ਕੈਸ਼ੀਅਰ ਦੀਆਂ ਨੌਕਰੀਆਂ: ਕੰਮ ਕਿਹੋ ਜਿਹਾ ਹੁੰਦਾ ਹੈ ਅਤੇ ਨੌਕਰੀ ਕਿਵੇਂ ਮਿਲੇ

ਕੈਸ਼ੀਅਰ ਦੀ ਨੌਕਰੀ ਪਹਿਲੀ ਨੌਕਰੀ ਵਜੋਂ ਬਹੁਤ ਆਮ ਹੈ। ਸਟੋਰਾਂ ਨੂੰ ਹਰ ਰੋਜ਼ ਕੈਸ਼ੀਅਰ ਚਾਹੀਦੇ ਹਨ, ਅਕਸਰ ਸਵੇਰੇ ਜਲਦੀ ਤੋਂ ਲੈ ਕੇ ਦੇਰ ਰਾਤ ਤੱਕ। ਜ਼ਿਆਦਾਤਰ ਟ੍ਰੇਨਿੰਗ ਕੰਮ 'ਤੇ ਹੀ ਹੁੰਦੀ ਹੈ, ਇਸ ਲਈ ਸ਼ੁਰੂ ਕਰਨ ਲਈ ਤੁਹਾਨੂੰ ਤਜਰਬੇ ਦੀ ਲੋੜ ਨਹੀਂ।

ਇਹ ਕੰਮ ਅਜਿਹੇ ਹੁਨਰ ਸਿਖਾਉਂਦਾ ਹੈ ਜੋ ਕਿਸੇ ਵੀ ਨੌਕਰੀ ਵਿੱਚ ਕੰਮ ਆਉਂਦੇ ਹਨ: ਗਾਹਕਾਂ ਨਾਲ ਗੱਲ ਕਰਨਾ, ਪੈਸੇ ਧਿਆਨ ਨਾਲ ਸੰਭਾਲਣਾ, ਅਤੇ ਲੰਬੀ ਲਾਈਨ ਲੱਗਣ 'ਤੇ ਵੀ ਸ਼ਾਂਤ ਰਹਿਣਾ।

ਅਸੀਂ ਇਸ ਗਾਈਡ ਦੀ ਜਾਣਕਾਰੀ 12 ਅਕਤੂਬਰ 2026 ਨੂੰ ਚੈੱਕ ਕੀਤੀ ਸੀ। ਨਿਯਮ ਅਤੇ ਰੇਟ ਬਦਲਦੇ ਰਹਿੰਦੇ ਹਨ, ਇਸ ਲਈ ਤਾਜ਼ਾ ਜਾਣਕਾਰੀ ਲਈ ਲਿੰਕਾਂ ਰਾਹੀਂ ਸਰਕਾਰੀ ਪੰਨੇ ਦੇਖੋ।

ਕੈਸ਼ੀਅਰ ਕੀ ਕਰਦਾ ਹੈ

ਤੁਹਾਡਾ ਮੁੱਖ ਕੰਮ ਗਾਹਕਾਂ ਨੂੰ ਛੇਤੀ ਅਤੇ ਸਹੀ ਢੰਗ ਨਾਲ ਪੇਮੈਂਟ ਕਰਨ ਵਿੱਚ ਮਦਦ ਕਰਨਾ ਹੈ। ਇੱਕ ਆਮ ਸ਼ਿਫ਼ਟ ਵਿੱਚ ਤੁਸੀਂ ਇਹ ਕੰਮ ਕਰ ਸਕਦੇ ਹੋ:

