂ ਉੱਥੇ ਕੰਮ ਕਿਉਂ ਕਰਨਾ ਚਾਹੁੰਦੇ ਹੋ।
ਆਪਣੀ ਅਵੇਲੇਬਿਲਿਟੀ ਸਾਫ਼-ਸਾਫ਼ ਦੱਸੋ। ਰਿਟੇਲ ਵਿੱਚ ਵੀਕਐਂਡ ਅਤੇ ਸ਼ਾਮਾਂ ਸਭ ਤੋਂ ਵੱਧ ਮਾਇਨੇ ਰੱਖਦੀਆਂ ਹਨ। ਜੇ ਤੁਸੀਂ ਪੜ੍ਹ ਰਹੇ ਹੋ, ਤਾਂ ਵਿਦਿਆਰਥੀਆਂ ਲਈ ਪਾਰਟ-ਟਾਈਮ ਨੌਕਰੀਆਂ ਪੜ੍ਹੋ।
ਗਰੁੱਪ ਇੰਟਰਵਿਊ ਲਈ ਤਿਆਰ ਰਹੋ। ਕੁਝ ਸਟੋਰ ਇੱਕੋ ਵਾਰ ਕਈ ਲੋਕਾਂ ਦੀ ਇੰਟਰਵਿਊ ਲੈਂਦੇ ਹਨ। ਤਿਆਰੀ ਲਈ ਗਰੁੱਪ ਇੰਟਰਵਿਊ ਅਤੇ ਹਾਇਰਿੰਗ ਇਵੈਂਟ ਪੜ੍ਹੋ।

ਅਗਲੇ ਕਦਮ

ਮੈਟਰੋ ਵੈਨਕੂਵਰ ਅਤੇ GTA ਵਿੱਚ ਰਿਟੇਲ ਦੀਆਂ ਨੌਕਰੀਆਂ
ਮੈਟਰੋ ਵੈਨਕੂਵਰ ਅਤੇ GTA ਵਿੱਚ ਕੈਸ਼ੀਅਰ ਦੀਆਂ ਨੌਕਰੀਆਂ
ਆਪਣੇ ਹੱਕ ਜਾਣੋ: ਬੀ.ਸੀ. ਅਤੇ ਓਨਟਾਰੀਓ
ਆਪਣਾ ਰਿਜ਼ਿਊਮੇ ਬਣਾਓ: ਕੰਮ ਦੇ ਤਜਰਬੇ ਤੋਂ ਬਿਨਾਂ ਆਪਣਾ ਪਹਿਲਾ ਰਿਜ਼ਿਊਮੇ ਲਿਖਣਾ