• ਗਾਹਕਾਂ ਦਾ ਸਵਾਗਤ ਕਰਨਾ ਅਤੇ ਉਹਨਾਂ ਦੀਆਂ ਚੀਜ਼ਾਂ ਸਕੈਨ ਕਰਨਾ ਜਾਂ ਹੱਥ ਨਾਲ ਰਜਿਸਟਰ ਵਿੱਚ ਪਾਉਣਾ (ring in)
• ਕੈਸ਼, ਡੈਬਿਟ ਕਾਰਡ, ਕ੍ਰੈਡਿਟ ਕਾਰਡ, ਜਾਂ ਗਿਫ਼ਟ ਕਾਰਡ ਨਾਲ ਪੇਮੈਂਟ ਲੈਣਾ
• ਗਾਹਕ ਨੂੰ ਭਾਨ ਗਿਣ ਕੇ ਵਾਪਸ ਦੇਣਾ
• ਚੀਜ਼ਾਂ ਧਿਆਨ ਨਾਲ ਥੈਲਿਆਂ ਵਿੱਚ ਪਾਉਣਾ, ਭਾਰੀ ਚੀਜ਼ਾਂ ਹੇਠਾਂ ਰੱਖ ਕੇ
• ਸੈਲਫ਼-ਚੈੱਕਆਊਟ ਵਾਲੀ ਥਾਂ ਦਾ ਧਿਆਨ ਰੱਖਣਾ ਅਤੇ ਜਿਹੜੇ ਗਾਹਕ ਅਟਕ ਜਾਣ, ਉਹਨਾਂ ਦੀ ਮਦਦ ਕਰਨਾ
• ਵਾਪਸ ਕੀਤਾ ਸਮਾਨ (returns) ਲੈਣਾ ਅਤੇ ਸਮਾਨ ਬਦਲ ਕੇ ਦੇਣਾ (exchanges), ਜੇ ਤੁਹਾਡਾ ਸਟੋਰ ਕੈਸ਼ੀਅਰਾਂ ਨੂੰ ਇਹ ਕਰਨ ਦਿੰਦਾ ਹੈ
• ਆਪਣੇ ਕੈਸ਼ ਕਾਊਂਟਰ (till) ਵਾਲੀ ਥਾਂ ਸਾਫ਼ ਰੱਖਣਾ, ਅਤੇ ਉੱਥੇ ਥੈਲੇ ਅਤੇ ਰਸੀਦ ਵਾਲਾ ਕਾਗਜ਼ ਪੂਰਾ ਰੱਖਣਾ
• ਸਵਾਲਾਂ ਦੇ ਜਵਾਬ ਦੇਣਾ, ਜਾਂ ਕਿਸੇ ਅਜਿਹੇ ਸਾਥੀ ਨੂੰ ਲੱਭਣਾ ਜਿਸਨੂੰ ਜਵਾਬ ਪਤਾ ਹੋਵੇ

ਜਦੋਂ ਕੰਮ ਘੱਟ ਹੋਵੇ, ਤਾਂ ਤੁਸੀਂ ਸ਼ੈਲਫ਼ਾਂ 'ਤੇ ਪ੍ਰੋਡਕਟਾਂ ਨੂੰ ਅੱਗੇ ਕਰਕੇ ਸਿੱਧੀ ਲਾਈਨ ਵਿੱਚ ਲਾ (face) ਸਕਦੇ ਹੋ, ਡਿਸਪਲੇ ਠੀਕ ਕਰ ਸਕਦੇ ਹੋ, ਜਾਂ ਸ਼ੈਲਫ਼ਾਂ ਭਰਨ ਵਿੱਚ ਮਦਦ ਕਰ ਸਕਦੇ ਹੋ।

ਕੈਸ਼ੀਅਰ ਕਿੱਥੇ ਕੰਮ ਕਰਦੇ ਹਨ

ਗਰੋਸਰੀ ਸਟੋਰ। ਤੁਸੀਂ ਫਲ-ਸਬਜ਼ੀਆਂ ਦੇ ਕੋਡ (produce codes) ਸਿੱਖਦੇ ਹੋ, ਬਹੁਤ ਸਾਰੀਆਂ ਚੀਜ਼ਾਂ ਤੇਜ਼ੀ ਨਾਲ ਸਕੈਨ ਕਰਦੇ ਹੋ, ਅਤੇ ਸੈਲਫ਼-ਚੈੱਕਆਊਟ ਵਾਲੀ ਥਾਂ ਵੀ ਸੰਭਾਲ ਸਕਦੇ ਹੋ। ਸਾਡੀ ਗਰੋਸਰੀ ਅਤੇ ਫ਼ਾਰਮੇਸੀ ਦੀਆਂ ਨੌਕਰੀਆਂ ਵਾਲੀ ਗਾਈਡ ਦੱਸਦੀ ਹੈ ਕਿ ਗਰੋਸਰੀ ਚੇਨਾਂ ਭਰਤੀ ਕਿਵੇਂ ਕਰਦੀਆਂ ਹਨ।

ਡਰੱਗਸਟੋਰ ਅਤੇ ਫ਼ਾਰਮੇਸੀਆਂ। ਫ਼ਰੰਟ ਸਟੋਰ ਦੇ ਕੈਸ਼ੀਅਰ ਸਨੈਕਸ, ਘਰੇਲੂ ਸਮਾਨ, ਅਤੇ ਨਿੱਜੀ ਦੇਖਭਾਲ ਦੀਆਂ ਚੀਜ਼ਾਂ ਖ਼ਰੀਦਣ ਵਾਲੇ ਗਾਹਕਾਂ ਨੂੰ ਸੰਭਾਲਦੇ ਹਨ। ਡਰੱਗਸਟੋਰ ਦੀਆਂ ਹੋਰ ਨੌਕਰੀਆਂ ਬਾਰੇ ਜਾਣਨ ਲਈ ਫ਼ਾਰਮੇਸੀ ਅਸਿਸਟੈਂਟ ਅਤੇ ਬਿਊਟੀ ਐਡਵਾਈਜ਼ਰ ਦੀਆਂ ਨੌਕਰੀਆਂ ਪੜ੍ਹੋ।

ਵੱਡੇ (big-box) ਅਤੇ ਡਿਪਾਰਟਮੈਂਟ ਸਟੋਰ। ਇਹ ਸਟੋਰ ਦਸੰਬਰ ਦੀਆਂ ਛੁੱਟੀਆਂ ਵਰਗੇ ਰਸ਼ ਵਾਲੇ ਸਮਿਆਂ ਤੋਂ ਪਹਿਲਾਂ ਵਾਧੂ ਕੈਸ਼ੀਅਰ ਰੱਖ ਸਕਦੇ ਹਨ। ਦੇਖੋ ਰਿਟੇਲ ਸਟੋਰ ਐਸੋਸੀਏਟ ਦੀਆਂ ਨੌਕਰੀਆਂ ਅਤੇ ਸੀਜ਼ਨਲ ਅਤੇ ਛੁੱਟੀਆਂ ਦੇ ਸੀਜ਼ਨ ਦੀਆਂ ਨੌਕਰੀਆਂ।

ਰੈਸਟੋਰੈਂਟ, ਕੈਫ਼ੇ, ਅਤੇ ਫ਼ਾਸਟ ਫ਼ੂਡ। ਫ਼ਰੰਟ ਕਾਊਂਟਰ ਦਾ ਸਟਾਫ਼ ਆਰਡਰ ਅਤੇ ਪੇਮੈਂਟ ਲੈਂਦਾ ਹੈ, ਅਤੇ ਅਕਸਰ ਖਾਣੇ ਵਿੱਚ ਵੀ ਮਦਦ ਕਰਦਾ ਹੈ। ਪੜ੍ਹੋ ਫ਼ੂਡ ਸਰਵਿਸ ਅਤੇ ਬਰਿਸਟਾ ਦੀਆਂ ਨੌਕਰੀਆਂ।

ਗੈਸ ਸਟੇਸ਼ਨ ਅਤੇ ਕਨਵੀਨੀਅੰਸ ਸਟੋਰ। ਇਹ ਸਟੋਰ ਅਕਸਰ ਦੇਰ ਰਾਤ ਤੱਕ ਖੁੱਲ੍ਹੇ ਰਹਿੰਦੇ ਹਨ। ਜੇ ਤੁਹਾਨੂੰ ਰਾਤ ਨੂੰ ਇਕੱਲੇ ਕੰਮ ਕਰਨਾ ਪੈ ਸਕਦਾ ਹੈ, ਤਾਂ ਪਹਿਲਾਂ ਰਾਤ ਭਰ ਅਤੇ ਰਾਤ ਦੀ ਸ਼ਿਫ਼ਟ ਵਾਲੀਆਂ ਨੌਕਰੀਆਂ ਪੜ੍ਹੋ।

ਮਾਲਕ ਕਿਹੜੇ ਹੁਨਰ ਲੱਭਦੇ ਹਨ

• ਮਿਲਣਸਾਰ ਸੁਭਾਅ। ਮੁਸਕਰਾਓ, ਹੈਲੋ ਕਹੋ, ਅਤੇ ਹਰ ਗਾਹਕ ਦਾ ਧੰਨਵਾਦ ਕਰੋ। ਕੈਸ਼ ਰਜਿਸਟਰ ਚਲਾਉਣਾ ਮੈਨੇਜਰ ਤੁਹਾਨੂੰ ਸਿਖਾ ਸਕਦਾ ਹੈ।
• ਸਬਰ। ਕੁਝ ਗਾਹਕ ਕਾਹਲੀ ਵਿੱਚ ਜਾਂ ਨਾਰਾਜ਼ ਹੁੰਦੇ ਹਨ। ਸ਼ਾਂਤ ਰਹੋ ਅਤੇ ਨਿਮਰਤਾ ਨਾਲ ਗੱਲ ਕਰੋ।
• ਮੁੱਢਲਾ ਹਿਸਾਬ। ਜ਼ਿਆਦਾਤਰ ਕੰਮ ਕੈਸ਼ ਰਜਿਸਟਰ ਆਪ ਕਰਦਾ ਹੈ, ਪਰ ਫਿਰ ਵੀ ਤੁਸੀਂ ਕੈਸ਼ ਗਿਣਦੇ ਹੋ ਅਤੇ ਦੇਖਦੇ ਹੋ ਕਿ ਕੁੱਲ ਰਕਮ ਠੀਕ ਲੱਗਦੀ ਹੈ।
• ਇਮਾਨਦਾਰੀ। ਤੁਸੀਂ ਸਾਰਾ ਦਿਨ ਪੈਸੇ ਸੰਭਾਲਦੇ ਹੋ। ਮਾਲਕਾਂ ਨੂੰ ਤੁਹਾਡੇ 'ਤੇ ਭਰੋਸਾ ਹੋਣਾ ਚਾਹੀਦਾ ਹੈ।
• ਬਾਰੀਕੀ ਵੱਲ ਧਿਆਨ। ਕੀਮਤਾਂ, ਚੀਜ਼ਾਂ ਦੀ ਗਿਣਤੀ, ਅਤੇ ਜੋ ਭਾਨ ਤੁਸੀਂ ਵਾਪਸ ਦਿੰਦੇ ਹੋ, ਉਹ ਚੈੱਕ ਕਰੋ।
• ਭਰੋਸੇਯੋਗਤਾ। ਹਰ ਸ਼ਿਫ਼ਟ 'ਤੇ ਸਮੇਂ ਸਿਰ ਆਓ। ਜਦੋਂ ਇੱਕ ਵੀ ਕੈਸ਼ੀਅਰ ਘੱਟ ਹੋਵੇ ਤਾਂ ਲਾਈਨਾਂ ਛੇਤੀ ਲੰਬੀਆਂ ਹੋ ਜਾਂਦੀਆਂ ਹਨ।
• ਭਾਸ਼ਾਵਾਂ। ਮੈਟਰੋ ਵੈਨਕੂਵਰ ਅਤੇ ਗ੍ਰੇਟਰ ਟੋਰਾਂਟੋ ਏਰੀਆ ਵਿੱਚ ਬਹੁਤ ਸਾਰੇ ਗਾਹਕ ਅੰਗਰੇਜ਼ੀ ਤੋਂ ਇਲਾਵਾ ਹੋਰ ਭਾਸ਼ਾਵਾਂ ਬੋਲਦੇ ਹਨ। ਆਪਣੇ ਰਿਜ਼ਿਊਮੇ 'ਤੇ ਹਰ ਉਹ ਭਾਸ਼ਾ ਲਿਖੋ ਜੋ ਤੁਸੀਂ ਬੋਲਦੇ ਹੋ।

ਤੇਜ਼ੀ ਪ੍ਰੈਕਟਿਸ ਨਾਲ ਆਉਂਦੀ ਹੈ। ਪਹਿਲੇ ਹਫ਼ਤਿਆਂ ਵਿੱਚ ਸਹੀ ਕੰਮ ਕਰਨ 'ਤੇ ਧਿਆਨ ਦਿਓ। ਤੇਜ਼ੀ ਆਪੇ ਆ ਜਾਵੇਗੀ।

ਕੈਸ਼ ਸੰਭਾਲਣਾ

ਜ਼ਿਆਦਾਤਰ ਸਟੋਰ ਮਿਲਦੇ-ਜੁਲਦੇ ਕਦਮਾਂ ਦੀ ਪਾਲਣਾ ਕਰਦੇ ਹਨ:

• ਸ਼ਿਫ਼ਟ ਦੇ ਸ਼ੁਰੂ ਵਿੱਚ ਤੁਹਾਨੂੰ ਇੱਕ ਤੈਅ ਰਕਮ ਵਾਲਾ ਕੈਸ਼ ਡਰਾਅਰ ਮਿਲਦਾ ਹੈ, ਜਿਸਨੂੰ ਫ਼ਲੋਟ (float) ਕਹਿੰਦੇ ਹਨ। ਕੰਮ ਸ਼ੁਰੂ ਕਰਨ ਤੋਂ ਪਹਿਲਾਂ ਇਸਨੂੰ ਗਿਣੋ, ਅਤੇ ਜੇ ਇਹ ਗ਼ਲਤ ਹੋਵੇ ਤਾਂ ਉਸੇ ਵੇਲੇ ਆਪਣੇ ਸੁਪਰਵਾਈਜ਼ਰ ਨੂੰ ਦੱਸੋ।
• ਗਾਹਕ ਨੂੰ ਭਾਨ ਉੱਚੀ ਬੋਲ ਕੇ ਗਿਣਦੇ ਹੋਏ ਵਾਪਸ ਦਿਓ, ਤਾਂ ਜੋ ਤੁਸੀਂ ਦੋਵੇਂ ਇਸਨੂੰ ਚੈੱਕ ਕਰ ਸਕੋ।
• ਦੋ ਵਿਕਰੀਆਂ ਵਿਚਕਾਰ ਆਪਣਾ ਡਰਾਅਰ ਬੰਦ ਰੱਖੋ। ਇਸਨੂੰ ਕਦੇ ਵੀ ਖੁੱਲ੍ਹਾ ਜਾਂ ਬਿਨਾਂ ਨਿਗਰਾਨੀ ਦੇ ਨਾ ਛੱਡੋ।
• ਵੌਇਡ (voids, ਰਜਿਸਟਰ ਵਿੱਚ ਪਾਈ ਚੀਜ਼ ਰੱਦ ਕਰਨਾ), ਰਿਫ਼ੰਡ, ਅਤੇ ਕੀਮਤ ਬਦਲਣ ਲਈ ਸਟੋਰ ਦੇ ਦੱਸੇ ਕਦਮਾਂ ਦੀ ਪਾਲਣਾ ਕਰੋ। ਜੇ ਤੁਹਾਨੂੰ ਪੱਕਾ ਨਹੀਂ ਪਤਾ, ਤਾਂ ਬਟਨ ਦਬਾਉਣ ਤੋਂ ਪਹਿਲਾਂ ਸੁਪਰਵਾਈਜ਼ਰ ਨੂੰ ਪੁੱਛੋ।
• ਸ਼ਿਫ਼ਟ ਦੇ ਅੰਤ ਵਿੱਚ, ਤੁਸੀਂ ਜਾਂ ਕੋਈ ਸੁਪਰਵਾਈਜ਼ਰ ਡਰਾਅਰ ਦੁਬਾਰਾ ਗਿਣਦਾ ਹੈ।

ਜੇ ਤੁਹਾਡੇ ਡਰਾਅਰ ਵਿੱਚ ਪੈਸੇ ਘੱਟ ਨਿਕਲਣ ਤਾਂ? ਗ਼ਲਤੀਆਂ ਹੋ ਜਾਂਦੀਆਂ ਹਨ। ਤੁਹਾਡਾ ਮਾਲਕ ਤੁਹਾਡੀ ਤਨਖਾਹ ਵਿੱਚੋਂ ਕੀ ਕੱਟ ਸਕਦਾ ਹੈ, ਇਸਦੀ ਹੱਦ ਕਾਨੂੰਨ ਤੈਅ ਕਰਦਾ ਹੈ:

• ਬੀ.ਸੀ.: ਮਾਲਕ ਕੈਸ਼ ਦੀ ਘਾਟ (cash shortage) ਤੁਹਾਡੀ ਤਨਖਾਹ ਵਿੱਚੋਂ ਨਹੀਂ ਕੱਟ ਸਕਦਾ। ਉਹ ਉਦੋਂ ਵੀ ਪੈਸੇ ਨਹੀਂ ਕੱਟ ਸਕਦਾ ਜਦੋਂ ਕੋਈ ਗਾਹਕ ਪੈਸੇ ਨਹੀਂ ਦਿੰਦਾ, ਅਤੇ ਨਾ ਹੀ ਕੰਪਨੀ ਦੀ ਚੋਰੀ ਹੋਈ ਜਾਂ ਖ਼ਰਾਬ ਹੋਈ ਚੀਜ਼ ਲਈ (ਬੀ.ਸੀ. ਵਿੱਚ ਤਨਖਾਹ ਵਿੱਚੋਂ ਕਟੌਤੀਆਂ)।
• ਓਨਟਾਰੀਓ: ਮਾਲਕ ਕੈਸ਼ ਦੀ ਘਾਟ ਸਿਰਫ਼ ਤਾਂ ਹੀ ਕੱਟ ਸਕਦਾ ਹੈ ਜੇ ਕੈਸ਼ ਤੱਕ ਸਿਰਫ਼ ਤੁਹਾਡੀ ਪਹੁੰਚ ਸੀ ਅਤੇ ਤੁਸੀਂ ਇਸ ਕਟੌਤੀ ਲਈ ਲਿਖਤੀ ਸਹਿਮਤੀ ਦਿੱਤੀ ਸੀ। ਉਹ "ਨੁਕਸ ਵਾਲੇ ਕੰਮ" (faulty work) ਲਈ ਪੈਸੇ ਨਹੀਂ ਕੱਟ ਸਕਦਾ, ਜਿਵੇਂ ਕ੍ਰੈਡਿਟ ਕਾਰਡ ਦੀ ਟ੍ਰਾਂਜ਼ੈਕਸ਼ਨ ਵਿੱਚ ਹੋਈ ਗ਼ਲਤੀ, ਭਾਵੇਂ ਤੁਸੀਂ ਕਿਸੇ ਕਾਗਜ਼ 'ਤੇ ਦਸਤਖ਼ਤ ਕੀਤੇ ਹੋਣ (ਤਨਖਾਹ ਦੀ ਅਦਾਇਗੀ)।

ਉਮਰ-ਪਾਬੰਦੀ ਵਾਲੀਆਂ ਚੀਜ਼ਾਂ ਵੇਚਣਾ

ਕੁਝ ਸਟੋਰ ਅਜਿਹੀਆਂ ਚੀਜ਼ਾਂ ਵੇਚਦੇ ਹਨ ਜਿਨ੍ਹਾਂ ਨੂੰ ਖ਼ਰੀਦਣ ਲਈ ਗਾਹਕ ਦੀ ਉਮਰ ਪੂਰੀ ਹੋਣੀ ਚਾਹੀਦੀ ਹੈ। ਕੈਸ਼ੀਅਰ ਵਜੋਂ, ਤੁਸੀਂ ਇਹ ਪੱਕਾ ਕਰਨ ਵਿੱਚ ਮਦਦ ਕਰਦੇ ਹੋ ਕਿ ਇਹ ਵਿਕਰੀ ਕਾਨੂੰਨ ਮੁਤਾਬਕ ਹੋਵੇ।

ਤੰਬਾਕੂ ਅਤੇ ਵੇਪ ਵਾਲੀਆਂ ਚੀਜ਼ਾਂ (vapour products)। ਦੋਵਾਂ ਸੂਬਿਆਂ ਵਿੱਚ, 19 ਸਾਲ ਤੋਂ ਘੱਟ ਉਮਰ ਦੇ ਕਿਸੇ ਵੀ ਵਿਅਕਤੀ ਨੂੰ ਤੰਬਾਕੂ ਜਾਂ ਵੇਪ ਵਾਲੀਆਂ ਚੀਜ਼ਾਂ ਵੇਚਣਾ ਜਾਂ ਦੇਣਾ ਕਾਨੂੰਨ ਦੇ ਖ਼ਿਲਾਫ਼ ਹੈ।

• ਓਨਟਾਰੀਓ: ਜਿਹੜਾ ਵਿਅਕਤੀ 25 ਸਾਲ ਤੋਂ ਘੱਟ ਉਮਰ ਦਾ ਲੱਗਦਾ ਹੈ, ਸਟੋਰ ਉਸਨੂੰ ਇਹ ਚੀਜ਼ਾਂ ਤਦ ਤੱਕ ਨਹੀਂ ਵੇਚ ਸਕਦਾ ਜਦੋਂ ਤੱਕ ਆਈ.ਡੀ. (ID) ਨਾ ਮੰਗੇ ਅਤੇ ਇਹ ਤਸੱਲੀ ਨਾ ਕਰ ਲਵੇ ਕਿ ਵਿਅਕਤੀ ਦੀ ਉਮਰ ਘੱਟੋ-ਘੱਟ 19 ਸਾਲ ਹੈ (ontario.ca)।
• ਬੀ.ਸੀ.: ਵਿਅਕਤੀ ਦੀ ਉਮਰ ਪੱਕੀ ਕਰਨ ਲਈ ਦੁਕਾਨਾਂ (retailers) ਨੂੰ ਸਰਕਾਰ ਵੱਲੋਂ ਜਾਰੀ ਕੀਤੀ ਆਈ.ਡੀ. ਚੈੱਕ ਕਰਨੀ ਪੈਂਦੀ ਹੈ, ਜਿਵੇਂ ਪਾਸਪੋਰਟ, ਡਰਾਈਵਰਜ਼ ਲਾਇਸੈਂਸ, ਜਾਂ ਫ਼ੋਟੋ ਵਾਲਾ ਆਈ.ਡੀ. ਕਾਰਡ (gov.bc.ca)।

ਸ਼ਰਾਬ। ਜੇ ਤੁਹਾਡਾ ਸਟੋਰ ਬੀਅਰ ਜਾਂ ਵਾਈਨ ਵੇਚਦਾ ਹੈ, ਤਾਂ ਇਹ ਵੇਚਣ ਵਾਲੇ ਸਟਾਫ਼ 'ਤੇ ਵਾਧੂ ਟ੍ਰੇਨਿੰਗ ਅਤੇ ਉਮਰ ਦੇ ਨਿਯਮ ਲਾਗੂ ਹੁੰਦੇ ਹਨ। ਸਾਡੀ ਗਰੋਸਰੀ ਅਤੇ ਫ਼ਾਰਮੇਸੀ ਵਾਲੀ ਗਾਈਡ ਹਰ ਸੂਬੇ ਦੇ ਨਿਯਮ ਸਮਝਾਉਂਦੀ ਹੈ।

ਜੇ ਤੁਹਾਨੂੰ ਕਿਸੇ ਗਾਹਕ ਦੀ ਆਈ.ਡੀ. ਬਾਰੇ ਪੱਕਾ ਨਹੀਂ ਪਤਾ, ਤਾਂ ਆਪਣੇ ਸੁਪਰਵਾਈਜ਼ਰ ਨੂੰ ਪੁੱਛੋ। ਵਿਕਰੀ ਤੋਂ ਇਨਕਾਰ ਕਰਨਾ ਬਿਲਕੁਲ ਠੀਕ ਹੈ।

ਤੁਹਾਡੀ ਉਮਰ ਕਿੰਨੀ ਹੋਣੀ ਚਾਹੀਦੀ ਹੈ?

• ਬੀ.ਸੀ.: ਕੰਮ ਕਰਨ ਦੀ ਆਮ ਉਮਰ 16 ਸਾਲ ਹੈ। ਜੇ ਤੁਸੀਂ 14 ਜਾਂ 15 ਸਾਲ ਦੇ ਹੋ, ਤਾਂ ਮਾਪਿਆਂ ਜਾਂ ਸਰਪ੍ਰਸਤ ਦੀ ਲਿਖਤੀ ਇਜਾਜ਼ਤ ਨਾਲ ਤੁਸੀਂ "ਹਲਕਾ ਕੰਮ" (light work) ਕਰ ਸਕਦੇ ਹੋ (ਨੌਜਵਾਨਾਂ ਨੂੰ ਨੌਕਰੀ 'ਤੇ ਰੱਖਣਾ)। ਕੈਸ਼ੀਅਰ ਦਾ ਕੰਮ ਬੀ.ਸੀ. ਦੀ ਹਲਕੇ ਕੰਮ ਦੀ ਲਿਸਟ ਵਿੱਚ ਹੈ। ਪਰ ਹਲਕੇ ਕੰਮ ਵਿੱਚ ਉਮਰ-ਪਾਬੰਦੀ ਵਾਲੀਆਂ ਚੀਜ਼ਾਂ ਜਾਂ ਸੇਵਾਵਾਂ ਨਾਲ ਜੁੜਿਆ ਕੰਮ ਸ਼ਾਮਲ ਨਹੀਂ ਹੈ।
• ਓਨਟਾਰੀਓ: ਸਟੋਰ ਵਿੱਚ ਕੰਮ ਕਰਨ ਲਈ ਘੱਟੋ-ਘੱਟ ਉਮਰ 14 ਸਾਲ ਹੈ।

ਤਨਖਾਹ

ਤੁਹਾਨੂੰ ਘੱਟੋ-ਘੱਟ ਤਨਖਾਹ (minimum wage) ਜਾਂ ਉਸ ਤੋਂ ਵੱਧ ਮਿਲਣੀ ਚਾਹੀਦੀ ਹੈ:

• ਬੀ.ਸੀ.: $18.25 ਪ੍ਰਤੀ ਘੰਟਾ, 1 ਜੂਨ 2026 ਤੋਂ। ਵਿਦਿਆਰਥੀਆਂ ਲਈ ਕੋਈ ਘੱਟ ਰੇਟ ਨਹੀਂ ਹੈ।
• ਓਨਟਾਰੀਓ: $17.95 ਪ੍ਰਤੀ ਘੰਟਾ, 1 ਅਕਤੂਬਰ 2026 ਤੋਂ। 18 ਸਾਲ ਤੋਂ ਘੱਟ ਉਮਰ ਦੇ ਜਿਹੜੇ ਵਿਦਿਆਰਥੀ ਸਕੂਲ ਚੱਲਦੇ ਸਮੇਂ ਹਫ਼ਤੇ ਵਿੱਚ 28 ਘੰਟੇ ਜਾਂ ਘੱਟ ਕੰਮ ਕਰਦੇ ਹਨ, ਜਾਂ ਸਕੂਲ ਦੀ ਬ੍ਰੇਕ ਜਾਂ ਗਰਮੀਆਂ ਦੀਆਂ ਛੁੱਟੀਆਂ ਦੌਰਾਨ ਕੰਮ ਕਰਦੇ ਹਨ, ਉਹਨਾਂ ਨੂੰ $16.90 ਪ੍ਰਤੀ ਘੰਟਾ ਦਾ ਵਿਦਿਆਰਥੀ ਰੇਟ ਦਿੱਤਾ ਜਾ ਸਕਦਾ ਹੈ।

ਬ੍ਰੇਕ, ਓਵਰਟਾਈਮ, ਅਤੇ ਸਰਕਾਰੀ ਛੁੱਟੀਆਂ ਦੀ ਤਨਖਾਹ (holiday pay) ਬਾਰੇ ਜਾਣਕਾਰੀ ਬੀ.ਸੀ. ਅਤੇ ਓਨਟਾਰੀਓ ਲਈ ਸਾਡੀਆਂ ਹੱਕਾਂ ਵਾਲੀਆਂ ਗਾਈਡਾਂ ਵਿੱਚ ਹੈ।

ਨੌਕਰੀ ਕਿਵੇਂ ਮਿਲੇ

1. ਆਨਲਾਈਨ ਅਰਜ਼ੀ ਦਿਓ। ਵੱਡੀਆਂ ਚੇਨਾਂ ਆਪਣੀਆਂ ਕਰੀਅਰ ਵੈੱਬਸਾਈਟਾਂ 'ਤੇ ਨੌਕਰੀਆਂ ਪਾਉਂਦੀਆਂ ਹਨ। ਸਾਡੀ ਨੌਕਰੀਆਂ ਲਈ ਆਨਲਾਈਨ ਅਰਜ਼ੀ ਦੇਣ ਵਾਲੀ ਗਾਈਡ ਤੁਹਾਨੂੰ ਕਦਮ-ਦਰ-ਕਦਮ ਸਮਝਾਉਂਦੀ ਹੈ।
2. ਸਟੋਰ ਜਾਓ। ਕਿਸੇ ਸ਼ਾਂਤ ਸਮੇਂ ਜਾਓ, ਜਿਵੇਂ ਸੋਮਵਾਰ ਤੋਂ ਸ਼ੁੱਕਰਵਾਰ ਦੇ ਕਿਸੇ ਦਿਨ ਅੱਧ-ਸਵੇਰ ਵੇਲੇ। ਪੁੱਛੋ ਕਿ ਕੀ ਮੈਨੇਜਰ ਮੌਜੂਦ ਹੈ, ਆਪਣੀ ਜਾਣ-ਪਛਾਣ ਕਰਾਓ, ਅਤੇ ਦੱਸੋ ਕਿ ਤੁਸੀਂ ਅਰਜ਼ੀ ਦਿੱਤੀ ਹੈ।
3. ਖੁੱਲ੍ਹੀ ਅਵੇਲੇਬਿਲਿਟੀ ਦਿਓ। ਸ਼ਾਮਾਂ, ਵੀਕਐਂਡ, ਅਤੇ ਛੁੱਟੀਆਂ ਵਾਲੇ ਦਿਨ ਸਟੋਰਾਂ ਨੂੰ ਕੈਸ਼ੀਅਰਾਂ ਦੀ ਸਭ ਤੋਂ ਵੱਧ ਲੋੜ ਹੁੰਦੀ ਹੈ।
4. ਹੋਰ ਥਾਵਾਂ ਤੋਂ ਮਿਲਿਆ ਕਸਟਮਰ ਸਰਵਿਸ ਦਾ ਤਜਰਬਾ ਦਿਖਾਓ। ਵਾਲੰਟੀਅਰ ਕੰਮ, ਸਕੂਲ ਦੇ ਈਵੈਂਟ, ਜਾਂ ਪਰਿਵਾਰ ਦੇ ਕਾਰੋਬਾਰ ਵਿੱਚ ਮਦਦ, ਸਭ ਗਿਣੇ ਜਾਂਦੇ ਹਨ। ਦੇਖੋ ਕੰਮ ਦੇ ਤਜਰਬੇ ਤੋਂ ਬਿਨਾਂ ਆਪਣਾ ਪਹਿਲਾ ਰਿਜ਼ਿਊਮੇ ਲਿਖਣਾ।
5. ਆਮ ਸਵਾਲਾਂ ਦੀ ਤਿਆਰੀ ਕਰੋ। ਮੈਨੇਜਰ ਅਕਸਰ ਪੁੱਛਦੇ ਹਨ ਕਿ ਤੁਸੀਂ ਨਾਰਾਜ਼ ਗਾਹਕ ਨੂੰ ਕਿਵੇਂ ਸੰਭਾਲੋਗੇ, ਜਾਂ ਜੇ ਤੁਹਾਡੇ ਡਰਾਅਰ ਦਾ ਹਿਸਾਬ ਨਾ ਮਿਲੇ ਤਾਂ ਤੁਸੀਂ ਕੀ ਕਰੋਗੇ। ਵਧੀਆ ਜਵਾਬ: ਸ਼ਾਂਤ ਰਹੋ, ਇਮਾਨਦਾਰ ਰਹੋ, ਅਤੇ ਸੁਪਰਵਾਈਜ਼ਰ ਤੋਂ ਮਦਦ ਮੰਗੋ। ਹੋਰ ਜਾਣਕਾਰੀ ਲਈ ਤੁਹਾਡੀ ਪਹਿਲੀ ਨੌਕਰੀ ਦੀ ਇੰਟਰਵਿਊ ਪੜ੍ਹੋ।

ਅਗਲੇ ਕਦਮ

• ਮੈਟਰੋ ਵੈਨਕੂਵਰ ਅਤੇ GTA ਵਿੱਚ ਕੈਸ਼ੀਅਰ ਦੀਆਂ ਨੌਕਰੀਆਂ
• ਸਟੋਰ ਦੀਆਂ ਹੋਰ ਨੌਕਰੀਆਂ ਬਾਰੇ ਜਾਣੋ: ਰਿਟੇਲ ਸਟੋਰ ਐਸੋਸੀਏਟ ਦੀਆਂ ਨੌਕਰੀਆਂ
• ਅਜੇ ਸਕੂਲ ਵਿੱਚ ਪੜ੍ਹਦੇ ਹੋ? ਪੜ੍ਹੋ ਵਿਦਿਆਰਥੀਆਂ ਲਈ ਪਾਰਟ-ਟਾਈਮ ਨੌਕਰੀਆਂ
• ਤਿਆਰੀ ਕਰੋ: ਤੁਹਾਡੀ ਪਹਿਲੀ ਨੌਕਰੀ ਦੀ ਇੰਟਰਵਿਊ